ទីក្រុងស៊ីដនី៖ ថ្ងៃនេះ នគរបាលអូស្ត្រាលីចាប់ខ្លួនបុគ្គលិករបស់ក្រុមហ៊ុនអាកាសចរណ៍ថៃម្នាក់ និងនាំខ្លួនទៅចោទប្រកាន់នៅមុខតុលាការពីបទនាំចូលគ្រឿងញៀនប្រភេទហេរ៉ូអ៊ីនទម្ងន់ជាងមួយគីឡូក្រាមពីប្រទេសថៃចូលទៅទីក្រុងមែលបឺន (Melbourne)។ ស្ត្រីវ័យ២៦ឆ្នាំម្នាក់នោះមានភារកិច្ចត្រូវធ្វើដំណើរតាមជើងហោះហើរអន្តរជាតិនៅពេលនាងទៅដល់អាកាសយានដ្ឋានទីក្រុងមែលបឺនកាលពីថ្ងៃព្រហស្បតិ៍។ ក្រោយមក នាងត្រូវបានចាប់ខ្លួនបន្ទាប់ពីបង្កការសង្ស័យនៅពេលត្រួតពិនិត្យឥវ៉ាន់។ នេះបើយោងតាមការបញ្ជាក់របស់នគរបាលសហព័ន្ធរបស់អូស្ត្រាលីដែលបង្ហោះលទ្ធផលស៊ើបអង្កេតរបស់ខ្លួននៅលើគេហទំព័រ។
នគរបាលថ្លែងបន្តទៀតថាការឆ្លុះកាំរស្មីអ៊ិច និងការត្រួតពិនិត្យផ្ទៀងផ្ទាត់នៅពេលក្រោយមកទៀតបង្ហាញថាគេបានរកឃើញម្សៅពណ៌សដែលលាក់ទុកនៅក្នុងកាបូបចំនួន១២។ លទ្ធផលធ្វើតេស្តបឋមបង្ហាញថានោះជាម្សៅហេរ៉ូអ៊ីន ដែលគិតជាទឹកប្រាក់នៅលើទីផ្សារងងឹតស្មើនឹងកន្លះលានដុល្លារអូស្ត្រាលី (៣,៤៥សែនដុល្លារអាមេរិក)។ រដ្ឋអាជ្ញាបានចោទប្រកាន់នារីថៃរូបនោះពីបទនាំចូល និងកាន់កាប់ដោយខុសច្បាប់នូវគ្រឿងញៀន។ ប្រសិនបើតុលាការរកឃើញកំហុសដូចការចោទប្រកាន់មែន នាងអាចនឹងជាប់ពន្ធនាគារ២៥ឆ្នាំ។ ប៉ុណ្ណឹងនៅធូរទេ បើនៅសិង្ហបុរីប្រហារជីវិតតែម្ដង។
សមត្ថកិច្ចនឹងនាំខ្លួននាងឡើងតុលាការទីក្រុងមែលបឺននៅខែកញ្ញាខាងមុខនេះ។ លោកស៊ីម៉ូន បាត់ឆឺ (Simone Butcher) ជាអគ្គស្នងការស្ដីទីនៃនគរបាលសហព័ន្ធរបស់អូស្ត្រាលីថ្លែងថាស្ថាប័ននេះនឹងបន្តកិច្ចខិតខំប្រឹងប្រែងរបស់ខ្លួនដោយឥតបន្ធូរដៃទេដើម្បីតាមប្រមាញ់បុគ្គលទាំងឡាយណាដែលឆ្លៀតឱកាសប្រើប្រាស់តួនាទី និងមុខតំណែងរបស់ខ្លួនដើម្បីរត់ពន្ធគ្រឿងញៀន។ នគរបាលអូស្ត្រាលីមិនបានបង្ហាញអត្តសញ្ញាណ និងឈ្មោះរបស់នារីជាប់ចោទខាងលើនេះទេ។ សូម្បីតែឈ្មោះក្រុមហ៊ុនអាកាសចរណ៍ដែលនាងធ្វើការក៏គេមិនបានបង្ហើបឱ្យដឹងដែរ។
ទោះជាយ៉ាងណាក្ដី ក្រុមហ៊ុនអាកាសចរណ៍ថៃអ៊ែវេ (Thai Airways) ប្រកាសជាចំហថានារីបាហុនិការបស់ខ្លួនម្នាក់ត្រូវសមត្ថកិច្ចចាប់ឃុំខ្លួននៅទីក្រុងមែលបឺន។ ក្រុមហ៊ុនប្រកាសបន្តទៀតថាខ្លួនកំពុងសហការយ៉ាងពេញទំហឹងជាមួយអាជ្ញាធរ។ ក្រុមហ៊ុនអះអាងថាខ្លួនមិនកាន់ជើងមនុស្សខូចទេប្រសិនបើសាមីខ្លួនពិតជាបានប្រព្រឹត្តកំហុសមែន ហើយខ្លួននឹងចាត់វិធានការយ៉ាងម៉ឺងម៉ាត់ចំពោះរឿងនេះ។ ក្រុមហ៊ុនសូមបញ្ជាក់ថារាល់បុគ្គលិកទាំងអស់បានដឹងឮរួចហើយអំពីការប្រកាន់វិន័យយ៉ាងតឹងរ៉ឹងបំផុតមិនឱ្យកាន់កាប់ នាំចូល នាំចេញ ឬជាប់ពាក់ព័ន្ធនឹងគ្រឿងញៀន ឬសារធាតុខុសច្បាប់នោះឡើយ។ ទន្ទឹមនឹងនោះ នៅក្នុងដំណាក់កាលនៃការជំនុំជម្រះក្ដីនេះ ក្រុមហ៊ុនក៏កំពុងសហការជាមួយអាជ្ញាធរពាក់ព័ន្ធដើម្បីធានាថាបុគ្គលិករបស់ខ្លួនដែលជាប់ចោទនោះទទួលបានសិទ្ធិជាមូលដ្ឋាន៕ ប្រភព៖ Channel News Asia
ចែករំលែកព័តមាននេះ