ខេត្តកំពង់ស្ពឺ ៖ កម្លាំងជំនាញនៃស្នងការដ្ឋាននគរបាលខេត្តកំពង់ស្ពឺ បានបើកប្រតិបត្តិការចុះបង្ក្រាបទីតាំងអាហារដ្ឋាន និងផ្ទះសំណាក់មួយកន្លែង ដែលសង្ស័យថា បានលួចលាក់បើកឱ្យមានការប្រព្រឹត្តអំពើសញ្ចារកម្ម និងផ្តល់ទីតាំងធ្វើពេស្យាចារ ដោយឃាត់ខ្លួនម្ចាស់ទីតាំងម្នាក់ និងជួយសង្គ្រោះនារីរងគ្រោះបានចំនួន៧នាក់។
ជាក់ស្តែងស្នងការដ្ឋាននគរបាលខេត្តកំពង់ស្ពឺ បានប្រកាសនាព្រឹកថ្ងៃទី១៦ ខែកក្កដានេះថា ៖ ដោយបានការបញ្ជាដឹកនាំដ៏ខ្ពង់ខ្ពស់ពីលោកឧត្តមសេនីយ៍ទោ ឃឹម សុកខៃ ស្នងការ នគរបាលខេត្ដកំពង់ស្ពឺ និងការដឹកនាំពីលោកស្រី ឧត្ដមសេនីយ៍ត្រី ងិន សុគន្ធា ស្នងការរង ទទួលផែនការងារប្រឆាំងការជួញដូរមនុស្ស និងការពារអនីតិជន នៅរសៀលថ្ងៃទី១៥ ខែកក្កដា ឆ្នាំ២០២៦ បានចុះដល់ទីតាំងអាហារដ្ឋានយីហោម្លប់លាភត្រជាក់ចិត្ត និងផ្ទះសំណាក់យីហោ ហេងហេង ស្ថិតនៅភូមិទឹកលង២ ឃុំរុងរឿង ស្រុកថ្ពង ខេត្តកំពង់ស្ពឺ សង្ស័យលួចឱ្យមានការប្រព្រឹត្តអំពើសញ្ចារកម្ម និងផ្តល់ទីតាំងធ្វើពេស្យាចារ ។
លោកស្រី នាយការិយាល័យ បានបញ្ជាក់ក្នុងប្រតិបត្ដិការខាងលើ កម្លាំងបានរកឃើញបន្ទប់សម្រាប់ការស្នាក់នៅ និងបានឃាត់ខ្លួនម្ចាស់ទីតាំងម្នាក់ឈ្មោះ សុខុម សៀប ភេទស្រី អាយុ៦០ឆ្នាំ និងបានអន្ដរាគមន៍ជួយសង្គ្រោះនារី ដែលបានមករកការធ្វើនៅទីតាំងខាងលើ ចំនួន៧នាក់ ក្នុងនោះរកឃើញនារីជាអនីតិជន២នាក់ ដែលបានមកបម្រើការដោយការអូសទាញ និងធានាពីម្ចាស់ហាង ។
បច្ចុប្បន្នសមត្ថកិច្ច បានធ្វើការ នាំនារីទាំង៧នាក់ (អនីតិជន ២នាក់) និងម្ចាស់ហាងមកកាន់ស្នងការដ្ឋាននគរបាលខេត្ដ ដើម្បីចំណាត់ការនីតិវិធីបន្ដ៕
ចែករំលែកព័តមាននេះ