ទីក្រុងប៉េកាំង៖ ខ្យល់ព្យុះបាវីដែលមានកម្លាំងបោកបក់ខ្លាំងបំផុតនៅប្រទេសចិនសម្រាប់ឆ្នាំនេះបានបង្កជាភ្លៀងធ្លាក់ខ្លាំងនៅតំបន់ខាងកើត និងមានខ្យល់កន្ត្រាក់នៅទីក្រុងដែលមានមនុស្សរស់នៅច្រើនៗ។ នេះជាវិញ្ញាសាសាកល្បងសមត្ថភាពរបស់ចិនក្នុងការទប់ទល់នឹងបញ្ហាអាកាសធាតុដ៏គ្រោះថ្នាក់។ គិតត្រឹមព្រឹកនេះ ខ្យល់ព្យុះបាវីថមថយកម្លាំងបោកបក់បន្តិចវិញក្លាយទៅជាព្យុះត្រូពិចនៅពេលវាបក់ទៅដល់តំបន់ដីគោក។ ប៉ុន្តែក្រុមអ្នកឧតុនិយមព្រមានថាខ្យល់ព្យុះដែលមានវិជ្ឈមាត្រប៉ុនប្រទេសបារាំងនោះអាចនឹងបង្កជាភ្លៀងធ្លាក់ខ្លាំងនៅទូទាំងតំបន់ខាងកើត និងខាងជើងនៃប្រទេសចិននារយៈពេលប៉ុន្មានថ្ងៃខាងមុខ។ ហេតុនេះ អាជ្ញាធរបានជម្លៀសមនុស្សជាង២,៨លាននាក់ចេញពីមុខខ្យល់ព្យុះ។ រហូតមកដល់ពេលនេះ មិនទាន់មានសេចក្ដីរាយការណ៍ថាមានករណីស្លាប់ ឬរបួសនៅឡើយទេ។
នៅក្នុងចំណោមអ្នកជម្លៀសទាំងនោះ ប្រជាជនជាង២,២លាននាក់រស់នៅខេត្តសឺជាំង។ ខ្យល់ព្យុះបាវីបក់ទៅដល់ទីក្រុងយូហួន នៃខេត្តសឺជាំងនៅវេលាម៉ោង១១:២០យប់ថ្ងៃសៅរ៍។ បន្ទាប់មក ខ្យល់ព្យុះក៏បក់ទៅដល់តំបន់ដីគោកនៃទីក្រុងវេនចូវនៅពាក់កណ្ដាលអធ្រាត្រ។ ជនជាតិចិនម្នាក់ប្រាប់ថាខ្យល់នេះមានកម្លាំងបោកបក់ខ្លាំងណាស់។ យើងអាចស្ដាប់ឮសំឡេងក្បឿងរណ្ដំគ្នា និងឃើញដើមឈើបាក់មែកធ្លាក់មកក្រោមទាំងផ្ទាំងៗ។ ជាការពិត យើងមានអារម្មណ៍ភ័យខ្លាច។ ប៉ុន្តែដោយសារយើងជាអ្នករស់នៅតំបន់មាត់សមុទ្រ ដូច្នេះយើងស៊ំានឹងទិដ្ឋភាពទាំងអស់នេះ។ នៅទីក្រុងរណបយូជីង ដើមឈើជាង១៣០០ដើមបានបាក់រលំ។ ក្នុងនោះ ជាង៧០០ដើមត្រូវគាស់រលើងទាំងឫស។ នេះបើយោងតាមការផ្សាយរបស់ទូរទស្សន៍រដ្ឋ ស៊ីស៊ីធីវី។
បុគ្គលិកជួយសង្គ្រោះនៅថ្ងៃនេះបានបញ្ជូនគ្រឿងចក្រប្រភេទអេស្កាវ៉ាទ័រ និងរណាយន្តដើម្បីកាត់ផ្ដាច់ដើមឈើដែលបាក់នៅលើដងវិថីនានា។ នៅតំបន់ភ្នំនៃទីក្រុងរណបដដែលនេះ គេឃើញមានការបាក់ដីមួយផ្ទាំងធំគ្របសង្កត់ពីលើផ្លូវ និងឃើញទឹកទន្លេហក់ឡើងខ្លាំងរហូតដល់លិចចុងឈើ។ នៅកាន់មឹន (Kanmen) ដែលជាទីក្រុងមាត់សមុទ្រ និងជាតំបន់នេសាទ ម្ចាស់ហាងម្នាក់វ័យ៧២ឆ្នាំឈ្មោះលីនយ៉ុងជីនកំពុងបូកសរុបតួលេខនៃការខាតបង់ដោយសារខ្យល់ព្យុះបាវី។ ហាងរបស់គាត់ដែលស្ថិតនៅជាប់នឹងមាត់សមុទ្របានទទួលរងការវាយប្រហារពីខ្យល់ព្យុះនេះយ៉ាងពេញទំហឹង។ នៅពេលខ្យល់ព្យុះបក់ទៅដល់តំបន់មាត់សមុទ្រ គាត់មិនអាចធ្វើអ្វីដើម្បីទប់ទល់នឹងព្យុះនេះបានទេ។ ទឹកភ្លៀងធ្លាក់ឥតឈប់ចូលទៅក្នុងផ្ទះ។ ពួកគាត់គ្មានបានដេកពួនរហូតដល់ម៉ោង៥ទៀបភ្លឺ។
ខ្យល់ព្យុះបាវីបានបក់កាត់កោះតៃវ៉ាន់ភាគខាងជើងកាលពីម្សិលមិញដោយពាំនាំទៅជាមួយនូវខ្យល់កន្ត្រាក់ខ្លាំងៗ និងការធ្លាក់ភ្លៀងនៅតំបន់ភាគច្រើននៃកោះនេះ។ តំបន់ភាគខាងជើងទទួលបានរបបទឹកភ្លៀង៨០០មិល្លីម៉ែត្រ។ នាយកដ្ឋានអគ្គិភ័យតៃវ៉ាន់ថ្លែងថានៅថ្ងៃនេះ មនុស្ស១៣៤នាក់រងរបួសដោយសារការដួលម៉ូតូ, ការរអិលជើងដួល និងការរងរបួសដោយសារវត្ថុនានាធ្លាក់ចំពួកគេ។ ប៉ុន្តែគ្មានមនុស្សស្លាប់ទេ។ ក្រសួងដឹកជញ្ជូនតៃវ៉ាន់ប្រកាសថាជើងហោះហើរអន្តរជាតិ១៣៧ខ្សែត្រូវបានលុបចោល ខណៈដែលជើងហោះហើរក្នុងស្រុក៦២ខ្សែក៏ត្រូវបានលុបចោលផងដែរ។ នៅខេត្តសឺជាំង ប្រទេសចិន ស្ថានីយរថភ្លើង២កន្លែងបានផ្អាកសេវាដឹកជញ្ជូនទាំងស្រុង។ ចំណែកជើងហោះហើរ៣២៧ខ្សែក៏ត្រូវបានលុបចោលផងដែរនៅអាកាសយានដ្ឋានអន្តរជាតិស៊ាវសាន។ នៅទីក្រុងសៀងហៃ គម្រោងធ្វើដំណើរតាមរថភ្លើងសរុប១៦២០ខ្សែត្រូវលុបចោល, ជើងហោះហើរ៦៨៤ខ្សែត្រូវលុបចោល៕ ប្រភព៖ Reuters
ចែករំលែកព័តមាននេះ