រឿងក្រុមហ៊ុនបូមខ្សាច់ធ្វើឱ្យបា.ក់ដីស្រែ ប្រជាពលរដ្ឋជាច្រើនគ្រួសារតវ៉ា ព្រោះធ្វើឱ្យប៉ះពាល់ដីស្រែ និងដីលំនៅឋាន
- កំពង់ឆ្នាំង
ខេត្តកំពង់ឆ្នាំង ៖ ប្រជាពលរដ្ឋរស់នៅក្នុងភូមិព្រៃក្រោល ឃុំព្រៃមូល ស្រុករលាប្អៀរ ខេត្តកំពង់ឆ្នាំង ជាច្រើនគ្រួសារ នៅព្រឹកថ្ងៃទី ២៩ ខែមិថុនាឆ្នាំ ២០២៦ បាននាំគ្នា មកជួបជុំនៅសាលាឃុំព្រៃមូល ដើម្បីទាមទារឲ្យក្រុមហ៊ុនបូមខ្សាច់តាមអូរមួយកន្លែងនៅក្នុងមូលដ្ឋានរបស់ពួកគាត់ត្រូវបញ្ឈប់ជាបន្ទាន់ ព្រោះបានធ្វើឲ្យបាក់ដីស្រែ និងដីលំនៅឋានរបស់ពួកគាត់ចូលទៅក្នុងអូរ ធ្វើឲ្យប៉ះពាល់ការរស់នៅរបស់ពួកគាត់ ។ ផ្ទុយនឹងការចោទប្រកាន់ខាងលើម្ចាស់ក្រុមហ៊ុនបូមខ្សាច់បញ្ជាក់ថា ក្រុមហ៊ុនបូមខ្សាច់មានច្បាប់អនុញ្ញាតត្រឹមត្រូវ ។
សូមរំលឹកថា កាលពីថ្ងៃទី ២៨ ខែមិថុនា គឺមុនមួយថ្ងៃដែលគាត់មកសាលាឃុំព្រៃមូលនៅថ្ងៃនេះ ពួកគាត់បានតវ៉ាម្ដងហើយ ប៉ុន្តែមិនទាន់មានដំណោះស្រាយ ហើយពួកគាត់ទទួលដំណឹងថា ខាងរដ្ឋបាលស្រុករលាប្អៀរ និងចូលដោះស្រាយនៅព្រឹកនេះទើបពួកគាត់មកជុំគ្នា ។ ប្រជាពលរដ្ឋទាំងនោះ បានលើកឡើងថា ការដ្ឋានបូមខ្សាច់មួយកន្លែងដែលមានទីតាំងនៅចំណុចអូរតាទិត្យ ស្ថិតក្នុងភូមិ ឃុំខាងលើ បានធ្វើសកម្មភាពបូមខ្សាច់ជាច្រើនឆ្នាំមកហើយ ធ្វើអោយមានការបាក់ច្រាំងខូចខាតផ្លូវ ខូចខាតដល់ដីលំនៅថាន ស្រែចម្ការ ប៉ះពាល់ផលប្រយោជន៍ប្រជាពលរដ្ឋសងខាងអូរជាខ្លាំង ។ ដូចនេះពួកគាត់បានសំណូមពរអាជ្ញាធរជំនាញពាក់ព័ន្ធមេត្តាចុះពិនិត្យ ជួយអន្តរាគមន៍ ដោះស្រាយបញ្ហាប្រឈម និងកង្វល់របស់ប្រជាពលរដ្ឋដោយក្តីអនុគ្រោះ ។
ជុំវិញបញ្ហានេះម្ចាស់ការដ្ឋានបូមខ្សាច់ខាងលើបានបញ្ជាក់ថា ក្រុមហ៊ុនលោកមានអាជ្ញាប័ណ្ណត្រឹមត្រូវ មានការទទួលស្គាល់ពីជំនាញជាច្រើន មុននឹងអនុញ្ញាតឲ្យច្បាប់ក្រុមហ៊ុនរបស់លោកបូមខ្សាច់នៅទីនោះ នiងបានដំណើរការជាច្រើនឆ្នាំណាមកហើយ ។កន្លងមកទីតាំងដែលក្រុមហ៊ុនបូមខ្សាច់ គឺជាកន្លែងនរណាក៏អាចទៅយកខ្សាច់ទីនោះបានដែរ គ្មានច្បាប់ទម្លាប់ លុះពេលក្រុមហ៊ុនរបស់លោករត់ការច្បាប់បាន ពួកគាត់មិនអាចចូលបូមខ្សាច់អានាធិបតេយ្យបានទៀតទេ ព្រោះក្រុមហ៊ុនលោកមានអាជ្ញាប័ណ្ណបង់ពន្ធជូនរដ្ឋត្រឹមត្រូវ ។ ដែលនេះជាហេតុធ្វើឲ្យពួកគាត់ធ្លាប់បូមខ្សាច់នៅទីនោះមិនសប្បាយចិត្ត ។ប្រសិនបើមានការបាក់ដីបាក់ច្រាំងអូរធ្វើឲ្យប៉ះពាល់ប្រជាពលរដ្ឋពិតមែន ម្ល៉េះសមមេភូមិមេឃុំមិនព្រងើយកន្តើយក្នុងរឿងនោះទេ ។
ទោះយ៉ាងណា នេះជាការអះអាងរបស់ម្ចាស់ក្រុមហ៊ុនបូមខ្សាច់តែប៉ុណ្ណោះ ។ ដោយឡែក លោកស្រី ជា ហួ មេភូមិ ព្រៃក្រោល ឱ្យដឹងថាក្នុងនាមអាជ្ញាធរដែនដី លោកស្រីពុំមានសិទ្ធិសម្រេចអនុញ្ញាតឲ្យធ្វើនោះទេ មានតែអាជ្ញាធរជំនាញពាក់ព័ន្ធដូចជាមន្ទីរសុរិយោដី ធនធានទឹក ធនធានរ៉ែ និងបរិស្ថានប៉ុណ្ណោះដែលមានសិទ្ធិចេញអាជ្ញាប័ណ្ណឲ្យ ។ ក្នុងនោះលោកស្រីសំណូមពរឲ្យមន្ទីរសូរិយោដីចាប់ប្លង់អូរឲ្យបានច្បាស់លាស់ និងសំណូមពរឲ្យប្រជាពលរដ្ឋក្នុងភូមិមានសិទ្ធិអាស្រ័យផល និងសូមសំណូមពរដល់ក្រុមហ៊ុន និងប្រជាពលរដ្ឋ សូមកុំយកខ្សាច់ចម្ងាយ ២០០ ម៉ែត្រពីផ្នែកខាងលើស្ពាន និង ២០០ម៉ែត្រពីផ្នែកខាងក្រោមស្ពាន ។
លោក សេង វិចិត្រ អភិបាលស្រុករលាប្អៀរអោយដឹងថា ករណីវិវាទខាងលើលោកនឹងហៅអាជ្ញាធរជំនាញ ដើម្បីប្រជុំពិនិត្យមើលស្ថានភាពទំនាស់ខាងលើនៅសាលាឃុំព្រៃមូល មុនឈានដល់ការសម្រេចខុសត្រូវឲ្យបានច្បាស់លាស់ ៕
ព័ត៌៌មានបន្ថែមនឹងមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ