ទីក្រុងគូឡាឡាំពួរ៖ ប្រទេសម៉ាឡេស៊ីបន្តសុពលភាពនៃការស្វែងរកយន្តហោះដឹកអ្នកដំណើរឈ្មោះ MH370 ដែលបានបាត់ខ្លួនអស់រយៈពេលជាង១២ឆ្នាំមកហើយតាំងពីខែមីនា ឆ្នាំ២០១៤នៅតាមផ្លូវធ្វើដំណើរពីរាជធានីគូឡាឡាំពួរឆ្ពោះទៅទីក្រុងប៉េកាំង ប្រទេសចិន។ ខាងលើនេះជាការបញ្ជាក់របស់ក្រសួងដឹកជញ្ជូនម៉ាឡេស៊ី។ ក្រុមហ៊ុនដែលចុះកុងត្រាជាមួយរដ្ឋាភិបាលនៅក្នុងដំណើរស្វែងរកនេះឈ្មោះអូសឹន អ៊ីនហ្វ៊ីនីធី (Ocean Infinity) ទទួលបានសិទ្ធិស្វែងរក MH370 រយៈពេលមួយឆ្នាំជាបន្តទៀត។
យន្តហោះបូអ៊ីង៧៧៧ (Boeing 777) នោះដឹកអ្នកដំណើរសរុប២២៧ និងបុគ្គលិកក្រុមហ៊ុន១២នាក់។ កំពុងតែហោះហើរនៅលើអាកាសសុខៗ យន្តហោះស្រាប់តែបាត់ដានពីប្រព័ន្ធរ៉ាដាសម្រាប់កត់ត្រាការហោះហើរ ហើយក៏បានក្លាយជាអាថ៌កំបាំងដ៏ធំបំផុតនៅក្នុងវិស័យអាកាសចរណ៍។ កាលពីពេលកន្លងមក មានការរុករកយន្តហោះនេះជាហូរហែដោយប្រើប្រាស់ឧបករណ៍ដ៏ទាន់សម័យអាចមើលឃើញច្បាស់ចែសដល់បាតសមុទ្រ។ មានន័យថាប្រសិនបើយន្តហោះនេះស្ថិតនៅកន្លុកកន្លៀតណាក៏មិនអាចលាក់កំបាំងបានដែរ។ ប៉ុន្តែការរុករកទាំងនោះមិនទាន់ទទួលបានលទ្ធផលនៅឡើយទេ។
ក្រុមហ៊ុន Ocean Infinity ធ្លាប់បើកប្រតិបត្តិការស្វែងរកយន្តហោះនោះរហូតដល់ឆ្នាំ២០១៨។ កាលពីឆ្នាំ២០២៥ ក្រុហ៊ុនបានចុះកិច្ចសន្យាថ្មីជាមួយរាជរដ្ឋាភិបាលម៉ាឡេស៊ីដើម្បីបន្តកិច្ចការស្វែងរករបស់ខ្លួននៅលើផ្ទៃក្រឡាដី១៥០០០គីឡូម៉ែត្រការ៉េនៅក្នុងលក្ខខណ្ឌថាទាល់តែរកឃើញយន្តហោះនោះទើបម៉ាឡេស៊ីប្រគល់លុយ៧០លានដុល្លារទៅឱ្យ។ ការបន្តសុពលភាពស្វែងរកយន្តហោះនោះបើតាមការប្រកាសរបស់ក្រសួងដឹកជញ្ជូនម៉ាឡេស៊ី នឹងចាប់ផ្ដើមពីថ្ងៃទី១ ខែកក្កដាឆ្នាំនេះរហូតដល់ចុងខែមិថុនាឆ្នាំក្រោយ។
អាជ្ញាធរថ្លែងថាការសម្រេចចិត្តផ្ដល់សិទ្ធិស្វែងរកយន្តហោះនេះជាការបង្ហាញថារាជរដ្ឋាភិបាលម៉ាឡេស៊ីមានឆន្ទៈមោះមុតក្នុងការស្វែងរកការពិតនៅពីក្រោយហេតុការណ៍នេះ និងចង់ដឹងអំពីជោគវាសនារបស់អ្នកដំណើរនៅក្នុងយន្តហោះនោះ។ ការបន្ថែមពេលវេលាមួយឆ្នាំទៀតនេះគឺដើម្បីឱ្យក្រុមហ៊ុន Ocean Infinity ស្វែងរកនៅលើទីតាំងដែលនៅសល់ចំនួនជាង៧ពាន់គីឡូម៉ែត្រការ៉េទៀត៕ ប្រភព៖ Reuters និង The Independent
ចែករំលែកព័តមាននេះ