ទីក្រុងតេអេរ៉ង់៖ ថ្ងៃនេះ អ៊ីរ៉ង់ និងអាមេរិកបន្តវាយបកគ្នាទៅវិញទៅមកដោយប្រើប្រាស់មីស៊ីល និងដ្រូន។ អ៊ីរ៉ង់វាយប្រហារមូលដ្ឋានយោធាអាមេរិកនៅតំបន់ឈូងសមុទ្រពែក្សកាលពីយប់មិញ។ អ៊ីរ៉ង់ថែមទាំងប្រកាសថាខ្លួនបានបិទច្រកសមុទ្រហ័រម៉ូសឡើងវិញ។ អំពើហិង្សាដែលកើតឡើងជាថ្មីនេះធ្វើឱ្យគេសង្ស័យថាហេងស៊យកិច្ចព្រមព្រៀងនៃបទឈប់បាញ់បណ្ដោះអាសន្ននោះអាចនឹងបរាជ័យ។ តាមស្មារតីនៃកិច្ចព្រមព្រៀងនេះ ភាគីទាំង២ត្រូវខិតខំចរចាគ្នានៅក្នុងរយៈពេល៦០ថ្ងៃដើម្បីឱ្យចេញជាកិច្ចព្រមព្រៀង និងបិទបញ្ចប់ការផ្ទុះអាវុធពីគ្រប់ភាគី។
ការវាយប្រហារគ្នាលើកនេះកើតមានឡើងនៅពេលអ៊ីរ៉ង់ចង់គ្រប់គ្រងច្រកសមុទ្រហ័រម៉ូសផ្ដាច់មុខ និងចង់ទារថ្លៃពីកប៉ាល់ដឹកទំនិញនានាដែលបើកកាត់ច្រកនេះ។ ឥឡូវនេះ អ៊ីរ៉ង់ពង្រីកការវាយប្រហារចូលមូលដ្ឋានអាមេរិកនៅកាតាដែលជាប្រទេសសម្របសម្រួលការចរចាគ្នា។ សហភាពអារ៉ាប់រួមដែលមិនត្រូវបានវាយប្រហារពីសំណាក់អ៊ីរ៉ង់ទេចាប់តាំងពីខែឧសភាថ្លែងថាប្រព័ន្ធការពារដែនអាកាសរបស់ខ្លួនក៏បានបាញ់ស្ទាក់មីស៊ីល និងដ្រូនដែលហោះចេញពីទឹកដីអ៊ីរ៉ង់ផងដែរ។ យោធាអាមេរិកចាប់ផ្ដើមបើកការវាយប្រហារអ៊ីរ៉ង់នៅម៉ោង៥ល្ងាចថ្ងៃអាទិត្យដើម្បីអ្វីដែលខ្លួនហៅថាជាការបន្ទច់បង្អាក់អ៊ីរ៉ង់មិនឱ្យវាយប្រហារទៅលើនាវឹកនៅក្នុងប៉ាល់ស៊ីវិល និងកប៉ាល់ពាណិជ្ជកម្មដែលពួកគេត្រូវតែមានសិទ្ធិធ្វើដំណើរកាត់ទីនោះដោយសេរី។
អ្នកនាំពាក្យបញ្ជាការដ្ឋានយោធាអាមេរិក លោកធីម ហកឃីន (Tim Hawkins) ថ្លែងប្រាប់ស៊ីអឹនអឹនថាយន្តហោះអាមេរិកមួយគ្រឿងបានបាញ់ទម្លាក់មីស៊ីលបណ្ដែតរបស់អ៊ីរ៉ង់។ សារពត៌មានអ៊ីរ៉ង់ផ្សាយថាមានករណីវាយប្រហារដោយមីស៊ីល និងមានសំឡេងផ្ទុះនៅទីក្រុងមាត់សមុទ្រស៊ីរីក (Sirik), បាន់ដា អាបាស់ (Bandar Abbas) ដែលជាទីតាំងយោធារបស់អ៊ីរ៉ង់នៅតាមច្រកហ័រម៉ូស និងក៏វាយប្រហារផងដែរទៅលើកោះកេសឹម (Qeshm)។ ក្រសួងការបរទេសអ៊ីរ៉ង់បានប្រកាសថ្កោលទោសជាទម្ងន់ចំពោះអ្វីដែលខ្លួនហៅថាជាអំពើឈ្លានពានរបស់អាមេរិកប្រឆាំងនឹងអ៊ីរ៉ង់។
ក្រសួងដដែលនេះអះអាងថាការចរចាគ្នារវាងអ៊ីរ៉ង់ និងអូម៉ង់កាលពីថ្ងៃសៅរ៍មិនអាចសម្រេចបានលទ្ធផលដូចការចង់បាននោះទេដោយសារលក្ខខណ្ឌទាំងនោះមានលក្ខណៈច្បោលៗ និងទូលំទូលាយពេក។ កិច្ចពិភាក្សានោះផ្ដោតសំខាន់ទៅលើការរៀបចំចាត់ចែងច្រកសមុទ្រហ័រម៉ូស។ កាលពីសប្ដាហ៍មុន លោកដូណាល់ត្រាំថ្លែងថាបទឈប់បាញ់ជាបណ្ដោះអាសន្ននោះបានបិទបញ្ចប់ទៅហើយ។ ប៉ុន្តែលោកនៅតែបើកទ្វារចំហជានិច្ចសម្រាប់ការចរចាគ្នាលើកក្រោយទៀត។ ប្រធានក្រុមចរចារបស់អ៊ីរ៉ង់បង្ហោះសារនៅលើបណ្ដាញអ៊ិចថា «សករាជនៃកិច្ចព្រមព្រៀងដែលធ្វើតម្រូវតាមភាគីតែម្ខាងនោះបានឈានដល់ទីបញ្ចប់ហើយ។ យើងសូមប្រាប់អ្នកឱ្យបានដឹង៖ ចូរអ្នកធ្វើដូចការសន្យារបស់ខ្លួន។ បើមិនដូច្នេះទេ អ្នកនឹងត្រូវបង់តម្លៃដ៏ខ្ពស់។ អ្នកត្រូវតែហ៊ានប្រឈមនឹងការពិត»៕ ប្រភព៖ Reuters
ចែករំលែកព័តមាននេះ