រដ្ឋមន្ត្រីក្រសួងទេសចរណ៍៖ ជំរុញឱ្យសហគមន៍ចំបក់ ពង្រឹងសេវាកម្ម ពិនិត្យលើហេដ្ឋារចនាសម្ព័ន្ធ បដិសណ្ឋារកិច្ច និងសុវត្ថិភាពដើម្បីទទួលភ្ញៀវទេសចរ ក្នុងរដូវកាលបៃតង
- កំពង់ស្ពឺ
ខេត្តកំពង់ស្ពឺ៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ កាលពីថ្ងៃទី២៨ ខែមិថុនា ឆ្នាំ២០២៦ បានជំរុញឱ្យសហគមន៍ចំបក់ ពង្រឹងសេវាកម្ម ពិនិត្យលើហេដ្ឋារចនាសម្ព័ន្ធ បដិសណ្ឋារកិច្ច និងសុវត្ថិភាពដើម្បីទទួលភ្ញៀវទេសចរ ក្នុងរដូវកាលបៃតង (Green Season)។
ការលើកឡើងបែបនេះ ក្នុងឱកាសដែលឯកឧត្តមរដ្ឋមន្ត្រី អញ្ជើញចុះពិនិត្យ ជំរុញសក្តានុពល វាយតម្លៃការអភិវឌ្ឍន៍វិស័យទេសចរណ៍ធម្មជាតិ តំបន់សហគមន៍ទេសចរណ៍ទឹកធ្លាក់ចំបក់ ស្ថិតនៅក្នុងស្រុកភ្នំស្រួច ខេត្តកំពង់ស្ពឺ។
ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ដែលអមដំណើរដោយលោក ជាម ច័ន្ទសោភ័ណ អភិបាលភិបាលខេត្តកំពង់ស្ពឺ បានអញ្ជើញដឹកនាំប្រតិភូ ចុះត្រួតពិនិត្យផ្ទាល់នៅ តំបន់សហគមន៍ទេសចរណ៍ទឹកធ្លាក់ចំបក់ ស្ថិតនៅក្នុងឃុំចំបក់ ស្រុកភ្នំស្រួច ខេត្តកំពង់ស្ពឺ។
ក្នុងដំណើរចុះពិនិត្យនេះក្នុងគោលបំណងសំខាន់នៃដំណើរចុះពិនិត្យនេះរួមមាន៖ ជំរុញសក្តានុពល វាយតម្លៃការអភិវឌ្ឍន៍វិស័យទេសចរណ៍ធម្មជាតិ និងអេកូទេសចរណ៍ក្នុងតំបន់។ ពង្រឹងសេវាកម្ម ពិនិត្យលើហេដ្ឋារចនាសម្ព័ន្ធ បដិសណ្ឋារកិច្ច និងសុវត្ថិភាពដើម្បីទទួលភ្ញៀវទេសចរ ក្នុងរដូវកាលបៃតង (Green Season)គាំទ្រសហគមន៍ ជួបសំណេះសំណាល និងលើកទឹកចិត្តដល់បងប្អូនប្រជាសហគមន៍ផ្ទាល់ ក្នុងការចូលរួមថែរក្សាព្រៃឈើ និងបង្កើតចំណូលមូលដ្ឋាន។
គួរបញ្ជាក់ផងដែរថា៖ ទឹកធ្លាក់ចំបក់ នៅតែជាគោលដៅទេសចរណ៍ធម្មជាតិដ៏ទាក់ទាញ មិនអាចរំលងបានរបស់ខេត្តកំពង់ស្ពឺ ភ្ញៀវទេសចរជាតិ និងអន្តរជាតិ នឹងទទួលបានអារម្មណ៍ស្រស់ស្រាយជាមួយខ្យល់អាកាសបរិសុទ្ធ សម្រស់ព្រៃព្រឹក្សា និងទឹកធ្លាក់ត្រជាក់ស្រេប។
ទេសចរណ៍ធម្មជាតិទឹកធ្លាក់ចំបក់ គឺជាទឹកជ្រោះធម្មជាតិមួយកន្លែងដែលមានសម្រស់ទេសភាពស្អាត ជាទីទាក់ទាញភ្ញៀវទេសចរមកលេងកម្សាន្ត។ដោយសារតែមានទេសភាពព្រៃព្រឹក្សា នៅតាមដងផ្លូវពោរពេញដោយព្រៃឬស្សីដ៏ក្រាស់ឃ្មឹក ដែលជាម្លប់ដ៏ត្រជាក់សម្រាប់អ្នកដំណើរ ហើយមួយវិញទៀតលក្ខណៈពិសេសរបស់ទឹកធ្លាក់នេះគឺ មិនមានការកែច្នៃអ្វីនោះឡើយ ថែមទាំងបានទាក់ទាញភ្ញៀវទេសចរជាច្រើន ជាពិសេសគឺភ្ញៀវទេសចរបរទេស។ ក្រៅពីសក្តានុពលទេសចរណ៍ធម្មជាតិទឹកធ្លាក់ សហគមន៍ក៏មានសេវាម្ហូបអាហារ និងស្នាក់នៅសម្រាប់ភ្ញៀវទេសចរដែលមកលេងកំសាន្ត។
សហគមន៍ទេសចរណ៍ធម្មជាតិទឹកធ្លាក់ចំបក់ មានទីតាំងស្ថិតនៅ ឃុំចំបក់ ស្រុកភ្នំស្រួច ខេត្តកំពង់ស្ពឺ មានចម្ងាយប្រមាណ ១១០ គីឡូម៉ែត្រពី រាជធានីភ្នំពេញ។ ទឹកធ្លាក់ចំបក់មានព្រំប្រទល់ជាប់នឹងឧទ្យានជាតិគិរីរម្យផ្ទាល់តែម្តង។ នៅពេលដែលចូលដល់ផ្លូវចូលឧទ្យានជាតិគិរីរម្យហើយ ត្រូវធ្វើដំណើរបន្តប្រមាណ១០គីឡូម៉ែត្រ ទើបទៅដល់ទេសចរណ៍ធម្មជាតិមួយនេះ និងត្រូវធ្វើដំណើរថ្មើរជើងដើរកាត់ភ្នំជាងមួយគីឡូ ដើម្បីដល់ទឹកធ្លាក់ ការធ្វើដំណើរកាត់ព្រៃដែលមានតែសំឡេងសត្វយំឆ្លងឆ្លើយគ្នា លាយឡំដោយក្លិនបុប្ផាធម្មជាតិពិតជាធ្វើឲ្យអារម្មណ៍អ្នកទេសចរស្រស់ប្លែកពីការកម្សាន្តនានា៕
ចែករំលែកព័តមាននេះ