ឆ្នាំ២០២៥ កម្ពុជាបានបាត់បង់ប្រាក់៤៥លានដុល្លារក្នុងបទល្មើសឧក្រិដ្ឋកម្មបច្ចេកវិទ្យា ភាគច្រើនលើអនឡាញហ្គេម
- ភ្នំពេញ
រាជធានីភ្នំពេញ ៖ នៅក្នុងឆ្នាំ២០២៥ កន្លងមកនេះ កម្ពុជាបានបាត់បង់ប្រាក់៤៥លានដុល្លារលើបទល្មើសឧក្រិដ្ឋកម្មបច្ចេកវិទ្យាដែលភាគច្រើនលើករណីអនឡាញហ្គេម ។
ឯកឧត្ដម នាយឧត្តមសេនីយ៍ ប៉ោ ភក្តិ អញ្ជើញជាអធិបតីសម្ពោធជាផ្លូវការនូវ «រឿងអប់រំខ្លី» របស់ទូរទស្សន៍មហាផ្ទៃ កាលពីរសៀលថ្ងៃទី១៩ ខែមិថុនា ឆ្នាំ២០២៦ ក្នុងផ្សារទំនើបអ៊ីអន៣ថា ឆ្នាំ២០២៥ តាមការសួរពីAIបានឱ្យដឹងថា នៅកម្ពុជាបានបាត់បង់ប្រាក់៤៥លានដុល្លារក្នុងឧក្រិដ្ឋកម្មបច្ចេកវិទ្យា ដែកភាគច្រើនករណីបទល្មើសអនឡាញហ្គេម ខណៈនៅទូទាំងពិភពលោកបានបាត់បង់១០.៥ទ្រីលានដុល្លារ ។
ឯកឧត្តមរដ្ឋលេខាធិការបានលើកឡើងទៀតថា សម្រាប់កម្ពុជានៅក្នុងឆ្នាំ២០២៥នោះដែរ មានប្រាក់ជាង២០លានដុល្លារ ត្រូវបានជួយសង្គ្រោះរកឃើញមកវិញ ។
ឯកឧត្តមបានបញ្ជាក់ថា «អីញ្ចឹងយើងគិតមើលក្នុងមួយឆ្នាំយើងបាត់បង់៤៥លានដុល្លារ ចំនួននេះច្រើន បើយើងយកថវិកាមកអភិវឌ្ឍន៍កសាងប្រទេសជាតិ ដូច្នេះ បើយើងទប់ស្កាត់ករណីនេះបាន» ។
ចំណែកឯកឧត្ដម ឧត្តមសេនីយ៍ឯក ហោ សំអាត អគ្គនាយក នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ក្រសួងមហាផ្ទៃបានថ្លែងថា ការរីកចម្រើនយ៉ាងលឿននៃបច្ចេកវិទ្យាគមនាគមន៍ និងព័ត៌មាន បានធ្វើឱ្យពិភពលោក រួមទាំងព្រះរាជាណាចក្រកម្ពុជា ទទួលបាននូវអត្ថប្រយោជន៍ជាច្រើន តាមរយៈការចាប់យកបច្ចេកវិទ្យាឌីជីថល ធ្វើជាមធ្យោបាយ ដើម្បីពង្រឹង និងពង្រីក ប្រសិទ្ធភាពការងារ និងអាជីវកម្ម។
ឯកឧត្តម អគ្គនាយកបន្ដថា ទោះបីជាបច្ចេកវិទ្យាឌីជីថល បានផ្តល់នូវអត្ថប្រយោជន៍មហាសាលដល់មនុស្សជាតិ ប៉ុន្តែវាក៏ទាមទារឲ្យមនុស្សប្រើប្រាស់ប្រកបដោយការទទួលខុសត្រូវ និងប្រុងប្រយ័ត្នខ្ពស់ ព្រោះបច្ចេកវិទ្យានេះ ត្រូវបានប្រើប្រាស់ទាំងមនុស្សល្អ ទាំងមនុស្សអាក្រក់។
ឯកឧត្ដម នាយឧត្តមសេនីយ៍ ប៉ោ ភក្តិ រដ្ឋលេខាធិការ ក្រសួងមហាផ្ទៃ ក៏បានលើកឡើងថា ឆ្លើយតបនឹងទិសដៅនយោបាយដ៏វែងឆ្ងាយនេះ ក្រសួងមហាផ្ទៃ ក្រោមការដឹកនាំប្រកបដោយប្រតិភាណឈ្លាសវៃ របស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បាននឹងកំពុងរុញច្រានការធ្វើទំនើបកម្មស្ថាប័ន ដោយចាត់ទុកបច្ចេកវិទ្យា ជាឧបករណ៍គន្លឹះក្នុងការលើកកម្ពស់តម្លាភាព គណនេយ្យភាព និងប្រសិទ្ធភាពខ្ពស់ ក្នុងការផ្តល់សេវា ជូនប្រជាពលរដ្ឋនៅគ្រប់មូលដ្ឋាន។
ឯកឧត្តម រដ្ឋលេខាធិការបន្ថែមថា ទោះជាយ៉ាងណា ទន្ទឹមនឹងផលវិជ្ជមានដ៏មហាសាល នៃការផ្លាស់ប្តូរទៅជាឌីជីថល យើងក៏ត្រូវប្រឈមមុខនឹងបញ្ហាអសន្តិសុខទម្រង់ថ្មី គឺបទល្មើសបច្ចេកវិទ្យាឆ្លងដែន (Cybercrimes)។ ឧក្រិដ្ឋជន បាននឹងកំពុងប្រើប្រាស់ប្រព័ន្ធអនឡាញធ្វើជាឧបករណ៍ឆបោក លួចទិន្នន័យ និងបំផ្លាញទ្រព្យសម្បត្តិ ។ សកម្មភាពខុសច្បាប់ទាំងនេះ មិនត្រឹមតែបង្កវិនាសកម្មផ្នែកសេដ្ឋកិច្ច និងហិរញ្ញវត្ថុរបស់បុគ្គល និងគ្រួសារប៉ុណ្ណោះទេ ប៉ុន្តែថែមទាំងបំផ្លាញដល់ទំនុកចិត្តឌីជីថល ដែលជាគ្រឹះនៃការអភិវឌ្ឍសង្គមឌីជីថល ព្រមទាំងបង្កផលប៉ះពាល់ដល់ស្ថិរភាពផ្លូវចិត្ត និងសណ្តាប់ធ្នាប់សាធារណៈ ដែលជាគោលដៅអាទិភាព នៃគោលនយោបាយ ភូមិ-ឃុំ-សង្កាត់ មានសុវត្ថិភាព ៕
ចែករំលែកព័តមាននេះ