សង្គ្រាមអ៉ិរ៉ង់ ៖ ផ្ទាំងបដាដ៏ធំមួយ មានរូបលោកត្រាំក្នុងមឈូស ត្រូវបានគេដាក់តាំងនៅកណ្ដាលក្រុងតេហេរ៉ង់ ដែលនោះជាតំណាងនៃការកើនឡើងខ្លាំងបំផុត ភាពតានតឹងរវាងអ៉ីរ៉ង់ និងអាមេរិក ។ នៅលើទីលាន កាលពីថ្ងៃទី១៥ កក្កដា អ៉ីរ៉ង់ទទួលរងរលកនៃការវាយប្រហារខ្លាំងក្លារបស់អាមេរិក បន្ទាប់ពីលោកត្រាំប្រកាសបិទខ្ទប់ជាថ្មី បណ្ដាកំពង់ផែអ៉ីរ៉ង់ដែលបែបនោះបង្ហាញពីការវិលត្រឡប់វិញនៃសង្គ្រាមរវាងគូសត្រូវទាំង២ ។ ជិតមួយខែ ក្រោយការចុះហត្ថលេខាលើពិធីសារនៃកិច្ចព្រមព្រៀងមួយដែលសំដៅបញ្ចប់សង្គ្រាមនៅមជ្ឈឹមបូព៌ាគូសត្រូវទាំង២បានប្រយុទ្ធគ្នាជាថ្មី ដោយវាយប្រហារបណ្ដាគោលដៅក្នុងតំបន់ទាំងមូល។
បដិវត្តន៍អ៉ីរ៉ង់ថ្លែងថា បានវាយប្រហារលើមូលដ្ឋានកងនាវាចរណ៍ទី៥របស់អាមេរិកនៅបារ៉ែន កន្លែងដែលកងទ័ពប្រទេសនេះគូសបញ្ជាក់ថា បានស្ទាក់កម្ទេចមីស៊ីល និងដ្រូន ដែលវាយប្រហារសំដៅលើបណ្ដាគោលដៅស៊ីវិល។ ចំណែកកងទ័ពហ្ស៊កដានីអះអាងថា បានបាញ់ទម្លាក់មីស៊ីល៣គ្រាប់បាញ់ចេញពីអ៉ីរ៉ង់។
ប្រធានាធិបតីអាមេរិក លោកដូណាល់ត្រាំ ព្រមានថា លោកនឹងពង្រីកការវាយប្រហារនាសប្ដាហ៍ខាងមុខនេះ សំដៅលើបណ្ដាមជ្ឈមណ្ឌលអគ្គិសនី និងស្ពានអ៉ីរ៉ង់ ប្រសិនបើអ៉ីរ៉ង់មិនព្រមវិលមករកតុចរចាវិញទេនោះ ។ លោកថ្លែងតាមទូរទស្សន៍FOX NEWS ថា សប្ដាហ៍ខាងមុខនេះ សភាពការណ៍នឹងពិតជាអាក្រក់សម្រាប់អ៉ីរ៉ង់។ ទោះបីមានការប្រទូស្តរ៉ាយគ្នាថ្មីក៏ដោយ ការចរចាធ្វើឡើង ក្រោមអាជ្ញាកណ្ដាលមួយ រវាងភាគីទាំង២ ក៏មិនទាន់ត្រូវបញ្ចប់ជាផ្លូវការណ៍ដែរ ។ ចំណុចស្នូលនៃការប្រទូស្ត
រ៉ាយគ្នាជាថ្មីទាក់ទិននឹងច្រកសមុទ្រហ័រមូស ។
អ៉ីរ៉ង់បានបិទខ្ទប់ច្រកសមុទ្រនេះ ចាប់តាំងពីមានការវាយប្រហារខ្លាំងក្លារបស់អាមេរិក និងអ៉ីស្រាអែលពីថ្ងៃទី២៨ កុម្ភៈ មក ហើយរយៈពេលជាច្រើនខៃចាត់ទុកថា ជាមធ្យោបាយគាបសង្កត់ ប្រឆាំងសត្រូវមុនពេលបើកវិញក្នុងរយៈពេលខ្លី រួចមកប្រកាសបិទវិញរហូតដល់អាមេរិកបញ្ចប់ការឈ្លានពានរបស់ខ្លួន ។ ចំណែកអាមេរិក ក៏បានបិទឡើងវិញដែរ។ លោកត្រាំបែរមកផ្លាស់ប្ដូរ ដោយគ្រោងយកពន្ធ២០%ពីបណ្ដានាវា ដែលបើកឆ្លងកាត់ច្រកសមុទ្រនោះ។
ប៉ុន្មានថ្ងៃបន្ទាប់ពីការផ្ទុះឡើងវិញ ការវាយប្រហារគ្នា ទីបញ្ជាការដ្ឋានកណ្ដាលកងទ័ពអាមេរិកនៅមជ្ឈឹមបូព៌ាថ្លែងថា បានវាយប្រហារខ្លាំងរលកថ្មីសំដៅធ្វើឲ្យចុះខ្សោយថែមទៀត ដល់សមត្ថភាពយោធា ដែលកងទ័ពអ៉ីរ៉ង់ប្រើ វាយប្រហារបណ្ដានាវាឆ្លងកាត់ច្រកសមុទ្រហ័រមូស ។ បណ្ដាសារព័ត៌មានអ៉ីរ៉ង់រៀបរាប់ពីការផ្ទុះនានា នៅជិតទីក្រុងកំពង់ផែបានដាអាប់បាស់ លើកោះQESHM និងនៅទីក្រុងបានដាអ៉ីម៉ាមខាមេនី។ បន្ទាប់មកសារព័ត៌មានទាំងនោះរៀបរាប់ពីការវាយប្រហារថ្មីៗរបស់អាមេរិក លើទីក្រុងកំពង់ផែ BUSHERភាគខាងត្បូងប្រទេស ដែលនៅទីនោះមានមជ្ឈមណ្ឌលនុយក្លេអ៊ែរស៊ីវិលតែមួយគត់របស់អ៉ីរ៉ង់ ។
នៅក្រុងតេហេរ៉ង់វិញ ទោះមានការវិលត្រឡប់មកវិញនៃជម្លោះ ក៏ប្រជាជនហាក់មិនខ្លាចនៅតែលើកគ្នាមកកាន់បណ្ដាហាងកាហ្វេ តាមដានការប្រកួតពាក់កណ្ដាលផ្ដាច់ព្រ័ត្របាល់ទាត់ពិភពលោក ។ នាវាដឹកប្រេងន័រវែសមួយគ្រឿងរងការវាយប្រហារ ក្នុងដែនទឹកនៃឆ្នេរសមុទ្រអូម់ង់ កាលពីព្រឹកថ្ងៃទី ១៤ កក្កដា។ គុយវ៉ែតនិយាយថានាវាចម្បាំងរបស់ខ្លួន១គ្រឿង រងការវាយប្រហារដោយមិស៊ីល និងដ្រូនអ៉ីរ៉ង់បណ្ដាលឲ្យនាវិក៤នាក់រងរបួស៕
ចែករំលែកព័តមាននេះ