រូបិយប័ណ្ណប្រាក់យ៉េនរបស់ជប៉ុនបានហក់ឡើងថ្លៃវិញនៅថ្ងៃសុក្រនេះ បន្ទាប់ពីមានព័ត៌មានថា ប្រទេសជប៉ុនមានគម្រោងលើកទឹកចិត្តដល់មូលនិធិសោធននិវត្តន៍ឱ្យបង្កើនការវិនិយោគលើទ្រព្យសកម្មហិរញ្ញវត្ថុក្នុងស្រុក ។ នេះបើយោងតាមការផ្សាយរបស់ Reuters ។
អ្នកវិភាគយល់ថា ចលនាមួយនេះ អាចជួយទប់ទល់រូបិយប័ណ្ណយ៉េនដែលកំពុងធ្លាក់ថ្លៃ បានល្អជាងការប្រើប្រាស់វិធានការអន្តរាគមន៍ផ្ទាល់ពីធនាគារកណ្តាល ។ លោកស្រី Satsuki Katayama មន្ត្រីជាន់ខ្ពស់ផ្នែកហិរញ្ញវត្ថុរបស់ជប៉ុន បានមានប្រសាសន៍ថា រដ្ឋាភិបាលកំពុងបន្តរៀបចំវិធានការនានា ដែលក្នុងនោះរួមមានទាំងការជំរុញឱ្យ «មូលនិធិវិនិយោគសោធននិវត្តន៍រដ្ឋាភិបាល» (GPIF) ដែលជាមូលនិធិសោធននិវត្តន៍ធំជាងគេបំផុតមួយក្នុងពិភពលោក បង្កើនការវិនិយោគលើទ្រព្យសកម្មហិរញ្ញវត្ថុរបស់ជប៉ុនឱ្យបានកាន់តែច្រើន។
លោក Fabien Yip អ្នកវិភាគទីផ្សារនៅក្រុមហ៊ុន IG បានពន្យល់ថា «មូលនិធិសោធននិវត្តន៍នេះ មានទំហំធំធេងណាស់ ។ បច្ចុប្បន្ន ៥០% នៃកញ្ចប់ថវិកាយុទ្ធសាស្ត្ររបស់ពួកគេ គឺកំពុងវិនិយោគនៅបរទេស។ ដូចនេះ ការផ្លាស់ប្តូរទិសដៅមកវិញ ពិតជានឹងបង្កើតលំហូរទុនយ៉ាងច្រើនចូលទៅក្នុងទ្រព្យសកម្មក្នុងស្រុក ដែលវាជួយគាំទ្រទាំងដល់រូបិយប័ណ្ណជាតិ ទាំងទីផ្សារភាគហ៊ុន និងមូលបត្របំណុលរបស់ជប៉ុនផងដែរ។»
លោកបានបន្ថែមទៀតថា៖ «នៅក្នុងស្ថានភាពបច្ចុប្បន្ន ដែលប្រាក់យ៉េនបានធ្លាក់ចុះដល់កម្រិតទាបបំផុតក្នុងរយៈពេល៤០ឆ្នាំធៀបនឹងប្រាក់ដុល្លារ ហើយរដ្ឋាភិបាលក៏ហាក់ដូចជាអស់ជម្រើសក្នុងការទប់ទល់… ខ្ញុំគិតថា ការព្យាយាមដោះស្រាយបញ្ហានេះ តាមបែបជារចនាសម្ព័ន្ធ ឬជាមូលដ្ឋាន ដោយការបង្កើតលំហូរលុយចូលទៅក្នុងទ្រព្យសកម្មដែលមានតម្លៃជាប្រាក់យ៉េនកាន់តែច្រើននឹងអាចជួយគាំទ្រដល់រូបិយប័ណ្ណនេះបានក្នុងរយៈពេលវែង។»
ចែករំលែកព័តមាននេះ