ទីក្រុងម៉ានីឡា៖ រដ្ឋមន្ត្រីការពារជាតិហ្វ៊ីលីពីនច្រានចោលនូវអ្វីដែលលោកហៅថាជាការអះអាងគ្មានមូលដ្ឋាន និងដ៏ឆ្កួតលលារបស់ក្រុមបញ្ញវន្តចិនបន្ទាប់ពីពួកគេនិយាយថាខេត្តនៅចុងខាងជើងបំផុតរបស់ខ្លួនជាទឹកដីរបស់ចិនទេ។ រដ្ឋមន្ត្រីរូបនេះចាត់ទុកការអះអាងនោះជាការគួរឱ្យព្រួយបារម្ភ និងបង្កបញ្ហាប្រឈម។ គេហទំព័ររបស់រដ្ឋាភិបាលចិនឈ្មោះជីឌីធូដេ (GDToday) បានចុះផ្សាយកាលពីថ្ងៃទី២ ខែកក្កដា ថាក្រុមបញ្ញវន្តចិនមកពីវិទ្យាស្ថាននានារួមទាំងសាកលវិទ្យាល័យណានជីងផងដែរបានលើកទឡ្ហីករណ៍នៅក្នុងពិធីតាំងពិព័រណ៍កាលពីថ្ងៃទី៣០ ខែមីនាថាខេត្តបាតាន (Batanes) ជាទឹកដីដែលលាតសន្ធឹងចេញពីកោះតៃវ៉ាន់។ ហេតុនេះ ពួកគេយល់ថាខេត្តនេះជាទឹកដីរបស់ចិន។
រហូតមកដល់ពេលនេះ ប្រទេសចិនមិនទានអនុម័តទទួលស្គាល់ជាផ្លូវការនូវការអះអាងនោះទេ។ ប៉ុន្តែពាក្យសម្ដីរបស់បញ្ញវន្តចិនអាចបន្ថែមបន្ទុកកាន់តែធ្ងន់ពីលើភាពតានតឹងដែលមានស្រាប់រវាងចិន និងហ្វ៊ីលីពីន។ ប្រទេសទាំង២កំពុងមានជម្លោះបូរណភាពទឹកដីពាក់ព័ន្ធនឹងប្រជុំកោះមួយចំនួននៅសមុទ្រចិនខាងត្បូង។ រដ្ឋមន្ត្រីការពារជាតិហ្វ៊ីលីពីន លោកជីលប៊ែតូ តេអូដូរ៉ូ (Gilberto Teodoro) ថ្លែងប្រាប់អ្នកសារព័ត៌មានថា «លោកនៅតែនិយាយអះអាងដដែលឡើងវិញថានេះជាចេតនាដែលគេបានរៀបចំទុកជាមុន»។
រដ្ឋមន្ត្រីរូបនេះថ្លែងបន្តទៀតថាមិនមានអ្វីពិបាកយល់ទេថានេះជាផ្នែកមួយនៃផែនការរបស់ពួកគេ (ចិន)។ លោកធ្លាប់និយាយរួចហើយថាចិនចង់គ្រប់គ្រងមហាសមុទ្រប៉ាស៊ីហ្វិចទាំងស្រុង។ ដូច្នេះ នៅពេលចេញពាក្យសម្ដីនេះមកទៀតវាច្បាស់ណាស់ថាអ្វីដែលលោកអះអាងនោះជារឿងត្រឹមត្រូវ។ លោកដាក់ជាសំណួរថាតើពួកគេនិយាយដូច្នេះដើម្បីអ្វី? យើងដឹងតាំងពីដំបូងដៃថានេះជាការអះអាងដែលគ្មានមូលដ្ឋាន គ្មានន័យខ្លឹមសារ ហើយមានចរិតឆ្កួតលលា។ រដ្ឋមន្ត្រីរូបនេះនិយាយត្រឹមត្រឹងហ្នឹងដោយមិនផ្ដល់សេចក្ដីពន្យល់លម្អិតទេ។ អ្នកសារព័ត៌មានព្យាយាមទាក់ទងទៅស្ថានទូតចិនប្រចាំទីក្រុងម៉ានីឡាដើម្បីស្នើសុំការឆ្លើយបំភ្លឺតបទៅនឹងការលើកឡើងរបស់រដ្ឋមន្ត្រីហ្វ៊ីលីពីនដែរ។ ប៉ុន្តែគ្មានចម្លើយតប។
សូមបញ្ជាក់ថាខេត្តបាតានមានមនុស្សរស់នៅ២ម៉ឺននាក់ និងស្ថិតនៅចម្ងាយ១៦០គីឡូម៉ែត្រភាគខាងត្បូងកោះតៃវ៉ាន់។ ទីនេះលាតសន្ធឹងតាមច្រកសមុទ្រលូហ្សន (Luzon) ដែលជាទីតាំងយុទ្ធសាស្ត្រដ៏សំខាន់មួយ និងជាច្រកតភ្ជាប់សមុទ្រចិនខាងត្បូង និងមហាសមុទ្រប៉ាស៊ីហ្វិច។ ទីនេះរឹតតែសំខាន់ខ្លាំងឡើងៗនៅក្នុងការរៀបចំផែនការថែរក្សាសន្តិសុខ ហើយក៏ជាកន្លែងធ្វើសមយុទ្ធយោធារួមគ្នារវាងហ្វ៊ីលីពីន និងអាមេរិកផងដែរ។
កាលពីមុននេះ ប្រទេសចិនបានប្រកាសដាក់ទណ្ឌកម្មលោកតេអូដូរ៉ូ (Teodoro) និងសាច់ញាតិជិតស្និទ្ធរបស់គាត់ពីបទប្រព្រឹត្តកំហុសដ៏ធ្ងន់ធ្ងរពាក់ព័ន្ធនឹងប្រទេសចិន។ ការលើកជាអំណះអំណាងរបស់ក្រុមបញ្ញវន្ដចិនដូចខាងលើនេះធ្វើឡើងបន្ទាប់ពីហ្វ៊ីលីពីន និងជប៉ុនប្រកាសកាលពីខែឧសភាថាពួកគេនឹងចាប់ផ្ដើមការចរចាគ្នាជាផ្លូវការទៅលើការកំណត់ព្រំដែនសមុទ្រនៃតំបន់សេដ្ឋកិច្ចផ្ដាច់មុខ និងតំបន់ជ្រោយទ្វីបស្របទៅតាមច្បាប់អន្តរជាតិ។ ចំណាត់ការនេះត្រូវប្រទេសចិនរិះគន់៕ ប្រភព៖ Reuters
ចែករំលែកព័តមាននេះ