រដ្ឋបាលស្រុករតនមណ្ឌល ជូនដំណឹងពីការកើនឡើងនៃទឹកស្ទឹងសង្កែ និងការបើកទ្វារទឹកទំនប់សេកសក ៣ទ្វារ ព្រមទាំងអំពាវនាវឱ្យប្រជាពលរដ្ឋប្រុងប្រយ័ត្នខ្ពស់ ។
ជាក់ស្តែងរដ្ឋបាលស្រុករតនមណ្ឌល ខេត្តបាត់ដំបង បានប្រកាសនាព្រឹកថ្ងៃទី១៣ ខែកក្កដានេះថា ៖ សូមជម្រាបជូនបងប្អូនប្រជាពលរដ្ឋទាំងអស់ ជាពិសេសអ្នករស់នៅតាមដងស្ទឹង ស្ទឹងសង្កែ និងតំបន់ទំនាបក្នុងស្រុករតនមណ្ឌល មេត្តាជ្រាបថា គិតត្រឹមម៉ោង៦:១០ នាទីព្រឹក ថ្ងៃទី១៣ ខែកក្កដា ឆ្នាំ២០២៦ ស្ថានភាពទឹកស្ទឹងក្នុងស្រុករតនមណ្ឌលមានការកើនឡើង ។
រដ្ឋបាលស្រុករតនមណ្ឌល ខេត្តបាត់ដំបងបានបន្តថា ជាមួយគ្នានេះ បានបើកទ្វារទឹកនៃទំនប់ពហុបំណងបាត់ដំបង (សេកសក) ចំនួន ៣ ទ្វារ ដោយលើកកម្ពស់ទ្វារទឹក ១ ម៉ែត្រ ។
សូមបងប្អូនប្រជាពលរដ្ឋទាំងអស់ បន្តតាមដានព័ត៌មានជាប្រចាំ និងបង្កើនការប្រុងប្រយ័ត្នខ្ពស់ ចំពោះសុវត្ថិភាពមនុស្សចាស់ កុមារ និងទ្រព្យសម្បត្តិ ព្រមទាំងជៀសវាងការចុះលេងទឹក ឬឆ្លងកាត់តំបន់ដែលមានចរន្តទឹកហូរខ្លាំង ។ សូមត្រៀមខ្លួនជាស្រេចក្នុងការផ្លាស់ទីទៅកាន់ទីទួលសុវត្ថិភាព ប្រសិនបើស្ថានភាពទឹកបន្តកើនឡើង៕
ចែករំលែកព័តមាននេះ