អន្តរជាតិ ៖ យោងតាមប្រភពពីកាសែត The Sun របស់ចក្រភពអង់គ្លេស កាលពីថ្ងៃទី៨ ខែកក្កដា ឆ្នាំ២០២៦ ដោយស្រង់របាយការណ៍ពីកាសែតប្រេស៊ីល Metropoles បានឱ្យដឹងថា បន្ទាប់ពីធ្លាក់ចេញពីព្រឹត្តិការណ៍ World Cup ឆ្នាំ២០២៦ រួចមក Danilo ត្រូវបានរាយការណ៍ថា គឺជាកីឡាករតែម្នាក់គត់ ដែលជិះយន្តហោះការក្រុមជម្រើសជាតិប្រេស៊ីលវិលត្រឡប់ទៅប្រទេសកំណើតវិញ ខណៈពេលដែលមិត្តរួមក្រុមរបស់កីឡាកររូបនេះបានទៅលំហែសម្រាកលំហែកាយដោយមធ្យោយបាយធ្វើដំណើររៀងខ្លួន។
ក្រុមសាំបាប្រេស៊ីលបានធ្លាក់ចេញពីព្រឹត្តិការណ៍ World Cup ឆ្នាំ២០២៦ ត្រឹមវគ្គ១៦ក្រុមចុងក្រោយយ៉ាងភ្ញាក់ផ្អើល និងត្រូវវិលត្រឡប់ទៅកាន់ទីក្រុងរីយ៉ូដឺចេណេរ៉ូ (Rio de Janeiro) វិញ ក្រោយចាញ់ក្រុមន័រវែសដោយលទ្ធផល ២-១ កាលពីថ្ងៃទី៦ ខែកក្កដា កន្លងទៅ។
យ៉ាងណាមិញ បើតាមរបាយការណ៍ប្រព័ន្ធផ្សព្វផ្សាយប្រេស៊ីល កីឡាករតែម្នាក់គត់ស្ថិតនៅក្នុងបញ្ជីកីឡាករទាំង ២៦ រូប ដែលបានជិះយន្តហោះនោះគឺ Danilo និងយ៉ាងហោចណាស់ក៏មានបុគ្គលិកក្រុមមួយចំនួន រួមទាំងសមាជិកនៃនាយកដ្ឋានវេជ្ជសាស្ត្រ និងសន្តិសុខរួមដំណើរជាមួយផងដែរ។
អ្នកផ្សេងទៀតត្រូវបានគេជឿជាក់ថាបានធ្វើដំណើរដោយយន្តហោះផ្សេងគ្នា ទៅសម្រាកលំហែកាយ បើមិននៅសហរដ្ឋអាមេរិក ក៏នៅកន្លែងផ្សេងទៀតដែរ។ Neymar បាននាំគ្រួសារទៅទីក្រុង Orlando, Endrick និងត្រូវបានគេប្រទះឃើញដើរលេងនៅរដ្ឋ New Jersey សហរដ្ឋអាមេរិក ហើយ Vinicius Junior បានហោះទៅកោះ Ibiza ដ៏ល្បីរបស់ប្រទេសអេស្ប៉ាញ។
ចំណែកលោកគ្រូបង្វឹក Carlo Ancelotti បានទៅសម្រាកលំហែនៅទីក្រុង Vancouver ប្រទេសកាណាដា ជាកន្លែងដែលលោក និងភរិយាជនជាតិកាណាដាមានផ្ទះ១ខ្នងនៅទីនោះ។ ចំពេលដែលអ្នកគាំទ្រជាច្រើនបានអំពាវនាវឱ្យដកគ្រូបង្វឹកសញ្ជាតិអ៊ីតាលីរូបនេះ ចេញពីតំណែង បន្ទាប់ពីន័រវែសបានបំផ្លាញក្តីស្រមៃដណ្តើមជើងឯក World Cup របស់ប្រេស៊ីលក្នុងវគ្គ១៦ក្រុមចុងក្រោយ។
គួរបញ្ជាក់ជូនថា Danilo អតីតខ្សែការពារស្តាំឆ្នើមរបស់ក្លិប Manchester City, Real Madrid និង Juventus ដែលបច្ចុប្បន្នកំពុងប្រកបអាជីពជាមួយក្លិប Flamengo រូបនេះ បានចាប់ផ្តើមលេងជាកីឡាករ១១នាក់ដំបូងឱ្យក្រុមប្រេស៊ីលចំនួន ៤ ប្រកួតក្នុងចំណោម ៥ ប្រកួតរបស់ពួកគេនៅព្រឹត្តិការណ៍ World Cup ឆ្នាំ២០២៦៕
ចែករំលែកព័តមាននេះ