ទីក្រុងមូស្គូ ៖ ប្រទេសរុស្ស៊ីបានហាមឃាត់ទាំងស្រុងលើការនាំចេញប្រេងម៉ាស៊ូត បន្ទាប់ពីការវាយប្រហារដោយដ្រូនរបស់អ៊ុយក្រែនលើបណ្តារោងចក្រចម្រាញ់របស់ខ្លួន បានបង្កឱ្យមានកង្វះខាតប្រេងឥន្ធនៈយ៉ាងខ្លាំង ខណៈទីផ្សារថាមពលសកលកំពុងត្រៀមខ្លួនប្រឈមមុខនឹងការរំខានបន្ថែមទៀតនៅច្រកសមុទ្រហ័រមូស (Hormuz)។ នេះបើតាមប្រភពពី CNN ចេញផ្សាយកាលពីថ្ងៃទី៩ ខែកក្កដា ឆ្នាំ២០២៦។
អនុនាយករដ្ឋមន្ត្រីរុស្ស៊ី លោក Alexander Novak បានប្រកាសអំពីការហាមឃាត់នេះ ក្នុងកិច្ចប្រជុំផ្សាយតាមកញ្ចក់ទូរទស្សន៍ រួមជាមួយលោកប្រធានាធិបតី Vladimir Putin ដោយបានបញ្ជាក់ថា ការសម្រេចចិត្តនេះ គឺមានបំណងបង្កើនការផ្គត់ផ្គង់ដល់ទីផ្សារក្នុងស្រុក។
រុស្ស៊ីបានដាក់ចេញការហាមឃាត់មួយផ្នែករួចទៅហើយ ដែលរារាំងការនាំចេញប្រេងទៅក្រៅប្រទេសដោយក្រុមហ៊ុនមិនមែនជាអ្នកផលិតផ្ទាល់។ លោកស្រី Natalia Losada អ្នកវិភាគជាន់ខ្ពស់ផ្នែកផលិតផលប្រេងនៅក្រុមហ៊ុន Energy Aspects បានពន្យល់ប្រាប់ CNN ថា ការហាមឃាត់ដែលប្រកាសកាលពីថ្ងៃពុធ បានពង្រីកការរឹតបន្តឹងនោះទៅដល់បណ្តាក្រុមហ៊ុនផលិត ដោយគ្របដណ្តប់លើទីផ្សារទាំងមូលតែម្តង។
កាលពីដើមសប្តាហ៍នេះ លោក Novak បានអះអាងថា ទីផ្សាររុស្ស៊ីត្រូវបានផ្គត់ផ្គង់យ៉ាងពេញលេញទាំងប្រេងម៉ាស៊ូត និងប្រេងសាំង បើទោះបីជាមានទិដ្ឋភាពរថយន្តអ្នកដំណើរ និងរថយន្តដឹកទំនិញតម្រង់ជួរយ៉ាងវែងនៅក្រៅបណ្តាស្ថានីយប្រេងឥន្ធនៈរបស់ប្រទេសមួយនេះយ៉ាងណាក៏ដោយ ដែលនេះបានបង្ហាញឱ្យឃើញកាន់តែច្បាស់នូវភាពជាក់ស្តែងនៃសង្គ្រាមជាង៤ឆ្នាំរបស់ខ្លួនជាមួយនឹងប្រទេសអ៊ុយក្រែន។
តាមការវិភាគរបស់ CNN នៅសប្តាហ៍នេះ ស្ទើរតែគ្រប់តំបន់ទាំងអស់របស់ប្រទេសរុស្ស៊ី នៅក្នុងចំណោម ៨៣ តំបន់ បានជួបប្រទះនឹងការខ្វះខាតប្រេងសាំង ឬរបាយការណ៍នៃការរអាក់រអួលក្នុងការផ្គត់ផ្គង់ ដោយបណ្តាស្ថានីយ៍ប្រេងឥន្ធនៈជាច្រើនបានដាក់កម្រិតលើការចាក់ប្រេង ហើយភាពតានតឹងរវាងអតិថិជនក៏កំពុងតែកើនឡើងខ្លាំងផងដែរ។ បើតាមប្រព័ន្ធផ្សព្វផ្សាយរុស្ស៊ីបានរាយការណ៍ថា មនុស្ស១ចំនួនត្រូវរង់ចាំរហូតដល់ ១៨ ម៉ោងនៅតាមបណ្តាស្ថានីយ៍ប្រេងឥន្ធនៈ។
ក្រឡេកទៅភាពតានតឹងនៃសង្គ្រាមវិញ បណ្តាដ្រូនរបស់អ៊ុយក្រែនក៏បានកំណត់គោលដៅលើបណ្តាទីតាំងស្តុកប្រេងឥន្ធនៈ និងថាមពលក្នុងតំបន់គ្រីមៀ (Crimea) ដែលរុស្ស៊ីបានកាត់យក កាលពីឆ្នាំ ២០១៤ ផងដែរ។ រូបភាពពីផ្កាយរណបរបស់អង្គការណាសា (NASA) ដែលត្រូវបានបង្ហោះដោយវិទ្យាស្ថានសម្រាប់ការសិក្សាអំពីសង្គ្រាម (ISW) នៅលើបណ្តាញសង្គម X បានបង្ហាញថា ពន្លឺភ្លើងអគ្គិសនីនៅពេលយប់ក្នុងតំបន់គ្រីមៀនាពេលបច្ចុប្បន្ន មានកម្រិតតិចជាងឆ្ងាយ បើធៀបទៅនឹងកាលពី១ឆ្នាំមុន៕
ចែករំលែកព័តមាននេះ