រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រី បានបង្ហាញរូបថតមួយសន្លឹក សម័យឆ្នាំ១៩៩០ ដែលទើបទទួលបានពីអ្នកស្រាវជ្រាវ ។
សម្តេចតេជោបានសរសេរលើបណ្តាញសង្គមនៅយប់ថ្ងៃទី៤ ខែកក្តដា ឆ្នាំ២០២៦ថា ថ្ងៃនេះទទួលបានរូបថតមួយសន្លឹកទៀត ដែលអ្នកស្រាវជ្រាវបញ្ជាក់ថា ជារូបថតនៅថ្ងៃ១៥ មីនា ឆ្នាំ១៩៩០ នៅខេត្តបាត់ដំបង ដើម្បីពិនិត្យប្រព័ន្ធការពារក្រុងបាត់ដំបង ទប់ទល់ជាមួយការវាយលុករបស់ខ្មែរក្រហម ។
សម្តេចតេជោ លើកឡើងថា កាលនោះបង ប៊ូ ថង ប្រធានអគ្គស្នងការនយោបាយកងទ័ព នាពេលនោះ ជាអ្នកអមដំណើរ ។
សម្រាប់ខ្ញុំគិតថា រូបថតនេះ នៅខេត្តរតនគិរីវិញ ដែលកាលឆ្នាំ១៩៩០ ខ្ញុំទៅពិនិត្យការសាងសង់វារីអគ្គីសនីអូជុំ ដែលអមដំណើរដោយបង ប៊ូ ថង ដែលពេលនោះ ជាឧបនាយករដ្ឋមន្ត្រី និងជាប្រធានគណកម្មាធិការអភិវឌ្ឍភូមិភាគឥសាន្ត ។
សម្តេចអះអាងថា មានមូលហេតុ៣ ដែលខ្ញុំសំអាង ៖
១. គ្រប់រូបភាពដែលខ្ញុំចុះទៅទឹសសមរភូមិតែងប្រើឯកសណ្ឋានយោធា និងមានកាំភ្លើងក្រវ៉ាត់នៅចង្កេះ ។
២. បង ប៊ូ ថង ចេញពីរដ្ឋមន្ត្រីការពារឆ្នាំ១៩៨៨ ជំនួសដោយសម្តេចពិជ័យសេនា ទៀ បាញ់ និងចេញពីប្រធានអគ្គស្នងការនយោបាយឆ្នាំ១៩៨៩ ជំនួសដោយឯកឧត្តម ឯល វ៉ាន់សារ៉ាត ។ ម្យ៉ាងទៀតបង ប៊ូ ថង មិនដែលអមដំណើរខ្ញុំទៅគៀកសមរភូមិទេ ។
៣. សម្លៀកបំពាក់ខ្ញុំក្តី បង ប៊ូ ថង ក្តី និងអ្នករួមដំណើរ គឺជាប្រភេទសម្លៀកបំពាក់ចុះសួរសុខទុក្ខប្រជាជន ឬពិនិត្យការដ្ឋានសាងសង់។ ម្យ៉ាងទៀតរូបភាពខាងក្រោយមានទំនប់ និងដើមឫស្សី ដែលពេលនោះ ខ្ញុំបានដាក់ឈ្មោះទីនោះថា (ទំនប់អូជុំស្នេហ៍)។ ពេលនោះភរិយាខ្ញុំ និងភរិយាបង ប៊ូ ថង ធ្វើដំណើរ ។
សម្តេចតេជោ បានសូមបញ្ជាក់ថា ពេលនោះ ខ្ញុំធ្វើដំណើរ ៣ខេត្ត គឺមណ្ឌលគិរី រតនគិរី ស្ទឹងត្រែង ជាពេលវេលាដ៏លំបាកគ្មានផ្លូវគ្មានភ្លើងគ្មានអ្វីៗដូចសព្វថ្ងៃនេះទេ។ មកពីចរចារកសន្តិភាព នៅក្រៅប្រទេស ឆ្លៀតចុះទៅតាមខេត្តពិនិត្យសមរភូមិយោធា និងការអភិវឌ្ឍ ។
សម្តេចថា ដើម្បីកាន់តែច្បាស់សូមបងប្អូន ដែលដឹងរូបថតនេះ ជួយប្រាប់ផង ពិសេសអ្នកខេត្តរតនគិរី និងបាត់ដំបង ។
ខ្ញុំសូមបង្ហាញរូបភាពក្នុងឯកសណ្ឋានយោធា២សន្លឹក ក្នុងឆ្នាំ១៩៩០ ដើម្បីធ្វើការប្រៀបធៀប ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ