ទីក្រុងឡុង៖ ជាករណីដ៏គួរឱ្យភ្ញាក់ផ្អើលដែលនៅសុខៗនាយករដ្ឋមន្ត្រីអង់គ្លេស លោកខៀស្តាមើ (Keir Starmer) ប្រកាសជាចំហតែម្ដងថាលោកនឹងចុះចេញពីតំណែងជាប្រធានគណបក្សពលករដែកំពុងដឹកនាំប្រទេសសព្វថ្ងៃ។ ម៉្យាងទៀត បន្ទាប់ពីចុះចេញពីតំណែងប្រធានបក្សរួច លោកក៏នឹងចាកចេញពីតំណែងនាយករដ្ឋមន្ត្រីនៅក្នុងរង្វង់ប៉ុន្មានអាទិត្យខាងមុខនេះ។ នៅក្នុងច្បាប់របស់អង់គ្លេស នាយករដ្ឋមន្ត្រីត្រូវតែជាប្រធានគណបក្សគ្រប់គ្រងប្រទេស។ ដូច្នេះតំណែងនាយករដ្ឋមន្ត្រីមិនចាំបាច់សភាបោះឆ្នោតដកតំណែងទេ គឺត្រូវតែអស់ដោយស្វ័យប្រវត្តិនៅពេលមានអ្នកផ្សេងនៅក្នុងគណបក្សជាមួយគ្នាស្នើសុំប្រកួតប្រជែង។
តាមដឹងមកថាលោកស្តាមើកំពុងរងសម្ពាធខ្លាំងពីមន្ត្រីធំៗនៅក្នុងគណបក្សជាមួយគ្នាបន្ទាប់ពីលោកឡើងកាន់អំណាចក្រោយការឈ្នះឆ្នោតយ៉ាងភ្លូកទឹកភ្លូកដីកាលពីពីរឆ្នាំមុន។ លោកស្តាមើថ្លែងថាលោកនឹងបន្តកាន់តំណែងជានាយករដ្ឋមន្ត្រីចាំផ្ទះជាបណ្ដោះអាសន្នរហូតដល់គណបក្សរបស់លោកជ្រើសរើសបានប្រធានថ្មី។ គេរំពឹងថាអតីតចៅហ្វាយក្រុងមេនឆេសស្ទើ លោកបឺនហេម (Burnham) អាចជាអ្នកឡើងកាន់តំណែងបន្ត។ លោកបឺនហេមបញ្ជាក់តាមបណ្ដាញសង្គមថាលោកនឹងចូលខ្លួនប្រឡូកនៅក្នុងកិច្ចការនេះ។
អតីតរដ្ឋមន្ត្រីក្រសួងសុខាភិបាល លោកវេសស្ទ្រីតធីង (Wes Streeting) ដែលពីដំបូងដៃគេគិតថាជាអ្នកដែលអាចចូលរួមប្រកួតប្រជែងយកតំណែងប្រធានគណបក្ស លោកក៏ប្រកាសគាំទ្រលោកបឺនហេមផងដែរ។ បើដូច្នេះមែន តាមមើលទៅ គណបក្សពលករមិនចាំបាច់បោះឆ្នោតរើសប្រធានបក្សទេ គឺប្រគល់ជូនលោកបឺនហេមតែម្ដង។ លោកបឺនហេមវិលទៅកាន់តំណែងជាអ្នកតំណាងរាស្ត្រវិញបន្ទាប់ពីកាន់តំណែងជាអភិបាលក្រុងមេនឆេសស្ទើជិតមួយទសវត្សរ៍។ នៅរាត្រីនេះ លោកនឹងស្បថចូលកាន់តំណែងជាអ្នកតំណាងរាស្ត្រពេញសិទ្ធិ។
គិតទៅ មិនដល់មិនទសវត្សរ៍ផង នាយករដ្ឋមន្ត្រីចំនួន៦រូប រួមទាំងលោកស្តាមើផងដែរត្រូវចាកចេញមុនអាណត្តិពីវិមានដោននីងស្ទ្រីត (Downing Street) ដែលជានិវាសនដ្ឋានរបស់ប្រមុខរាជរដ្ឋាភិបាលអង់គ្លេស។ សេចក្ដីប្រកាសអំពីគម្រោងចុះចេញពីតំណែងរបស់លោកស្តាមើកើតមានឡើងត្រឹមតែមួយថ្ងៃប៉ុណ្ណោះមុនខួបទីដប់ឆ្នាំដែលអង់គ្លេសចាកចេញពីសហភាពអឺរ៉ុប។ ការសម្រេចចិត្តចាកចេញនេះធ្វើឱ្យអង់គ្លេសប្រឈមនឹងបញ្ហាសេដ្ឋកិច្ច និងនយោបាយរហូតដល់សព្វថ្ងៃ។ នេះបើយោងតាមប្រភពពី Associated Press និងប្រភពដទៃទៀត៕
ចែករំលែកព័តមាននេះ