មន្ទីរព័ត៌មានខេត្តកំពង់ស្ពឺបន្តផ្សព្វផ្សាយយុទ្ធនាការនិយាយថាទេ ចំពោះព័ត៌មានក្លែងក្លាយ
- កំពង់ស្ពឺ
ខេត្តកំពង់ស្ពឺ ៖ ដើម្បីរួមចំណែកទប់ស្កាត់ព័ត៌មាន (ក្លែងក្លាយ) ព័ត៌មានមិនពិត ដែលអាចបង្កផលប៉ះពាល់ដល់សង្គម នៅពេលបច្ចុប្បន្នសម័យបច្ចេកវិទ្យាឌីជីថល ព័ត៌មានត្រូវបានផ្សព្វផ្សាយយ៉ាងឆាប់រហ័សតាមបណ្តាញសង្គមនានានោះ នៅព្រឹកថ្ងៃទី២៦ ខែមិថុនា ឆ្នាំ២០២៦ លោកស្រី ម៉ែន ស៊ីនួន ប្រធានមន្ទីរព័ត៌មានខេត្តកំពង់ស្ពឺ បានអញ្ជើញជាអធិបតីភាពក្នុងពិធីផ្សព្វ ផ្សាយយុទ្ធនាការ និយាយថាទេ ចំពោះព័ត៌មានក្លែងក្លាយ ជំហានទី២ នៅវិទ្យាល័យ ហ៊ុន សែន ចំបក់ ដោយមានការចូលរួមពីកងកម្លាំងទាំង៣ លោកគ្រូ អ្នកគ្រូ សិស្សានុសិស្ស និងអ្នកពាក់ព័ន្ធ សរុបប្រមាណ១,៣០០នាក់ ។
ក្នុងឱកាសផ្សព្វផ្សាយយុទ្ធនាការនេះ លោក មុត ភន អភិបាលស្រុកសំរោងទង បានលើកឡើងថា ក្នុងសម័យបច្ចេកវិទ្យាឌីជី
ថល ព័ត៌មានត្រូវបានផ្សព្វផ្សាយយ៉ាងឆាប់រហ័សតាមបណ្តាញសង្គម ដូច្នេះប្រជាពលរដ្ឋ ជាពិសេស យុវជន និងសិស្សា នុសិស្ស ត្រូវមានការយល់ដឹងក្នុងការត្រួតពិនិត្យប្រភពព័ត៌មានឱ្យបានច្បាស់លាស់ មុននឹងជឿ ឬចែករំលែកបន្ត ដើម្បីរួម ចំណែកទប់ស្កាត់ព័ត៌មានមិនពិតដែលអាចបង្កផលប៉ះពាល់ដល់សង្គម ។
ទន្ទឹមនឹងការលើកឡើងនេះ ការប្រើប្រាស់ព័ត៌មានប្រកបដោយការទទួលខុសត្រូវ គឺជាកត្តាសំខាន់ក្នុងការកសាងសង្គមដែលមានការយល់ដឹង និងប្រើប្រាស់បច្ចេកវិទ្យាប្រកបដោយសុវត្ថិភាព ។ សិស្សានុសិស្សគួរតែចេះជ្រើសរើសព័ត៌មានដែលមានប្រភពច្បាស់លាស់ និងមិនចែករំលែកព័ត៌មានដែលមិនទាន់បានផ្ទៀងផ្ទាត់ ។
លោកស្រី ម៉ែន ស៊ីនួន ប្រធានមន្ទីរព័ត៌មានខេត្តកំពង់ស្ពឺ មានប្រសាសន៍ថា យុទ្ធនាការ «និយាយថាទេ ចំពោះព័ត៌មានក្លែងក្លាយ» មានគោលបំណងលើកកម្ពស់ការយល់ដឹងរបស់សាធារណជន អំពីផលប៉ះពាល់នៃព័ត៌មានក្លែងក្លាយ និងជំរុញការចូលរួមរបស់គ្រប់ភាគីក្នុងការប្រឆាំងការផ្សព្វផ្សាយព័ត៌មានមិនពិត និងផ្តោតលើការអប់រំឱ្យប្រជាពលរដ្ឋចេះផ្ទៀងផ្ទាត់ប្រភពព័ត៌ មានមុនចែករំលែក បង្កើនសមត្ថភាពក្នុងការសម្គាល់ព័ត៌មានក្លែងក្លាយ និងជាពិសេស លើកទឹកចិត្តឱ្យចូលរួមផ្សព្វផ្សាយព័ត៌មានពិត ដើម្បីជាខែលយ៉ាងសំខាន់ទប់ស្កាត់ការរីករាលដាលព័ត៌មានមិនពិតតាមបណ្តាញសង្គម។
លោកស្រី ម៉ែន ស៊ីនួន ប្រធានមន្ទីរព័ត៌មានខេត្តកំពង់ស្ពឺបានបន្តឲ្យដឹងទៀតថា យុទ្ធនាការដ៏មានសារសំខាន់នេះ ក៏ជាឱកាសសម្រាប់ផ្តល់ចំណេះដឹងដល់សិស្សានុសិស្ស អំពីវិធីកំណត់អត្តសញ្ញាណព័ត៌មានក្លែងក្លាយ ការពិនិត្យប្រភពព័ត៌មាន និងការចូលរួមបង្កើតបរិយាកាសព័ត៌មានដែលមានភាពជឿជាក់ក្នុងសង្គមផងដែរ ។
លើសពីនេះ សិស្សានុសិស្សដែលបានឆ្លើយសំណួរត្រឹមត្រូវ នឹងទទួលបានកាដូអនុស្សាវរីយ៍ លើកទឹកចិត្តពាក់ព័ន្ធនឹងការយល់ដឹងអំពីព័ត៌មានក្លែងក្លាយ ដើម្បីវាស់ស្ទង់ការយល់ដឹងរបស់សិស្សានុសិស្សឱ្យបន្តសិក្សាស្វែងយល់អភិវឌ្ឍជំនាញគិត ពិចារណា និងចូលរួមផ្សព្វផ្សាយព័ត៌មានពិតប្រកបដោយការទទួលខុសត្រូវ ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ