ឡានឡិចស៊ី បុ.ករះម៉ូតូ៣គ្រឿង របួ.សធ្ងន់ស្រាល៤នាក់
- ភ្នំពេញ
រាជធានីភ្នំពេញ ៖ ឧប្បត្តិហេតុគ្រោះថ្នាក់ចរាចរណ៍មួយបានកើតឡើង បណ្ដាលឲ្យមនុស្សប្រុស និងស្រីចំនួន៤នាក់របួសធ្ងន់និងស្រាល ដែលបង្កឡើងដោយរថយន្ត១គ្រឿងម៉ាកLEXUS LM350 បានបុករះម៉ូតូ៣គ្រឿង ។ ខណៈនោះបានបណ្ដាលឲ្យម៉ូតូ១គ្រឿងខ្ទាតចូលទៅក្រោមកង់រថយន្តដឹកប្រេង១គ្រឿងទៀតកិនរងការខូចខាតយ៉ាងដំណំ ហើយអ្នកបើកបររថយន្តបង្កបានរត់គេចខ្លួនបាត់ ។
ឧប្បត្តិហេតុខាងលើបានកើតឡើងកាលពីវេលាម៉ោង៦និង៣០នាទីព្រឹកថ្ងៃទី២៩ ខែមិថុនា ឆ្នាំ២០២៦ នៅតាមមផ្លូវបេតុងចូលវត្តភ្នៀត សិម្ពលី ស្ថិតនៅក្នុងភូមិស្រែរាជ្ជះ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
សមត្ថកិច្ចបានប្រាប់ឲ្យដឹងថា នៅវេលាកើតហេតុខាងលើរថយន្តបង្កម៉ាកLEXUS LM350 ពណ៍ខ្មៅ ពាក់ស្លាកលេខ ភ្នំពេញ 2CD-7781 ធ្វើដំណើរក្នុងទិសដៅពីកើតទៅលិចតាមផ្លូវបេតុងវត្តភ្នៀត ។ លុះពេលទៅដល់ត្រង់ចំណុចកើតហេតុ ពុំដឹងថាអ្នកបើកបើកវ៉ាជែង ឬក៏រវល់ងាកទៅណាទេ ដោយខ្វះការប្រុងប្រយ័ត្ន ក៏ស្រាប់តែជ្រុលទៅបុកម៉ូតូម៉ាកGTR-Spring ១គ្រឿងពណ៍ខ្មៅ ពាក់ស្លាកលេខភ្នំពេញ 1ME-3645 ដែលកំពុងបើកបរក្នុងទិសដៅបញ្ច្រាស់គ្នា ពីលិចទៅកើតបណ្ដាលឲ្យស្ត្រីអ្នកបើកម៉ូតូរងរបួសស្រាល ។
សមត្ថកិច្ចបានឲ្យបន្តថា បន្ទាប់មករថយន្តបង្កខាងលើបានបន្តទៅបុកម៉ូតូ១គ្រឿងទៀតម៉ាកហុងដាឌ្រីមសេ១២៥ ពណ៍ខ្មៅ ពាក់ស្លាកលេខសៀមរាប1AI-5354 ដឹកអីវាន់អនឡាញ ដែលកំពុងបើកបរស្របគ្នាជាមួយម៉ូតូម៉ាកTGR-Spring
។ បណ្ដាលឲ្យខ្ទាតចូលក្រោមកង់ដឹកប្រេងឥន្ធនៈ១គ្រឿង ម៉ាកហ៊ីយ៉ាន់ដាយ ពណ៍ទឹកប្រាក់ឆ្នូតខៀវ ពាក់ស្លាកលេខភ្នំពេញ3E-9895 ដែលបើកស្របគ្នា ហើយក៏ត្រូវរថយន្តដឹកប្រេងនោះកិនរងការខូចខាត រីឯបុរសអ្នកបើកម៉ូតូរងរបួសធ្ងន់ ។
សមត្ថកិច្ចខាងលើបានបញ្ជាក់ប្រាប់បន្ថែមថា ទោះបីជាបុកម៉ូតូ២គ្រឿងខាងលើជាបន្តបន្ទាប់ក៏ដោយ ក៏រថយន្តបង្កមិនបានឈប់ស្ងៀមឡើយ ហើយជ្រុលទៅបុកម៉ូតូ១គ្រឿងទៀតម៉ាកហុងដាឌ្រីមសេ១២៥ ពណ៍ខ្មៅ ពាក់ស្លាកលេខភ្នំពេញ1JR-6073 ។ ជិះដោយនារី២នាក់ ក្នុងទិសដៅស្របគ្នាជាមួយម៉ូតូម៉ាកGTR-Spring និងម៉ូតូហុងដាឌ្រីមដឹកអីវាន់អនឡាញនោះ បណ្ដាលឲ្យស្ត្រីដែលជាអ្នកជិះម៉ូតរបួសធ្ងន់១នាក់និងស្រាល១នាក់ ។
ក្រោយពេលកើតហេតុអ្នករបួសធ្ងន់២នាក់ត្រូវបានបញ្ជូនទៅសង្គ្រោះនៅមន្ទីរពេទ្យជាតិតេជោសន្តិភាព ចំណែកអ្នករបួសស្រាលបានទៅព្យាបាលនៅគ្លីនិកឯកជន ។ បន្ទាប់មកនគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញចុះវាស់វែងនិងនាំយករថយន្តនិងម៉ូតូទាំងអស់ទៅរក្សាទុករង់ចាំការដោះស្រាយនៅពេលក្រោយ ៕
ចែករំលែកព័តមាននេះ