ខេត្តកណ្តាល ៖ ការិយាល័យសុវត្ថិភាពចរាចរណ៍ផ្លូវគោក នៃស្នងការដ្ឋាននគរបាលខេត្តកណ្តាល បានចេញសេចក្តីណែនាំ និងក្រើនរំលឹកជាថ្មីម្តងទៀតដល់អ្នកបើកបរ និងអ្នករួមដំណើរទាំងអស់ ឱ្យបង្កើនការប្រុងប្រយ័ត្នខ្ពស់បំផុត រាល់ពេលបើកទ្វារយានជំនិះ ដើម្បីចុះ ឬឡើង ជាពិសេស គឺទ្វារផ្នែកខាងឆ្វេងរថយន្ត ដែលជាចំណុចប្រឈមនឹងគ្រោះថ្នាក់ខ្លាំងបំផុត ។
ជាក់ស្តែងការិ.សុវត្ថិភាពចរាចរណ៍ខេត្តកណ្តាល បានប្រកាសនាថ្ងៃទី២២ ខែមិថុនា ឆ្នាំ២០២៦នេះថា ៖ ការបើកទ្វារយានជំនិះ ដើម្បីចុះ ឬឡើង ត្រូវមានការប្រុងប្រយ័ត្នជាប់ជានិច្ច ជាពិសេសចំពោះការបើកទ្វារចុះ ឬឡើងនៅផ្នែកខាងឆ្វេងយាន ។
សូមបញ្ជាក់ថា ការបើកទ្វាររថយន្តដោយខ្ទាតប្រហែស ឬគ្មានការពិនិត្យមើលកញ្ចក់មើលក្រោយ គឺជាប្រភពគ្រោះថ្នាក់ស្រមោលមួយ ដែលតែងតែបង្កជាគ្រោះថ្នាក់ចរាចរណ៍ ពិសេសចំពោះអ្នកបើកបរទោចក្រយានយន្ត (ម៉ូតូ) និងកង់ ដែលធ្វើដំណើរមកពីខាងក្រោយ ។
បន្ថែមពីនេះទៀត ការរុញទ្វារចេញភ្លាមៗដោយមិនបានមើលក្រោយ អាចធ្វើឱ្យអ្នកធ្វើដំណើរមកពីក្រោយគេចមិនទាន់ បោកទង្គិចនឹងទ្វារពេញទំហឹង បណ្តាលឱ្យដួលរងរបួសធ្ងន់ធ្ងរ ឬខ្ទាតចូលទៅក្រោមឡានធំ ដែលបង្កជាគ្រោះថ្នាក់ដល់ជីវិតភ្លាមៗ ៕
ចែករំលែកព័តមាននេះ