រាជធានីភ្នំពេញ ៖ កម្លាំងការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋានរាជធានីភ្នំពេញ សហការណ៍ជាមួយកម្លាំងអធិការដ្ឋាននគរបាលខណ្ឌពោធិ៍សែនជ័យ និងកម្លាំងប៉ុស្តិ៍នគរបាលរដ្ឋបាលសំរោងក្រោម បានឆ្មក់ចូលទៅបង្ក្រាបសង្វៀនជល់មាន់មួយកន្លែង ដែលបានបើកលេងដោយលួចលាក់នៅក្នុងផ្ទះតែម្ដង ។
ប្រតិបត្តិការនោះ បានធ្វើឡើងកាលពីវេលាម៉ោង១រសៀល ថ្ងៃទី០៩ ខែកក្កដា ឆ្នាំ២០២៦ នៅក្នុងផ្ទះមួយកន្លែង ដែលមានទីតាំងស្ថិតនៅក្នុងភូមិគោកព្រិច សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
នគរបាលបានប្រាប់ថា ទីតាំងសង្វៀនជល់មាមាន់ខាងលើ បានបើកលេងដោយលួចលាក់នៅក្នុងផ្ទះ ជាយូរមកហើយដែលម្ចាស់ទីតាំងនោះឈ្មោះយ៉ុម ហើយនៅមុនពេលឈានដល់ការចុះបង្ក្រាប គឺនគរបាលបានធ្វើការស្រាវជ្រាវ ក៏បានទទួលព័ត៌មានពីមហាជនល្អរាយការណ៍ប្រាប់ថា នៅក្នុងផ្ទះរបស់ឈ្មោះយ៉ុមនោះ មានបើកសង្វៀនជល់មាន់។ ក្រោយពីទទួលបានព័ត៌មានជាក់លាក់ កម្លាំងការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋានរាជធានីភ្នំពេញ សហការណ៍ជាមួយកម្លាំងអធិការរដ្ឋាននគរបាលខណ្ឌពោធិ៍សែនជ័យ និងកម្លាំងប៉ុស្តិ៍នគរបាលរដ្ឋបាលសំរោងក្រោម បានឆ្មក់ចូលទៅបង្ក្រាបតែម្ដង ។
នគរបាល បានប្រាប់ឲ្យដឹងបន្តទៀតថា នៅក្នុងពេលនោះដែរកម្លាំងនគរបាលខាងលើឃាត់ខ្លួនក្រុមអ្នកញៀនល្បែងបាបកម្មមួយនេះចំនួន១៣នាក់ រួមទាំងម៉ូតូចំនួន៦គ្រឿង មាន់គកមួយចំនួន ព្រមទាំងសម្ភារៈពាក់ព័ន្ធមួយចំនួនទៀតផងដែរ ។
បន្ទាប់មកនគរបាលបានបញ្ជូនទាំងមនុស្ស និងម៉ូតូ ព្រមទាំងវត្ថុតាងផ្សេងទៀតទៅកាន់ការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋានរាជធានីភ្នំពេញ ដើម្បីសាកសួរ និងកសាងសំណុំរឿងបញ្ជូនទៅសាលាដំបូងចាត់ការតាមច្បាប់ ៕
ចែករំលែកព័តមាននេះ