អន្តរជាតិ ៖ សហរដ្ឋអាមេរិកបានបន្ធូរបន្ថយទណ្ឌកម្មប្រេងលើប្រទេសអ៊ីរ៉ង់ជាបណ្តោះអាសន្ន ខណៈដែលអ៊ីរ៉ង់ឯណោះវិញ បានបដិសេធការអះអាងរបស់អនុប្រធានាធិបតីសហរដ្ឋអាមេរិក លោក JD Vance ដែលថា ខ្លួនយល់ព្រមឱ្យក្រុមអធិការកិច្ចនុយក្លេអ៊ែរត្រឡប់ចូលប្រទេសវិញ។ នេះបើតាមប្រភពពី BBC ចេញផ្សាយនៅថ្ងៃទី២៣ ខែមិថុនា ឆ្នាំ២០២៦។
ក្រសួងរតនាភិបាលអាមេរិកបានចេញអាជ្ញាប័ណ្ណទូទៅរយៈពេល៦០ថ្ងៃ រហូតដល់ថ្ងៃទី២១ ខែសីហា ឆ្នាំ២០២៦ អនុញ្ញាតឱ្យអ៊ីរ៉ង់ផលិត ដឹកជញ្ជូន និងលក់ប្រេងឆៅ ព្រមទាំងផលិតផលគីមីឥន្ធនៈបានឡើងវិញ។ ការលើកលែងនេះ អនុញ្ញាតឱ្យធនាគារអ៊ីរ៉ង់អាចធ្វើការទូទាត់ជាប្រាក់ដុល្លារអាមេរិកដោយផ្ទាល់ ដែលជាការផ្លាស់ប្តូរគោលនយោបាយដ៏ធំមួយរបស់សហរដ្ឋអាមេរិក។
រដ្ឋមន្ត្រីក្រសួងរតនាភិបាលអាមេរិក លោក Scott Bessent បានបញ្ជាក់ថា ការសម្រេចចិត្តនេះ ធ្វើឡើងជាការឆ្លើយតបនឹងការប្តេជ្ញាចិត្តរបស់អ៊ីរ៉ង់ក្នុងការរក្សាច្រកសមុទ្រហ័រមូស (Hormuz) ឱ្យបើកចំហ សម្រាប់កប៉ាល់ពាណិជ្ជកម្ម និងការអនុញ្ញាតឱ្យអធិការកិច្ចនុយក្លេអ៊ែរ នៃទីភ្នាក់ងារថាមពលបរមាណូអន្តរជាតិ (IAEA) ស្ថិតក្រោមការគ្រប់គ្រងរបស់អង្គការសហប្រជាជាតិ (UN) ត្រឡប់ចូលប្រទេសវិញ។
បន្ទាប់ពីការចរចាបញ្ចប់សង្គ្រាមរវាងសហរដ្ឋអាមេរិក-អ៊ីរ៉ង់ជុំទី១ នៅប្រទេសស្វីស បានបញ្ចប់ លោក JD Vance បានថ្លែងនៅក្នុងការថ្លែងការណ៍មួយកាលពីព្រឹកថកងៃទី២២ ខែមិថុនា ឆ្នាំ២០២៦ ថា អ៊ីរ៉ង់បានយល់ព្រមអនុញ្ញាតឱ្យក្រុមអធិការកិច្ចនុយក្លេអ៊ែរត្រឡប់ចូលប្រទេសវិញ ដែលលោកចាត់ទុកជាសមិទ្ធផលដ៏សំខាន់មួយ។ លុះនៅពេលត្រូវបានអ្នកយកព័ត៌មានសួរដេញដោលថា តើពេលណាទើបក្រុមអធិការកិច្ចអាវុធនុយក្លេអ៊ែរនឹងត្រឡប់ទៅប្រទេសអ៊ីរ៉ង់វិញ។ លោកបានឆ្លើយថា លោករំពឹងថាដំណើរការនេះ នឹងចាប់ផ្តើមយ៉ាងហោចណាស់ក្នុងសប្តាហ៍នេះ ប៉ុន្តែការពិភាក្សាជាមួយក្រុមអធិការកិច្ចអាចនឹងកើតឡើងយ៉ាងឆាប់បំផុតនៅថ្ងៃនេះ។ ស្របពេលជាមួយគ្នានេះដែរ ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ក៏បានបង្ហោះនៅលើបណ្តាញសង្គមដែរថា ប្រទេសអ៊ីរ៉ង់នឹងយល់ព្រមឱ្យមានការត្រួតពិនិត្យអាវុធធំៗរបស់ខ្លួន។
ផ្ទុយទៅវិញ អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baqaei បានផ្តល់បទសម្ភាសន៍ដល់ទីភ្នាក់ងារសារព័ត៌មានរដ្ឋអ៊ីរ៉ង់ IRNA ដោយបានបញ្ជាក់ថា អ៊ីរ៉ង់ពុំមានការប្តេជ្ញាចិត្តថ្មីណាមួយជាមួយក្រុមអធិការកិច្ចនុយក្លេអ៊ែរនោះទេ ដោយបន្ថែមថា រាល់ការចូលរួមណាមួយជាមួយតំណាង UN ត្រូវតែធ្វើឡើងក្រោមនីតិវិធីមានស្រាប់ដែលកំណត់ដោយសភា និងក្រុមប្រឹក្សាសន្តិសុខជាតិកំពូលរបស់អ៊ីរ៉ង់តែប៉ុណ្ណោះ។ ពាក់ព័ន្ធបញ្ហានេះ IAEA មិនបានធ្វើអត្ថាធិប្បាយភ្លាមៗនោះទេ។
អ៊ីរ៉ង់បានផ្អាកក្រុមការងារ IAEA ពីការចូលទៅកាន់ទីតាំងនានារបស់ខ្លួន ដែលត្រូវបានទម្លាក់គ្រាប់បែកដោយអ៊ីស្រាអែល និងសហរដ្ឋអាមេរិក អំឡុងសង្គ្រាមរយៈពេល ១២ ថ្ងៃ កាលពីថ្ងៃទី១៣ ដល់ទី២៤ ខែមិថុនា ឆ្នាំ២០២៥។ នៅខែបន្ទាប់ IAEA បានអះអាងថា ខ្លួនបានដកក្រុមការងារអធិការកិច្ចដែលនៅសេសសល់របស់ខ្លួនចេញពីប្រទេសអ៊ីរ៉ង់ហើយ៕
ចែករំលែកព័តមាននេះ