ដេញថ្លៃចុះជាង ៦០ភាគរយ ព្រមា.នថា បើខុសបច្ចេកទេសចុះក្នុងបញ្ជីខ្មៅ
- ត្បូងឃ្មុំ
ខេត្តត្បូងឃ្មុំ ៖ មានក្រុមហ៊ុនយ៉ាងហោចណាស់ជាង ២០ បានចូលរួមដេញថ្លៃគម្រោងសាងសង់ផ្លូវក្រាលគ្រួសក្រហមប្រវែង ៩២០ម៉ែត្រនៅសាលាឃុំព្រែកអាជី ស្រុកត្បូងឃ្មុំ ដែលធ្វើឡើងកាលពីព្រឹកថ្ងៃទី ១៤ ខែកក្កដាឆ្នាំ ២០២៦ សម្រាប់តម្លៃដាក់ឲ្យដេញថ្លៃជាង៧៣លានរៀល ក្នុងនោះមានតែ ៦ ក្រុមហ៊ុនបានយកប៊ីតដាក់ក្នុងប្រអប់សំបុត្រ ចំពោះលទ្ធផលនៃការដេញថ្លៃឃើញថា មានការប្រកួតប្រជែងយ៉ាងចាស់ដៃធ្វើឲ្យការធ្លាក់ចុះមកនៅត្រឹមតែ ២០លានរៀលជាងប៉ុណ្ណោះ ។
ជាមួយនោះអាជ្ញាធរក៏ដូចជាស្ថាប័នជំនាញបានព្រមានដល់ក្រុមហ៊ុនធ្វើយ៉ាងណាឲ្យត្រូវស្តង់ដាបច្ចេកទេស បើពុំនោះទេនឹងដាក់ក្នុងបញ្ជីខ្មៅឱ្យចុះនរករបស់ក្រសួងមហាផ្ទៃហើយ ។
លោក ឆេង សុផល មេឃុំព្រែកអាជី បានឲ្យដឹងថា ដោយមានការស្នើសុំពីប្រជាពលរដ្ឋនៅភូមិឈើទាលទីមួយ មកកាន់អាជ្ញាធរដើម្បីសុំផ្លូវមួយខ្សែឆ្ពោះទៅកាន់ស្រែ និងចម្ការរបស់ពួកគាត់ ។ ដោយមើលឃើញពីការលំបាកអាជ្ញាធរបានសម្រេចផ្ដល់ផ្លូវមួយខ្សែប្រវែង ៩២០ម៉ែត្រ ហើយក៏បានដាក់ឲ្យដេញថ្លៃជាសាធារណៈធ្វើឡើងនៅសាលាឃុំ ទិដ្ឋភាពគឺមានការប្រកួតប្រជែងដោយមានក្រុមហ៊ុនច្រើនចូលរួម ។
លោកមេឃុំព្រែកអាជី បន្តថា កន្លងមកក្រុមហ៊ុនដែលដេញផ្លូវបានគឺមានផលវិបាកត្រង់ថា គ្រួសក្រហមត្រូវទៅរកពីតំបន់ឆ្ងាយនៅឃុំរកាពរប្រាំ ដែលមានចម្ងាយប្រមាណ ២០គីឡូម៉ែត្រ ចំពោះនៅតំបន់របស់លោកមិនមាននោះទេ ។
ក្រុមហ៊ុនឈ្មោះសឿន វាសនា ដែលដេញថ្លៃផ្លូវបាននេះកន្លងមកធ្លាប់មានបទពិសោធន៍សាងសង់ទំនប់បង្ហៀរទឹក និងផ្លូវបេតុងនៅឃុំបឹងព្រួលជាប់នឹងឃុំរបស់លោកចំពោះគុណភាពគឺអាចទទួលយកបាន តែការដេញថ្លៃផ្លូវនេះចុះច្រើនលើសពី ៦០% ដូច្នេះចុះក៏ចុះទៅតែគុណភាពត្រូវតែគោរពតាមស្តង់ដាបច្ចេកទេស ។
លោក សឹង សេរីវ៉ាន់ឌី ប្រធានការិយាល័យផែនការ និងវិនិយោគខេត្តត្បូងឃ្មុំ វិញបានឱ្យដឹងដែរថា រូបលោកសូមក្រើនរំលឹកដល់ក្រុមហ៊ុនធ្វើយ៉ាងណាដេញកុំចង់បានតែឈ្នះហើយ តម្លៃចុះច្រើនដូច្នេះនឹងធ្វើឲ្យការសាងសង់គ្មានគុណភាព ។ សូមពិនិត្យឱ្យបានច្បាស់លាស់កាលណាធ្វើអត់មានគុណភាព បើជួសជុលផ្លូវក្រាលគ្រួសក្រហមចាក់កិនបង្ហាប់បានមិនមានបញ្ហា។
តែបើស្ថាបនាផ្លូវបេតុងក្នុងសុពលភាពកន្លែងដែលដេញថោកពេកត្រូវកាត់ចេញគាស់ចោល ធ្លាប់កើតមាននៅកំពង់ចាម និងត្បូងឃ្មុំក៏មាន ។ កន្លែងដែលខូចមានប្រវែង ១៧៧ ម៉ែត្រ ត្រូវគាស់ចោលព្រោះលួចបន្លំការសាងសង់ ធ្វើតាមបច្ចេកទេសនោះមិនមានបញ្ហាចោទទេ ។
បើរកឃើញមានបែបនេះបន្តទៀតក្រុមហ៊ុន និងត្រូវដាក់ក្នុងបញ្ជីខ្មៅក្រសួងមហាផ្ទៃ ។ អ្នករកស៊ី គឺចង់បានចំណេញតែសូមឱ្យមានគុណភាពល្អ ជាមួយនោះក៏សូមអរគុណដល់អ្នកសារព័ត៌មានដែលបានរាយការណ៍ពីក្រុមហ៊ុនដែលស្ថាបនាផ្លូវហើយក្រុមការងាររបស់លោកក្រោយពីទទួលបានចុះទៅត្រួតពិនិត្យដោយផ្ទាល់ឬអាជ្ញាធរមូលដ្ឋានលើក្រុមហ៊ុនដែលកសាងសង់មិនគោរពតាមកិច្ចសន្យា ៕
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព
ចែករំលែកព័តមាននេះ