កូនប្រុសល្អម្ល៉េះ ! ខឹងម្តាយ.ជេ.រឲ្យតាមកាមេរ៉ាសុវត្ថិភាពនៅចំពោះមុខសង្សារនិងមិត្តភក្តិ ក៏វា.យកាមេរ៉ា និងគំរាមស.ម្លា.ប់.ម្តាយ
- កំពង់ស្ពឺ
ខេត្តកំពង់ស្ពឺ ៖ យុវជនម្នាក់ត្រូវបានកម្លាំងនគរបាលក្រុងច្បារមនធ្វើការឃាត់ខ្លួន តាមបណ្តឹងរបស់ម្តាយបង្កើត ព្រោះតែកូនប្រុសខ្លាចខូចកិត្តិយស សេចក្តីថ្លៃថ្នូរ ព្រោះតែម្ដាយបង្កើតជេរស្ដីថា ឱ្យខ្លួនតាមកាមេរ៉ាសុវត្ថិភាព គាប់ជួននៅចំពោះមុខសង្សារ និងមិត្តភក្តិទៀតផង ។ យុវជនជាកូនកើតចិត្តខឹងបានវាយបំផ្លិចបំផ្លាញកាមេរ៉ាសុវត្ថិភាពនឹងគំរាម កាប់សម្លាប់ម្ដាយថែមទៀតផង ដោយទ្រាំនិងទង្វើរបស់កូនលែងបាន ម្តាយក៏ដាច់ចិត្តប្តឹងសមត្ថកិច្ចតែម្តង។
នគរបាលក្រុងច្បារមនបាននិយាយឱ្យដឹងថា ដោយមានការបញ្ជាផ្ទាល់ពីលោកឧត្តមសេនីយ៍ទោ ឃឹម សុខខៃ ស្នងការនគរបាលខេត្តកំពង់ស្ពឺ លោកវរសេនីយ៍ទោ យ័ន្ត សង្ហារ អធិការដ្ឋាននគរបាលក្រុងច្បារមន ដឹកនាំផ្នែកយុត្តិធម៌ក្រុងច្បារមន សហការកម្លាំងប៉ុស្តិ៍នគរបាលសង្កាត់ស្វាយក្រវ៉ាន់បានធ្វើការឃាត់ខ្លួនជនសង្ស័យម្នាក់ កាលពីវេលាម៉ោង៣ និង៣០នាទីរសៀលថ្ងៃទី២៧ ខែមិថុនា ឆ្នាំ២០២៦ នៅចំណុចផ្ទះរបស់ជនរងគ្រោះ ស្ថិតនៅក្នុងភូមិត្រស់សាលា សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ។
នគរបាលក្រុងច្បារមនបានបន្តទៀតថា ការឃាត់ខ្លួនយុវជនម្នាក់ខាងលើនេះ យោងតាមពាក្យបណ្ដឹងរបស់ជនរងគ្រោះឈ្មោះ ផាន ចាន់ថន ភេទស្រី អាយុ៤៣ឆ្នាំ មុខរបរលក់ដូរ រស់នៅភូមិត្រស់សាលា សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ។ បានប្ដឹងចោទប្រកាន់ទៅលើឈ្មោះសេង ពិសិដ្ឋ ភេទប្រុស អាយុ១៧ឆ្នាំ រស់នៅក្នុងផ្ទះជាមួយគ្នា ( ត្រូវជាប្រុសកូនបង្កើត ) ដែលបានធ្វើសកម្មភាពយកដៃវាយកាមេរ៉ាសុវត្ថិភាព ដែលដាក់មុខផ្ទះ បណ្តាលឲ្យរងការខូចខាតទាំងស្រុងចំនួន១គ្រឿង និងឆាតតាមទូរស័ព្ទ និយាយគំរាមកា.ប់សម្លាប់ម្តាយថែមទៀតផង ។ ដោយទ្រាំនូវទង្វើរបស់កូនប្រុសលែងបាន ទើបស្ត្រីជាម្តាយបានរាយការណ៍ជូនសមត្ថកិច្ចតែម្ដង ។
នគរបាលក្រុងច្បារមនបានបន្ថែមទៀតថា ក្រោយពីបានទទួលពាក្យបណ្ដឹងពីម្តាយរួចមក កម្លាំងជំនាញផ្នែកនគរបាលយុត្តិធម៌ក្រុងច្បារមន បានសហការជាមួយកម្លាំងប៉ុស្តិ៍នគរបាលរដ្ឋបាលសង្កាត់ស្វាយក្រវ៉ាន់បានចុះដល់កន្លែងកើតហេតុធ្វើការឃាត់ខ្លួន យុវជនសង្ស័យ មានឈ្មោះសេង ពិសិដ្ឋ យកមកសាកសួរ ។
នៅចំពោះមុខសមត្ថកិច្ច យុវជនជាកូនបានឆ្លើយសារភាពថា ខ្លួនពិតជាបានធ្វើសកម្មភាព យកដៃវាយកាមេរ៉ាសុវត្ថិភាព និងឆាតតាមទូរស័ព្ទ និយាយគំរាមកាប់សម្លាប់ម្តាយខ្លួនឯង ពិតប្រាកដមែន ព្រោះតែម្តាយមិនទុកមុខមាត់ កិត្តិយសឱ្យរូបគេ ព្រោះតែម្តាយជេរស្ដីថា ឲ្យខ្លួនតាមកាមេរ៉ាសុវត្ថិភាព នៅចំពោះមុខសង្សារ និងមិត្តភក្តិទើបរូបគេទប់កំហឹងមិនបានធ្វើបែបនេះ ។
នគរបាលក្រុងច្បារមនបានបញ្ជាក់ថា ក្រោយឃាត់ខ្លួនយុវជនជាកូន រួមជាមួយនឹងវត្ថុតាងខាងលើ នគរបាលក្រុងច្បារមន បានកសាង សំណុំរឿង បញ្ជូន ទៅការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តកំពង់ស្ពឺដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ