ក្រុងប៉ោយប៉ែត ៖ កាលពីព្រឹកថ្ងៃទី៥ កន្លងមកនេះ មន្ត្រីកាំកុងត្រូលសាខាខេត្តបន្ទាយមានជ័យ សហការជាមួយមន្ត្រីមន្ទីរពាណិជ្ជកម្មខេត្តនិងប៉ូលិសប្រឆាំង បទល្មើសសេដ្ឋកិច្ចខេត្តនិងក្រសួង បានចុះអង្កេតទំនិញនៅតាមផ្សារនានាក្នុងក្រុងប៉ោយប៉ែត ពិសេសនៅផ្សារត្រីហៅផ្សារអគ្គៈចាស់ ហើយ
ក្រុងប៉ោយប៉ែត ៖ កាលពីព្រឹកថ្ងៃទី៥ កន្លងមកនេះ មន្ត្រីកាំកុងត្រូលសាខាខេត្តបន្ទាយមានជ័យ សហការជាមួយមន្ត្រីមន្ទីរពាណិជ្ជកម្មខេត្តនិងប៉ូលិសប្រឆាំងបទល្មើសសេដ្ឋកិច្ចខេត្តនិងក្រសួង បានចុះអង្កេតទំនិញនៅតាមផ្សារនានាក្នុងក្រុងប៉ោយប៉ែត ពិសេសនៅផ្សារត្រីហៅផ្សារអគ្គៈចាស់ ហើយបានរកឃើញនិងដកហូតទំនិញហាមឃាត់មួយចំនួន ។
ទំនិញដែលត្រូវបានដកហូតរួមមានអំបិលគ្មានអ៊ីយ៉ូដចំនួន២៩៥គីឡូក្រាម កម្ទេចនំចម្រុះចំនួន២៦គីឡូក្រាម តំណាប់កន្ទួត១៥បន្ទះ ទឹកស៊ីរ៉ូមរូបមាន់១កេស មានចំនួន១២ដប ឡេលាយសម្រាប់លាបខ្លួនឱ្យសចំនួន២ប្រអប់ និងសម្ភារកែច្នៃឡេលាបចំនួន១ឈុត ព្រមទាំងទឹកបរិសុទ្ធម៉ាកណាមធីបចំនួន២០យួរតូច និង៤យួរធំ ។ លោកសាន វិជ្ជាសារ៉ាវុធ អនុប្រធានសាខាកាំកុងត្រូលខេត្តបានប្រាប់ថា ក្នុងការចុះអង្កេតទំនិញតាមផ្សារនេះក្រុមការងារចម្រុះអង្កេតបាន១៨តូប ក្នុងនោះបានធ្វើតេស្តលើសរសៃគុយទាវនិងនំបញ្ចុកចំនួន២តូប តូបលក់សាច់មាន់ស៊ុតមាន់ចំនួន៥តូប ពុំមានរកឃើញសាច់មាន់នាំចូលពីថៃមកលក់ទេ ព្រមទាំងហាងលក់គ្រឿងទេសចំនួន៥តូប ។
លោកសាន វិជ្ជាសារ៉ាវ៉ុធ បន្តថា ក្រោយពីការរឹបអូសទំនិញខូចគុណភាពនិងផលិតផលដែលច្បាប់ហាមឃាត់ សមត្ថកិច្ចកាំកុងត្រូលក៏បានធ្វើការព្រមានយ៉ាងតឹងរ៉ឹងដល់អាជីវករដោយបញ្ជាក់ថា បើថ្ងៃក្រោយមិនរាងចាលហើយនៅតែបន្តលក់ទំនិញដែលច្បាប់ហាមឃាត់ទៀតនឹងកសាងសំណុំរឿងប្តឹងទៅសាលាដំបូងខេត្ត ដើម្បីចាត់ការតាមនីតិវិធីច្បាប់ ។លោកបន្តទៀតថា ចំពោះអាជីវករដែលធ្វើការកែច្នៃឡេលាបស្បែកដោយខ្លួនឯង ក៏ខាងលោកនឹងអញ្ជើញមកធ្វើកំណត់ហេតុបំភ្លឺដែរនៅស្នាក់ការកាំកុងត្រូល។ លោកបន្តថា បើតាមព័ត៌មានផ្នែកសុខាភិបាលអាមេរិកបញ្ជាក់ថា ប្រភេទឡេលាបស្បែកដែលមានតម្លៃថោកហើយធ្វើឱ្យស្បែកឆាប់សគឺសម្បូរដោយជាតិបារ៉ត បើប្រើយូរទៅអាចស្លាប់កោសិកាស្បែកខ្មៅហើយបណ្តាលឱ្យកើតមហារីកស្បែកទៀតផង។
ចំពោះទំនិញទាំងអស់ក្រោយពីរឹបអូសត្រូវបានយកទៅរក្សាទុកនៅស្នាក់ការកាំកុងត្រូលដើម្បីចាត់ការតាមផ្លូវច្បាប់។ លោកសាន វិជ្ជាសារ៉ាវុធ ប្រាប់ថា ការចុះអង្កេតទំនិញនៅផ្សារនេះនឹងធ្វើគ្រប់ផ្សារទាំងអស់នៅក្នុងខេត្តទាំងមូលហើយការចុះអង្កេតនេះក៏ត្រូវសហការជាមួួយស្ថាប័នពាក់ព័ន្ធជានិច្ច ក្រោមការជំរុញនិងចង្អុលបង្ហាញឱ្យអនុវត្តពីលោកម៉ក់ ពេជ្ររិទ្ធ អគ្គនាយកនៃកាំកុងត្រូល ក៏ដូចជាលោកអ៊ុត សុភាព ប្រធានសាខាកាំកុងត្រូលខេត្ត៕
ចែករំលែកព័តមាននេះ