ប្រទេសវេណេស៊ុយអេឡា ៖ ពិតជារឿងអស្ចារ្យនឹកស្មានមិនដល់ ដែលក្រោយ៦ថ្ងៃនៃការរញ្ជួយដី២ស្ទើរដំណាលគ្នានៅប្រទេសវេណេស៊ុយអេឡា ក្រុមអ្នកជួយសង្គ្រោះហ្ស៊កដានីប្រកាសកាលពីថ្ងៃទី៣០ មិថុនា ពីការរកឃើញក្មេងម្នាក់អាយុ៣ឆ្នាំនៅរស់រានមានជីវិត ។ កុមាររូបនេះ ក្រោយរកឃើញត្រូវបានបញ្ជូនភ្លាមៗទៅកាន់មន្ទីរពេទ្យ ។
ការរញ្ជួយដីខ្លាំងទាំង២នោះ តាមតុល្យការថ្មី ចំនួនអ្នកស្លាប់បានកើនដល់យ៉ាងតិច១៩៤៣នាក់ និងអ្នករបួសជាង១០.០០០នាក់ ចំណែកមនុស្សច្រើនសិបពាន់នាក់បាត់ខ្លួន។ កាលពីថ្ងៃទី៣០ មិថុនា ប្រធានសភាជាតិវេណេស៊ុយអេឡា លោកហ្ស៊ករ៉ូឌ្រី
ហ្គេស បានរៀបរាប់លម្អិតថា ការរញ្ជួយដីកម្លាំង៧,២រីស្ទ័រនិង៧,៥រីស្ទ័រនោះ ជាការរញ្ជួយដីខ្លាំងបំផុតដែលប្រទេសលោកមិនធ្លាប់ជួបប្រទះ ចាប់តាំងពីជាង១សតវត្សមកហើយ។
ក្រៅពីអ្នកស្លាប់ ចំនួនអ្នករបួសឡើងដល់ជាង១០.៥០០នាក់ ។ លោកបន្តថា មនុស្សប្រមាណជា៣០.០០០នាក់ ស្ថិតក្នុងតំបន់កំពង់ផែ GUAIRA ដែលរងការបំផ្លាញធ្ងន់ធ្ងរដោយការរញ្ជួយដីទាំង២នោះ។ តាំងពីមានការរញ្ជួយដីនោះមក មនុស្ស៦៤៦១នាក់បានត្រូវជួយសង្គ្រោះ តែមនុស្សច្រើនសិបពាន់នាក់ (តាមអ.ស.បថា ៥០.០០០នាក់) នៅតែបាត់ខ្លួន។
យោងតាមពួកអ្នកជំនាញការថា រយៈពេល៧២ម៉ោង ដែលសង្ឃឹមរកឃើញអ្នកនៅរស់រានមានជីវិត ក្រោយការរញ្ជួយដីដែលកើតមានតាំងពីថ្ងៃទី២៧ មិថុនា មក ពិតជាមានតិចបំផុត ។ តាមបណ្ដារូបភាពផ្កាយរណបអង្គការNASA អាមេរិក វាយតម្លៃថា អគារប្រមាណជា៥៨.៨៧០ រងការបំផ្លាញ ឬ ខូចខាត។ ក្នុងរដ្ឋLA GUAIRA ភាគខាងជើងប្រទេសដែលរងការប៉ះពាល់ខ្លាំងជាងគេ ការខ្វះស្បៀងមានជាទូទៅ ហើយបណ្ដាសេវាកម្មមូលដ្ឋានរងការបំផ្លាញស្ទើរអស់ ។ បណ្ដាញគមនាគមន៍រងការកាត់ផ្ដាច់។
ភាពតានតឹងក្នុងផ្ទៃប្រជាជនមានការកើនឡើង ពេលដែលជំនួយបញ្ជូនមកមានកម្រិត។ ក្នុងស្ថានភាពសោកនាដកម្មអង្គការស្បៀងអាហារពិភពលោកPAM កាលពីថ្ងៃទី៣០មិថុនា បានអំពាវនាវរកជំនួយដំបូងចំនួន៥០លានដុល្លារ សម្រាប់ចិញ្ចឹមមនុស្ស៥០០.០០០នាក់ ក្នុងរយៈពេល៣ខែ ។ តាមអ.ស.បថា តាំងពីដើមឆ្នាំ២០២៦មកមនុស្សចំនួន៧,៩លាននាក់ត្រូវការជំនួយមនុស្សធម៌រួចហើយនៅវេណេស៊ុយអេឡា ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ