រាជធានីភ្នំពេញ ៖ ហាង«បាញ់ឆែវពិសេស សាខាទី២» បានធ្លាយទុយោហ្គាសឆាបឆេះយ៉ាងសន្ធោសន្ធៅ តែសំណាងល្អ ត្រូវបានសមត្ថកិច្ច ទៅអន្តរាគមន៍ បាញ់ពន្លត់ទាន់ ។
ហេតុការណ៍អគ្គិភ័យនេះបានកើតឡើងនៅវេលាម៉ោង០៤និង៣០នាទីល្ងាចថ្ងៃទី០៩ ខែកក្កដា ឆ្នាំ២០២៦ នៅចំណុចហាងបាញ់ឆែវពិសេស សាខាទី២ ដែលស្ថិតនៅតាមផ្លូវទន្លេសាបក្បែរ វត្តចាស់ ក្នុងភូមិទី១ សង្កាត់ជ្រោយចង្វារ ខណ្ឌជ្រោយចង្វាររាជធានីភ្នំពេញ ។
តាមសាក្សី បានអោយដឹងថា នៅមុនពេលកើតហេតុ ខណៈពេលដែលចុងភៅកំពុងចម្អិន ស្រាប់តែធ្លាយទុយោ ហ្គាសឆាបឆេះជាអណ្ដាតភ្លើងយ៉ាងសន្ធោសន្ធៅ បង្កឲ្យមានការភ្ញាក់ផ្អើលដល់ប្រជាពលរដ្ឋ និងអាជ្ញាធរទាក់ទងហៅរថយន្តពន្លត់អគ្គិភ័យចំនួន ២គ្រឿង ទៅអន្តរាគមន៍។ នៅក្នុងហេតុការណ៍នោះ នគរបាលជំនាញ នៃការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ បានបាញ់ពន្លត់ និងប្រើជំនាញ ដើម្បីបិទធុងហ្គាសហើយពន្លត់ទាន់ពេល ពុំបណ្ដាលឲ្យឆេះរាលដាលធ្ងន់ធ្ងរឡើយ ។
នៅវេលាម៉ោង១៧:០០នាទីល្ងាច ថ្ងៃខែឆ្នាំដដែល អគ្គិភ័យនេះត្រូវបានពន្លត់បានទាំងស្រុង ដោយប្រើប្រាស់រថយន្តការិយាល័យអគ្គិភ័យរាជធានីភ្នំពេញ ចំនួន ០២គ្រឿង បានប្រើប្រាស់ទឹកអស់ចំនួន ០២គ្រឿង ស្មើនឹង ១២ម៉ែត្រគូប៕
ចែករំលែកព័តមាននេះ