ទីក្រុងបាងកក៖ មានហេតុការណ៍ឆេះក្លិបកម្សាន្តមួយកន្លែងនៅកណ្ដាលទីក្រុងបាងកក ប្រទេសថៃ បណ្ដាលឱ្យស្លាប់មនុស្ស២៧នាក់ និងរបួសរាប់សិបនាក់។ នេះបើយោងតាមការបង្ហើបឱ្យដឹងពីមន្ត្រីរដ្ឋាភិបាលថៃ។ ដោយសារច្រកផ្លូវចេញត្រូវរាំងស្ទះ ដូច្នេះធ្វើឱ្យមនុស្សរាប់រយនាក់ក្នុងអគារនោះឈ្លក់ផ្សែង។ តាមរយុៈវីឌីអូឃ្លីបដែលគេបង្ហោះនៅលើបណ្ដាញសង្គម គេឃើញផ្សែងក្រាស់ឃ្មឹកហោះហើរទៅលើអាកាស។ នាយករដ្ឋមន្ត្រីថៃ អនុទីន ចាន់វីរៈគុល ថ្លែងថាយើងរកឃើញសាកសពជនរងគ្រោះ ២៧នាក់ ខណៈដែលមនុស្ស៦៣នាក់ទៀតរងរបួស។ ក្នុងនោះ ២២នាក់រងរបួសធ្ងន់នៅក្នុងហេតុការណ៍ឆេះក្លិបមួយកន្លែងឈ្មោះរ៉ុងបៀ ណាឡាត់ ប្រាវ (Rong Beer Na Lat Phrao)។
ក្លិបនោះស្ថិតនៅតំបន់ទីប្រជុំជននៃទីក្រុងបាងកកភាគខាងជើង អាចធ្វើដំណើរទៅមកដោយជិះរថភ្លើង ហើយស្ថិតនៅក្បែរផ្សារលក់ទំនិញ។ មានរោងរោងភាពយន្តជាច្រើនកន្លែងនៅជិតៗនោះ អាចធ្វើដំណើរដោយថ្មើរជើងទៅដល់។ ទីនោះមានកន្លែងចតឡានធំទូលាយ, មានផ្សារបើកលក់ថ្ងៃចុងសប្ដាហ៍ឈ្មោះចតុចក្រ (Chatuchak) និងមានភ្ញៀវទេសចរបរទេសឧស្សាហ៍ចេញចូល។ ការវាយតម្លៃបឋមទៅលើសំណុំរឿងឆេះក្លិបខាងលើនេះបង្ហាញថាមានហេតុការណ៍ឆ្លងចរន្តអគ្គិសនីពីម៉ាស៊ីនត្រជាក់នៅពិតានអគារ ហើយបង្កជាភ្លើងឆេះតែម្ដង។ នេះបើយោងតាមគណៈកម្មការគ្រប់គ្រងគ្រោះមហន្តរាយ។
យោងតាមការរៀបរាប់ពីអ្នកដែលនៅរស់រានមានជីវិតពីហេតុការណ៍នេះ មន្ត្រីរដ្ឋាភិបាលថ្លែងថាភ្លើងចាប់ផ្ដើមឆេះដំបូងនៅផ្នែកខាងមុខនៃក្លិប។ បន្ទាប់មក ភ្លើងក៏ចេះឆេះរាលដាលកាន់តែខ្លាំងឡើងៗ ជាហេតុធ្វើឱ្យមនុស្សនៅក្នុងនោះរត់ទៅសម្ងំលាក់ខ្លួននៅខាងក្រោយដែលមានផ្ទះបាយ និងបន្ទប់ងូតទឹក។ អភិបាលទីក្រុងបាងកកថ្លែងថានៅក្នុងអគារនោះមានច្រកចេញសម្រាប់គ្រាអាសន្នចំនួន២។ នៅតាមផ្លូវនោះមានធុងដាក់ស្រាបៀធំៗ។ នៅច្រកចេញមួយនោះមានតុនៅពីមុខផ្លូវ។ ហេតុដូចនេះ វាបន្ទច់បង្អាក់ការជម្លៀសមនុស្ស។
លោកថ្លែងបន្តទៀតថាយើងត្រូវរង់ចាំក្រុមអ្នកកោសល្យវិច័យដើម្បីពិនិត្យកន្លែងកើតហេតុ។ ភ្នាក់ងារពន្លត់អគ្គិភ័យម្នាក់ឈ្មោះចាក់គ្រីត ខុងកម (Chakrit Khongkom) វ័យ៤៥ឆ្នាំ ប្រាប់ថាគាត់ជិះឡានទឹកទៅដល់កន្លែងកើតហេតុ។ នៅពេលទៅដល់ឃើញក្លិបខាងលើនេះឆាបឆេះនៅក្នុងភ្លើងយ៉ាងសន្ធោសន្ធៅ និងឃើញមនុស្សជាច្រើនជាប់ផុងនៅក្នុងអគារនោះ។ អ្នកខ្លះខំជម្លៀសខ្លួនចេញពីទីនោះតាមច្រកទ្វារខាងក្រោយ។ មានតែមនុស្សតិចតួចប៉ុណ្ណោះដែលសម្រុកចេញតាមច្រកទ្វារខាងមុខ។ បុរសខាងលើនេះប្រាប់បន្តទៀតថាផ្សែងហោះហើរគ្រប់ទីកន្លែង។ អ្នកដែលអាចនៅរស់រានមានជីវិតភាគច្រើនក៏ឈ្លក់ផ្សែងមិនតិចនាក់ដែរ៕ ប្រភព៖ Reuters
ចែករំលែកព័តមាននេះ