ធនាគារអភិវឌ្ឍន៍អាស៊ី (ADB)បានអះអាងថា កំណើនសេដ្ឋកិច្ចកម្ពុជា នៅឆ្នាំ២០២៦នេះ ត្រូវបានបន្ថយ០,៤ភាគរយ មកនៅត្រឹម៤,១ភាគរយ ប៉ុន្តែទោះជាយ៉ាងណា ក៏ការព្យាករណ៍នេះប្រសើរជាការព្យាករណ៍ដែលចេញ ដោយមូលនិធិរូបិវត្ថុអន្តរជាតិ (IMF) ។
នៅក្នុងសេចក្តីប្រកាស ដែលចេញនៅថ្ងៃទី០៩ ខែកក្កដា ADB បានអះអាងថា ចំពេលមានវិបត្តិភូមិសាស្ត្រនយោបាយអវិជ្ជមាន និងការបិទព្រំដែនជាមួយប្រទេសថៃ រយៈពេលយូរ ការព្យាករណ៍កំណើនសម្រាប់ឆ្នាំ២០២៦ គឺរង្វង់៤,១ភាគរយ ហើយនៅក្នុងឆ្នាំ២០២៧ អាចឡើងដល់៤,៧ភាគរយ ។
កាលពីថ្ងៃម្សិលមិញ IMF បានបញ្ចប់ការវាយតម្លៃសេដ្ឋកិច្ចកម្ពុជា ប្រចាំឆ្នាំ២០២៦ ដោយព្យាករថា កំណើនសេដ្ឋកិច្ចកម្ពុជា នៅឆ្នាំ២០២៦ នឹងសម្រេចបានប្រមាណត្រឹមតែ៣ភាគរយ ដែលទាបជាងការរំពឹងទុកកន្លងមក ដោយសារតែសម្ពាធពីស្ថានភាពសេដ្ឋកិច្ចពិភពលោក និងហានិភ័យក្នុងស្រុក ។
យោងតាម IMF ការធ្លាក់ចុះនៃការព្យាករណ៍នេះ កើតឡើងដោយសារកត្តាមួយចំនួន រួមមានភាពមិនប្រាកដប្រជានៃសេដ្ឋកិច្ចសកល ការធ្លាក់ចុះនៃវិស័យទេសចរណ៍ ការបន្តទន់ខ្សោយនៃវិស័យអចលនទ្រព្យ និងសំណង់ ព្រមទាំងការកើនឡើងនៃថ្លៃថាមពល ដែលអាចប៉ះពាល់ដល់ការវិនិយោគ និងការប្រើប្រាស់ក្នុងស្រុក ៕
ចែករំលែកព័តមាននេះ