រាជធានីភ្នំពេញ ៖ យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ បានឱ្យដឹងថា ព្រឹត្តិការណ៍ប្រកួតកីឡាបាល់ទាត់ពិភពលោកឆ្នាំ២០២៦ (FIFA World Cup 2026) កំពុងទទួលបានការគាំទ្រយ៉ាងខ្លាំងពីប្រជាពលរដ្ឋទូទាំងពិភពលោក រួមទាំងប្រជាពលរដ្ឋកម្ពុជា ផងដែរ។ ដូចនេះ ដើម្បីបង្កើនភាពសប្បាយ រីករាយ និងបង្កលក្ខណៈងាយស្រួលជូនបងប្អូនប្រជាពលរដ្ឋ បានទស្សនា រដ្ឋបាលរាជធានីភ្នំពេញ នឹងរៀបចំផ្សាយបន្តផ្ទាល់វគ្គប្រកួតដណ្តើមលេខ៣-៤ រវាងក្រុមបាល់ទាត់ជម្រើសជាតិ ប្រទេសបារាំង និងប្រទេសអង់គ្លេស នៅថ្ងៃទី១៩ ខែកក្កដា ឆ្នាំ២០២៦ វេលាម៉ោង៤:០០ទៀបភ្លឺ និងវគ្គផ្តាច់ព្រ័ត្រ រវាងក្រុមបាល់ទាត់ជម្រើសជាតិប្រទេសអេស្ប៉ាញ និងប្រទេសអាហ្សង់ទីន នៅថ្ងៃទី២០ ខែកក្កដា ឆ្នាំ២០២៦ វេលាម៉ោង ២:០០ទៀបភ្លឺ នៅតាមទីតាំង ចំនួន៣ ដូចខាងក្រោម ៖
១-សួនច្បារមាត់ទន្លេ (ផ្លូវថ្មើរជើងចតុមុខ) ក្បែររូបសំណាកតេជោមាសតេជោយ៉ត
២-សួនច្បារមុខវត្តបទុមវតី
៣-សួនច្បារកោះនរា
រដ្ឋបាលរាជធានីភ្នំពេញ សង្ឃឹមជឿជាក់ថា បងប្អូនប្រជាពលរដ្ឋនឹងចូលរួមទស្សនាការផ្សាយបន្តផ្ទាល់នេះ ឱ្យបានច្រើនកុះករ និងអធិកអធម ប្រកបដោយស្មារតីទទួលខុសត្រូវ ។
ទទួលបានសេចក្តីជូនដំណឹងនេះ ស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថ រាជធានីភ្នំពេញ រដ្ឋបាលខណ្ឌដូនពេញ-ច្បារអំពៅ និងអង្គភាពជំនាញពាក់ព័ន្ធត្រូវផ្សព្វផ្សាយឱ្យបានទូលំទូលាយ ព្រមទាំងចាត់កម្លាំងការពារសុវត្ថិភាព សន្តិសុខ និងរៀបចំសណ្តាប់ធ្នាប់ឱ្យបានល្អប្រសើរជូនបងប្អូនប្រជាពលរដ្ឋ ដែលមកទស្សនា៕
ចែករំលែកព័តមាននេះ