លោក គីម រិទ្ធី អភិបាល ខេត្តព្រះវិហារបានឱ្យដឹងថា ខេត្តព្រះវិហារដែលស្ថិតនៅភាគឧត្តរនៃព្រះរាជាណាចក្រកម្ពុជាមានកំណប់រ៉ែលោហៈសំខាន់ៗមួយចំនួន ។
លោកបានឲ្យដឹង នៅក្នុងអំឡុងពេល ខេត្តទទួលស្វាគមន៍វត្តមានសម្តេចតេជោ ហ៊ុន សែន ប្រធានព្រឹទ្ធសភា ដែលបានអញ្ជើញចុះជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរអង្គភាពនានាជុំវិញខេត្ត ប្រមាណជាង៨០០នាក់ ថា រ៉ែដែលមានដូចជារ៉ែមាស រ៉ែដែក និង រ៉ែលោហៈមានតម្លៃមួយចំនួនទៀត ។
លោកបានបន្តថា ក្នុងភូមិសាស្ត្រខេត្តមានធនធានរ៉ែសំខាន់ៗ ដែលមានអាជ្ញាបណ្ណធនធានរ៉ែ ៥អាជ្ញាបណ្ណ ស្មើនឹង៣ក្រុមហ៊ុន,អាជ្ញាបណ្ណអណ្តូងរ៉ែ និងការដ្ឋានវាយថ្ម១២អាជ្ញាបណ្ណស្មើនឹង១០ក្រុមហ៊ុន។
លោកបានបន្តថា ខេត្តដែលមានក្រឡាផ្ទៃ ប្រមាណជាង១៣ពាន់គីឡូម៉ែត្រក្រឡា បែងចែកជាក្រុង១ ស្រុក៧ ឃុំ៤៩ សង្កាត់៤៩ និងភូមិ២៣២ ខេត្តព្រះវិហារមានសម្បត្តិធនធានធម្មជាតិព្រៃឈើ និងប្រាសាទបុរាណជាច្រើន ក្នុងនោះមានប្រាសាទបុរាណដែលបានចុះក្នុងបញ្ជីបេតិកភណ្ឌពិភពលោកចំនួន២ គឺប្រាសាទព្រះវិហារ និងប្រាសាទកោះកេរ ។
ខេត្តព្រះវិហារនៅមានសក្តានុពល និងពឹងផ្អែកលើវិស័យកសិកម្ម ជាពិសេស គឺការជំរុញផលិតកម្មស្រូវសរីរាង្គដែលបានចងក្រងជាសហគមន៍កសិកម្មចំនួន ៤៧សហគមន៍ ដើម្បីចុះកិច្ចសន្យាទិញលក់ជាមួយក្រុមហ៊ុនសហគ្រាសចំនួន៩ក្រុមហ៊ុន ។ ក្រៅពីនេះខេត្តមានដាំដំណាំយុទ្ធសាស្ត្រសំខាន់ៗដូចជាស្វាយចន្ទីប្រមាណ៣ម៉ឺនហិកតា,ដំណាំស្វាយប្រមាណ៨ពាន់ហិកតា,ដំឡូងមីប្រមាណ៤ម៉ឺនហិកតា និងកៅស៊ូប្រមាណ៣ម៉ឺនហិកតា ដាំលក្ខណៈជាក្រុមហ៊ុនសម្បទានសេដ្ឋកិច្ចចំនួន១៥ក្រុមហ៊ុន និងលក្ខណៈជាគ្រួសារ ៕
ចែករំលែកព័តមាននេះ