ទីក្រុងប៉េកាំង៖ អាជ្ញាធរចិនជម្លៀសមនុស្សជាង១,៨លាននាក់ចេញពីតំបន់គ្រោះថ្នាក់នៅពេលខ្យល់ព្យុះបាវីចាប់ផ្ដើមបោកបក់ទៅរកទីក្រុងវេនចូវ (Wenzhou) បន្ទាប់ពីបក់ទៅលើប្រជុំកោះសាគីស៊ីម៉ា (Sakishima) របស់ជប៉ុន បង្កជាភ្លៀងលាយខ្យល់កន្ត្រាក់យ៉ាងខ្លាំង និងបន្ទាប់ពីបក់ទៅលើកោះតៃវ៉ាន់ភាគខាងជើង។ ទោះបីខ្យល់ព្យុះបង្អន់ល្បឿនបន្តិចមែន ប៉ុន្តែវានៅតែជាគ្រោះថ្នាក់ព្រោះវាមានទំហំធំ និងពោរពេញដោយសំណើម។ បើគិតពីជ្រុងម្ខាងនៃព្យុះទៅជ្រុងម្ខាងទៀតគឺប៉ុនប្រទេសបារាំងទាំងមូល។
បាវីមានល្បឿនខ្យល់បក់ជាមធ្យម១៤៤គីឡូម៉ែត្រក្នុងមួយម៉ោង និងស្ថិតនៅចម្ងាយ២០០គីឡូម៉ែត្រភាគអាគ្នេយ៍ទីក្រុងវេនលីង (Wenling) ខេត្តសឺជាំង។ ផ្នែកឧតុនិយមព្យាករថាបាវីនឹងបក់ទៅដល់តំបន់ដីគោកនៃទីក្រុងវេនចូវនៅព្រឹកថ្ងៃអាទិត្យ។ ទីនេះមានប្រជាជនរស់នៅដប់លាននាក់។ សារព័ត៌មានរបស់រដ្ឋចិនផ្សាយថាប្រជាជនជាង១,៧លាននាក់នៅខេត្តសឺជាំងត្រូវបានជម្លៀសទៅរកទីកន្លែងសុវត្ថិភាព។ ចំណែកនៅខេត្តហ្វ៊ូជៀន មនុស្សជាង១សែននាក់ក៏បានជម្លៀសខ្លួនផងដែរ។
អ្នករស់នៅទីក្រុងវេនចូវម្នាក់ឈ្មោះហួងស៊ីងហួន វ័យ៥០ឆ្នាំ ប្រាប់ថាគាត់មានចិត្តព្រួយបារម្ភតិចៗដែរ ប៉ុន្តែសង្ឃឹមថាអ្វីៗនឹងមិនមានបញ្ហាទៅចុះ។ យើងធ្លាប់ឆ្លងកាត់ខ្យល់ព្យុះជាច្រើនដងរួចមកហើយ។ យើងនឹងរួចផុតពីខ្យល់ព្យុះលើកនេះ។ ឥឡូវនេះ គាត់កំពុងដើរទិញគ្រឿងឧបភោគបរិភោគដើម្បីបម្រុងទុកនៅអំឡុងពេលមានខ្យល់ព្យុះ។ លោកហួងប្រាប់ថាគ្រួសាររបស់គាត់បានស្តុកទុកនូវទឹកស្អាតសម្រាប់ប្រើប្រាស់ពីពីរទៅបីថ្ងៃ។ ដូច្នេះ ការបម្រុងទុកប៉ុណ្ណឹងគឺអាចធានាថាមិនមានការខ្វះខាតទេ។
រហូតមកដល់ពេលនេះ ទាំងប្រទេសជប៉ុន និងកោះតៃវ៉ាន់មិនទាន់មានអ្នកស្លាប់ដោយសារខ្យល់ព្យុះនេះទេ។ ប៉ុន្តែនៅហ្វ៊ីលីពីនមនុស្សស្លាប់យ៉ាងតិច១៧នាក់ និងបាត់ខ្លួនជាច្រើននាក់ទៀតបន្ទាប់ពីមានភ្លៀងធ្លាក់ខ្លាំងជាច្រើនមេជាប់ៗគ្នាធ្វើឱ្យបាក់ដីនៅភាគនិរតី។ នាយកដ្ឋានអគ្គិភ័យនៅកោះតៃវ៉ាន់ថ្លែងថាមនុស្ស៨៧នាក់រងរបួស។ ភាគច្រើនរងរបួសដោយសារការដួលម៉ូតូ ឬកង់។ ក្រៅពីនេះ អ្នកខ្លះរងរបួសដោយសារដួល ឬមានរបស់របរផ្សេងៗធ្លាក់ពីលើ។ នៅតៃវ៉ាន់ដដែល អាជ្ញាធរជម្លៀសមនុស្សជាង១៤០០០នាក់ចេញពីតំបន់ភ្នំ។
តាមពិត ខ្យល់ព្យុះបាវីមិនបានបក់ទៅលើដីនៃកោះតៃវ៉ាន់ទេ។ ប៉ុន្តែរដ្ឋាភិបាលចង់ចាត់វិធានការបង្ការឱ្យបានហ្មត់ចត់ដើម្បីមិនឱ្យបាត់បង់អាយុជីវិតរបស់មនុស្សព្រោះផ្នែកឧតុនិយមព្យាករថានឹងមានភ្លៀងធ្លាក់ខ្លាំង ហើយធ្វើឱ្យកោះនេះទទួលបានរបបទឹកភ្លៀងរហូតដល់កម្ពស់មួយម៉ែត្រឯណោះ។ អ្នកជម្លៀសខ្លួនភាគច្រើនរស់នៅភាគខាងជើង និងភាគខាងកើត។ ជើងហោះហើរអន្តរជាតិ៩២០ខ្សែត្រូវបានលុបចោល។ ពេញមួយថ្ងៃសៅរ៍ ទីក្រុងនានាប្រកាសឈប់សម្រាក។ សាលារៀន និងកន្លែងធ្វើការនានាត្រូវផ្អាកសកម្មភាព ហើយអាចនឹងបន្តផ្អាកពេញមួយចុងសប្ដាហ៍នេះតែម្ដង។ នៅទីក្រុងតៃប៉ិបើទុកជាមានហាងលក់ទំនិញខ្លះបើកទ្វារ ក៏បើកត្រឹមតែបន្តិចបន្តួចប៉ុណ្ណោះ។ រថភ្លើងល្បឿនលឿនថ្វីដ្បិតនៅបើកដំណើរការជាធម្មតា ប៉ុន្តែកាត់បន្ថយសេវារបស់ខ្លួន៕ ប្រភព៖ Reuters
ចែករំលែកព័តមាននេះ