រាជធានីភ្នំពេញ ៖ នាពេលថ្មីៗនេះ មានបុរសជនជាតិចិនម្នាក់ បានបង្ហោះវីដេអូតាមបណ្ដាញសង្គម ដោយថ្លែងទទូចស្វែងរកការអន្តរាគមន៍ពីសមត្ថកិច្ច ក្រោយបងស្រីរបស់គាត់ ទៅទិញបន្លែនៅផ្សារច្បារអំពៅ ទិញអស់តម្លៃ២,០០០រៀល ហើយច្រឡំបាញ់លុយទៅអ្នកលក់ចំនួន២,០០០ដុល្លារ ។ ករណីបាញ់លុយច្រឡំនេះ បានកើតឡើងកាលពីចុងខែឧសភា ហើយជនរងគ្រោះមិនទាន់ទទួលបានដំណោះស្រាយនៅឡើយទេ។ បុរសចិនរូបនោះ សង្ឃឹមនិងស្នើសុំឲ្យអ្នកលក់បន្លែគួរបាញ់លុយត្រឡប់មកគាត់វិញ បើនៅតែទុកលុយទៀតយើងអាចក្លាយជាជនល្មើស ក្នុងអំពើរំលោភសេចក្តីទុកចិត្ត ។
ក្រោយពីទទួលបានព័ត៌មានខាងលើនេះ នៅព្រឹកថ្ងៃទី២៦ ខែមិថុនា ឆ្នាំ២០២៦ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានចាត់បញ្ជូនករណីនេះទៅលោកស្នងការរង ទទួលផែនការងារសន្តិសុខ និងជំនាញបច្ចេកវិទ្យា ធ្វើការស្រាវជ្រាវជាបន្ទាន់ ។
លោកឧត្តមសេនីយ៍ឯក ជួន ណារិន្ទ បានឲ្យដឹងថា លោកសូមអរគុណដល់លោកស្នងការរង ផែនការងារសន្តិសុខ បានដឹកនាំមន្ត្រីជំនាញការងារសន្តិសុខ ធ្វើការស្រាវជ្រាវបានលឿនរហ័ស រកឃើញថា ជនដែលមានចេតនាទុច្ចរិត គឺឈ្មោះ អ៊ុក រ៉េន ជាកូនចៅម្ចាស់លក់បន្លែនៅផ្សារច្បារអំពៅ (ដែលបន្លំយក ABA របស់កូនស្រីឈ្មោះ អ៊ុក ផានី ហុចឱ្យស្ត្រីជនរងគ្រោះជនជាតិចិន បាញ់លុយថ្លៃបន្លែ ដែលច្រឡំ២,០០០រៀល ទៅជា២,០០០ដុល្លារអាមេរិក) ។
លោកស្នងការនគរបាលរាជធានីភ្នំពេញ បានឲ្យដឹងបន្តថា ករណីខាងលើនេះ បានកើតឡើងតាំងពីថ្ងៃ២៨ ខែឧសភា ឆ្នាំ២០២៦ មកម្ល៉េះ ប៉ុន្តែលោកទើបតែទទួលបានព័ត៌មាន នៅព្រឹកថ្ងៃទី២៦ មីថុនានេះទេ ។
ឧត្តមសេនីយ៍ឯក ជួន ណារិន្ទ ក៏បានបញ្ជាក់ថា ពេលនេះ ឈ្មោះ អ៊ុក ផានី បានបាញ់លុយទៅជនរងគ្រោះវិញបានតែ១,៩០០ដុល្លារ ដោយសាររូពគេបានដកចាយអស់១០០ដុល្លារបាត់ហើយ ។
លោកស្នងការ សូមអំពាវនាវដល់បងប្អូនប្រជាពលរដ្ឋខ្មែរ ចូលរួមជាមួយសមត្ថកិច្ច ដើម្បីថែរក្សាសេចក្ដីថ្លៃថ្នូរ ភាពស្មោះត្រង់ និងថែរក្សាការពារ ភ្ញៀវទេសចរណ៍ជាតិ អន្តរជាតិ និងអ្នកវិនិយោគគ្រប់មុខរបរ នៅក្នុងប្រទេសកម្ពុជា ៕
ចែករំលែកព័តមាននេះ