កម្ពុជា និងសហព័ន្ធអេមីរ៉ាតអារ៉ាប់រួម បានកំពុងតែបន្តពិនិត្យវឌ្ឍនភាពកិច្ចសហប្រតិបត្តិការទេសចរណ៍ ការតភ្ជាប់ជើងហោះហើរត្រង់ និងសិក្សាពិនិត្យសំណើសុំការលើកលែងទិដ្ឋាការទេសចរណ៍ដែលស្នើដោយភាគី សហព័ន្ធអេមីរ៉ាតអារ៉ាប់រួម ដើម្បីជំរុញកំណើនភ្ញៀវទេសចរ ។ នេះបើតាមការបញ្ជាក់ដោយក្រសួងទេសចរណ៍ ។
សំណើរលើការលើកលែងទិដ្ឋាការនេះ ត្រូវបានលើកឡើងនៅពេលដែល លោក ហួត ហាក់ រដ្ឋមន្ត្រីក្រសួងទេសចរណ៍ បានជួបពិភាក្សាជាមួយនឹងលោក អូបៃ សាអ៊ីត អូបៃ ប៊ិនតារ៉េស អាដាហេរី ( Obaid Saeed Obaid Bintaresh Aldhaheri) ឯកអគ្គរាជទូតសហព័ន្ធអេមីរ៉ាតអារ៉ាប់រួម ប្រចាំកម្ពុជា និងសហការីនៅដើមសប្តាហ៍នេះ ។
កាលពីឆ្នាំ២០២៥ កម្ពុជាទទួលបានភ្ញៀវទេសចរអន្តរជាតិប្រមាណ៥,៦ លាននាក់ ក្នុងនោះមានភ្ញៀវមកពីតំបន់មជ្ឈិមបូព៌ាជិត៣.៥០០នាក់ ហើយក្នុងរយៈពេល៥ ខែដំបូងនៃឆ្នាំ២០២៦ កម្ពុជាទទួលបានភ្ញៀវទេសចរអន្តរជាតិជិត ១,៦ លាននាក់ ក្នុងនោះមានភ្ញៀវមកពីមជ្ឈិមបូព៌ាជាង១.២០០នាក់ ។
ពាក់ព័ន្ធការលើកលែងទិដ្ឋាការមកដល់ បច្ចុប្បន្នកម្ពុជាបានអនុវត្តការលើកលែងទិដ្ឋាការតែជាមួយនឹងសមាជិកអាស៊ាន ខណៈដែលចិនកំពុងតែអនុវត្តនៅក្នុងស្ថានភាពសាកល្បងនៅឡើយ ៕
ចែករំលែកព័តមាននេះ