ទីក្រុងហ្សឺណែវ៖ អនុប្រធានាធិបតីអាមេរិក លោកជេឌីវេន ថ្លែងថាការចរចាជាមួយមន្ត្រីរដ្ឋាភិបាលអ៊ីរ៉ង់នៅប្រទេសស្វីសបានរៀបចំជាមូលដ្ឋានគ្រឹះដ៏ល្អសម្រាប់ការចរចាគ្នាឆ្ពោះទៅរកសន្តិភាពជាស្ថាពរ។ លោកនៅតែមានជំនឿយ៉ាងដូច្នេះទោះបីភាគីទាំង២ចរចាគ្នាទៅមានភាពតានតឹង ឬក៏ថាមានភាពប្រទាំងប្រទើសគ្នាពាក់ព័ន្ធនឹងបញ្ហាច្រកសមុទ្រហ័រម៉ូស និងប្រទេសលីបង់យ៉ាងណាក្ដី។ ភាគីទាំង២បានឯកភាពគ្នាទទួលយកផែនទីបង្ហាញផ្លូវមួយឆ្ពោះទៅរកការធ្វើម៉េចត្រូវតែចរចាគ្នាឱ្យមានកិច្ចព្រមព្រៀងជាអចិន្ត្រៃយ៍នៅក្នុងរង្វង់៦០ថ្ងៃ។
ភាគីទាំង២ក៏បានឯកភាពគ្នាទទួលយកយន្តការបញ្ចប់សង្គ្រាមនៅប្រទេសលីបង់រវាងក្រុមហេសបូឡា និងអ៊ីស្រាអែល និងបើកបណ្ដាញទំនាក់ទំនងពិសេសដើម្បីបើកច្រកសមុទ្រហ័រម៉ូសសម្រាប់កប៉ាល់ពាណិជ្ជកម្មបើកចេញចូលដោយសុវត្ថិភាព។ ទីនេះជាច្រកដ៏សំខាន់សម្រាប់ការដឹកជញ្ជូនប្រេងឆៅ។ លោកវេនអះអាងថារដ្ឋាភិបាលទីក្រុងតេអេរ៉ង់បានយល់ព្រមអនុញ្ញាតឱ្យក្រុមអ្នកសង្កេតការណ៍នុយក្លេអ៊ែរចូលទៅត្រួតពិនិត្យកម្មវិធីនុយក្លេអ៊ែររបស់ខ្លួន, យល់ព្រមបង្កើតយន្តការដើម្បីចាត់ចែងទ្រព្យសម្បត្តិដែលត្រូវបានគេបង្កកទុកនៅក្រៅប្រទេស និងយល់ព្រមគ្រប់គ្រងបទឈប់បាញ់ប្រកបដោយប្រសិទ្ធភាព។
លោកថ្លែងប្រាប់ក្រុមអ្នកសារព័ត៌មានថាយើងបានរៀបចំបាតគ្រឹះដ៏រឹងមាំបំផុតដើម្បីឈានទៅរកការចរចាគ្នាដើម្បីឱ្យចេញជាកិច្ចព្រមព្រៀងស្ថាពរប្រកបដោយភាពជោគជ័យ។ សូមជម្រាបថាចាប់តាំងពីអាមេរិកទម្លាក់គ្រាប់បែកលើទីតាំងនុយក្លេអ៊ែរអ៊ីរ៉ង់កាលពីខែមិថុនា ឆ្នាំ២០២៥ អ៊ីរ៉ង់អនុញ្ញាតឱ្យទីភ្នាក់ងារអាតូមិចអន្តរជាតិ (IAEA) ចូលពិនិត្យមើលទីតាំងដែលមិនបានទទួលរងការវាយប្រហារតែប៉ុណ្ណោះ។ ទីភ្នាក់ងារខាងលើនេះសម្រេចចិត្តផ្អាកការត្រួតពិនិត្យទាំងស្រុងបន្ទាប់ពីអាមេរិក និងអ៊ីស្រាអែលបើកយុទ្ធនាការវាយប្រហារអ៊ីរ៉ង់ជាថ្មីម្ដងទៀតកាលពីថ្ងៃទី២៨ ខែកុម្ភៈ។ មកទល់នឹងពេលនេះ IAEA មិនទាន់ចូលពិនិត្យឡើងវិញនៅឡើយទេ។
លោកវេនហាក់ដូចជាចង់និយាយសម្រាលស្ថានការណ៍តានតឹងបន្តិចវិញបន្ទាប់ពីលោកត្រាំចេញសារគំរាមកំហែងកាលពីយប់ថ្ងៃអាទិត្យថាលោកនឹងបើកការវាយប្រហារអ៊ីរ៉ង់ជាថ្មីបន្ទាប់ពីប្រទេសនេះបិទច្រកសមុទ្រហ័រម៉ូសក្រោមហេតុផលថារដ្ឋាភិបាលទីក្រុងវ៉ាស៊ីនតោនមិនអាចបញ្ឈប់ការផ្ទុះអាវុធនៅលីបង់។ លោកវេនថាមានការគំរាមកំហែងតិចតួចតែប៉ុណ្ណោះ ហើយនៅទីបញ្ចប់យើងនឹងចរចាគ្នាជាបន្តទៀត។ រដ្ឋមន្ត្រីការបរទេសអ៊ីរ៉ង់បង្ហោះសារនៅលើបណ្ដាញសង្គមថាអ៊ីរ៉ង់ទទួលបានការអនុញ្ញាតឱ្យនាំចេញប្រេងឆៅ និងប្រេងពាក់កណ្ដាលសម្រេច, បញ្ចេញយកមកប្រើនូវទ្រព្យសម្បត្តិដែលត្រូវគេបង្កកទុកនៅបរទេស និងចាប់ផ្ដើមផែនការស្ដារ និងអភិវឌ្ឍប្រទេសជាតិឡើងវិញ៕ ប្រភព៖ Reuters
ចែករំលែកព័តមាននេះ