ប្រកាសផ្អាកទទួលភ្ញៀវទេសចរមកកម្សាន្តនៅឃុំដងពែង ស្រុកស្រែអំបិល ចាប់ពីថ្ងៃនេះតទៅ រហូតមានការជូនដំណឹងថ្មី
- កោះកុង
ខេត្តកោះកុង ៖ ដើម្បីធានាសុវត្ថិភាពសណ្តាប់ធ្នាប់ អាជ្ញាធរស្រុកស្រែអំបិល ជូនដំណឹងផ្អាកទទួលភ្ញៀវទេសចរមកលម្ហែកាយនៅឃុំដងពែង ជាបណ្តោះអាសន្ន ។
ជាក់ស្តេងបើយោងតាមផេកអធិការដ្ឋាន ន.ប ស្រុកស្រែអំបិល បានប្រកាសនារសៀលថ្ងៃទី១២ ខែកក្កដានេះថា ៖ អធិការដ្ឋាននគរបាលស្រុកស្រែអំបិល សូមជម្រាបជូនដល់ភ្ញៀវទេសចរណ៍ ដែលមកកម្សាន្តក្នុងមូលដ្ឋានឃុំដងពែង ស្រុកស្រែអំបិល ខេត្តកោះកុង ដើម្បីធានាសុវត្ថិភាព សន្តិសុខ សណ្តាប់ធ្នាប់សាធារណៈ និងការពារផលប្រយោជន៍រួម អាជ្ញាធរមានសមត្ថកិច្ច សូមជម្រាបជូនដំណឹងដល់ប្រជាពលរដ្ឋ ភ្ញៀវទេសចរជាតិ និងអន្តរជាតិ ព្រមទាំងម្ចាស់អាជីវកម្មទេសចរណ៍ទាំងអស់ ឱ្យបានជ្រាបថា ការទទួលភ្ញៀវទេសចរមកកម្សាន្តក្នុងមូលដ្ឋានឃុំដងពែង ស្រុកស្រែអំបិល ខេត្តកោះកុង ត្រូវបានផ្អាកជាបណ្ដោះអាសន្ន ចាប់ពីថ្ងៃជូនដំណឹងនេះតទៅ រហូតដល់មានសេចក្ដីជូនដំណឹងជាថ្មី ។
ក្នុងអំឡុងពេលផ្អាកនេះ សូមសាធារណជន និងភ្ញៀវទេសចរទាំងអស់ មេត្តកុំធ្វើដំណើរមកកម្សាន្តក្នុងតំបន់ខាងលើ និងសូមចូលរួមអនុវត្តតាមការណែនាំរបស់អាជ្ញាធរមានសមត្ថកិច្ចឱ្យបានខ្ជាប់ខ្ជួន ៕
ចែករំលែកព័តមាននេះ