ទីក្រុងបេរូត៖ យោធាអ៊ីស្រាអែលបើកការវាយប្រហារនៅថ្ងៃនេះសម្លាប់មនុស្សយ៉ាងតិចដប់នាក់។ ការវាយប្រហារនេះធ្វើឡើងត្រឹមតែប៉ុន្មានម៉ោងប៉ុណ្ណោះបន្ទាប់ពីមានកិច្ចព្រមព្រៀងនៃបទឈប់បាញ់ជាមួយក្រុមហេសបូឡាចូលជាធរមាន។ ក្នុងនោះអ៊ីស្រាអែលអះអាងថាខ្លួនឆ្លើយតបទៅនឹងការបាញ់រ៉ុកកែតពីសំណាក់ហេសបូឡា។ ទីភ្នាក់ងារព័ត៌មានលីបង់ផ្សាយថាយន្តហោះចម្បាំង និងដ្រូនរបស់អ៊ីស្រាអែលវាយប្រហារទីតាំងជាច្រើនកន្លែងនៅតំបន់ខាងត្បូង និងតំបន់ជ្រលងភ្នំបេកា (Bekaa)។
មន្ត្រីរដ្ឋាភិបាលអ៊ីស្រាអែលម្នាក់ថ្លែងថាហេសបូឡាបាញ់រ៉ុកកែតជាង៥០គ្រាប់ដាក់យោធាអ៊ីស្រាអែលនៅលីបង់ខាងត្បូងកាលពីយប់មិញ ដូច្នេះអ៊ីស្រាអែលក៏វាយបកវិញទៅលើគោលដៅក្រុមហេសបូឡា។ បើគេស្ដាប់ការបកស្រាយពីក្រុមហេសបូឡា ពួកគេថានៅតែគោរពតាមបទឈប់បាញ់ជានិច្ច។ ប៉ុន្តែខ្លួនក៏នឹងឆ្លើយតបផងដែរប្រសិនបើអ៊ីស្រាអែលចង់រឹបអូសយកទីតាំងណាមួយ ឬពង្រីកការគ្រប់គ្រងរបស់ខ្លួន។ ហេសបូឡាថាយោធារបស់ខ្លួនត្រៀមខ្លួនយ៉ាងពេញលេញដើម្បីការពារទឹកដីរបស់ខ្លួន។
ក្រុមហេសបូឡាអះអាងថាយោធាអ៊ីស្រាអែលប៉ុនប៉ងជ្រៀតចូលតំបន់ភ្នំអាលីអាល់ថាហឺ (Ali al-Taher) នៅលីបង់ខាងត្បូង។ ដូច្នេះ ហេសបូឡាក៏វាយតបតទៅអ៊ីស្រាអែលវិញ។ បន្ទាប់មក អ៊ីស្រាអែលវាយប្រហារតាមអាកាស។ មន្ត្រីជាន់ខ្ពស់របស់ហេសបូឡាប្រាប់ថាក្រុមរបស់ខ្លួននឹងមិនអនុញ្ញាតឱ្យអ៊ីស្រាអែលចេះតែធ្វើសកម្មភាពនៅក្នុងតំបន់ត្រួតត្រារបស់លីបង់ទេ។ ដូច្នេះ ហេសបូឡាសូមរក្សាសិទ្ធិវាយប្រហារជានិច្ចដរាបណាអ៊ីស្រាអែលរក្សាកងទ័ពនៅលើទឹកដីលីបង់។
អំពើហិង្សាចុងក្រោយនេះឆ្លុះបញ្ចាំងឱ្យឃើញថាបទឈប់បាញ់មានភាពផុយស្រួយណាស់។ អ៊ីស្រាអែលវាយប្រហារអគារស្នាក់នៅរបស់ប្រជាជនកម្ពស់បីជាន់នៅទីក្រុងបារីស (Barish) នៃសង្កាត់ទីរ៉េ (Tyre) សម្លាប់បុរសម្នាក់ជាឪពុក ជាម្ដាយ និងកូនៗ២នាក់។ នេះបើយោងតាមមន្ត្រីថ្នាក់មូលដ្ឋាន។ កងទ័ពលីបង់ថ្លែងថាការវាយប្រហាររបស់អ៊ីស្រាអែលសម្លាប់ទាហានម្នាក់នៅតាមផ្លូវ។ គេក៏បានដាក់ការស្ដីបន្ទោសលើអ៊ីស្រាអែលថាជាអ្នកធ្វើឱ្យចុះខ្សោយដល់កិច្ចខិតខំប្រឹងប្រែងក្នុងការស្ដារស្ថិរភាព៕ ប្រភព៖ Reuters
ចែករំលែកព័តមាននេះ