ផ្លូវដើររាប់ឆ្នាំហើយស្រាប់តែគេបិទ ! អ្នកភូមិផ្ទុះការតវ៉ា
- ភ្នំពេញ
ខេត្តស្វាយរៀង ៖ ប្រជាពលរដ្ឋជាច្រើនគ្រួសារនៅភូមិព្រៃគគីរ ឃុំព្រៃគគីរ ស្រុកចន្ទ្រា ខេត្តស្វាយរៀង បានលើកគ្នាតវ៉ាឱ្យអាជ្ញាធរមូលដ្ឋានរកដំណោះស្រាយជូនពួកគាត់ ដោយសារតែមានពលរដ្ឋ ១គ្រួសារ បានយករបងបាំងជិតផ្លូវមិនឱ្យពួកគាត់ធ្វើដំណើរបានដូចសព្វដង ។ អ្នកភូមិខាងលើនិយាយថា ផ្លូវលំ ១ខ្សែនេះក្នុងឃុំព្រៃគគីរ ស្រុកចន្ទ្រា ខេត្តស្វាយរៀង ប្រជាពលរដ្ឋធ្វើដំណើរជាង ២០ឆ្នាំមកហើយ ។ ស្រាប់តែនៅថ្ងៃទី ២២ ខែមិថុនា ឆ្នាំ ២០២៦ មានគ្រួសារមួយបានធ្វើរបងបិទផ្លូវមិនឱ្យពួកគាត់ធ្វើដំណើរ ទើបនាំឱ្យប្រតិកម្ម ដោយស្នើឱ្យអាជ្ញាធរជួយអន្តរាគមន៍បើកផ្លូវជាបន្ទាន់ ។
ក្រុមអ្នកភូមិបន្តថា ពលរដ្ឋ ១គ្រួសារនេះ បានរំលោភយកដីផ្លូវ និងធ្វើរបងបាំងជិតផ្លូវ ដើររាល់ថ្ងៃមិនឱ្យពួកគាត់ចូលទៅលំនៅឋានបាន នៅពេលចេញពីធ្វើការនៅរោងចក្រ ដើម្បីហូបបាយថ្ងៃត្រង់ ក៏ត្រូវជាប់គាំងដោយសារគេធ្វើរបងបិទផ្លូវនេះ ។ គ្រួសារមួយនេះ កាលពីដើមឡើយមិនរករឿងអ្វីនោះទេ តែដោយសារមានរោងចក្រ និងដីឡើងថ្លៃទើបទាមទារយកផ្លូវធ្វើជាកម្មសិទ្ធិតែម្ដង ដោយអះអាងថា ផ្លូវនេះជាដីរបស់ខ្លួន ។ ប៉ុន្តែខាងសុរិយាដីមិនធ្វើប្លង់ឱ្យទេ ដោយសារដីមានទំនាស់រង់ចាំដោះស្រាយសិន ។ ដោយសារការប្រកែកគ្នាតឹងសរសៃ ក៏បានក្លាយ ជាហិង្សាវាយតប់គ្នាយ៉ាងរញ៉េរញ៉ៃផងដែរ ។
ពាក់ព័ន្ធនឹងករណីនេះ លោក ថន ថាវុទ្ធា អភិបាលស្រុកចន្ទ្រា នៅរសៀលថ្ងៃទី ២២ ខែមិថុនាឆ្នាំ ២០២៦ បានបញ្ជាក់ថា ខាងស្រុក និងឃុំ បានអញ្ជើញភាគីដែលពាក់ពន្ធ័មកសម្របសម្រួល ដើម្បីរកដំណោះស្រាយហើយ ៕
ចែករំលែកព័តមាននេះ