ទីក្រុងកាហ្សាន៖ នាយករដ្ឋមន្ត្រីវៀតណាម លោកឡេមិញហុង និងប្រធានាធិបតីរុស្ស៊ី លោកពូទីន បានឯកភាពគ្នាថានឹងពន្លឿនការចរចាគ្នាដើម្បីសាងសង់រោងចក្រអគ្គិសនីដើរដោយថាមពលនុយក្លេអ៊ែរ។ សង្ឃឹមថានឹងចាប់ផ្ដើមដំណើរការសាងសង់នៅក្នុងពេលឆាប់ៗនេះ។ លោកហុងកំពុងស្ថិតនៅទីក្រុងកាហ្សាន ប្រទេសរុស្ស៊ី ដើម្បីចូលរួមកិច្ចប្រជុំកំពូលរវាងអាស៊ាន និងរុស្ស៊ី និងសកម្មភាពមួយចំនួនទៀតនៅទីនោះ។
លោកពូទីនបានថ្លែងអំណរគុណវៀតណាមចំពោះការសហការគ្នាយ៉ាងជិតស្និទ្ធ និងតែងតែចូលរួមចំណែកនៅក្នុងការធ្វើឱ្យដំណើរការប្រជុំកំពូលរវាងអាស៊ាន និងរុស្ស៊ីប្រព្រឹត្តទៅដោយជោគជ័យ។ កិច្ចប្រជុំកំពូលលើកនេះធ្វើឡើងចំថ្ងៃខួបទី៣៥ឆ្នាំនៃទំនាក់ទំនងរវាងអាស៊ាន និងរុស្ស៊ី។ លោកពូទីនសម្លឹងឃើញវៀតណាមជាដៃគូដ៏សំខាន់បំផុត ហើយក៏ជាមិត្តភក្ដិដ៏ជិតស្និទ្ធរបស់រុស្ស៊ីជាងគេបើប្រៀបធៀបជាមួយបណ្ដាប្រទេសដទៃទៀតនៅក្នុងតំបន់អាស៊ាន។
រុស្ស៊ីចាត់ទុកវៀតណាមជាស្ពានចម្លងដ៏សំខាន់មួយរបស់រុស្ស៊ីដើម្បីឈានជើងចូលអាស៊ាន ហើយវៀតណាមក៏ជាកម្លាំងចលករក្នុងការជំរុញគំនិតផ្ដួចផ្ដើមនៃកិច្ចសហប្រតិបត្តិការរបស់រុស្ស៊ីនៅក្នុងតំបន់ផងដែរ។ លោកពូទីនវាយតម្លៃខ្ពស់ចំពោះការទទួលបានលទ្ធផលជាផ្លែផ្កានៅក្នុងកិច្ចសហប្រតិបត្តិការទ្វេភាគី។ ជាពិសេសបំផុតនោះគឺការជឿទុកចិត្តគ្នាប្រកបដោយស្ថិរភាពនៅក្នុងវិស័យនយោបាយដែលលោកចាត់ទុកថាជាបាតគ្រឹះដ៏រឹងមាំក្នុងការជួយជ្រោមជ្រែងការពង្រីកទំនាក់ទំនង។
នៅពេលរំលឹកទៅដល់ការជួបគ្នាប៉ុន្មានដងជាមួយថ្នាក់ដឹកនាំវៀតណាមកាលពីពេលកន្លងមក លោកពូទីនបានផ្ដាំផ្ញើពាក្យពេចន៍ទៅជម្រាបជូនអគ្គលេខាធិការបក្សកុម្មុយនិស្តវៀតណាម លោកតូឡឹម និងមន្ត្រីរដ្ឋាភិបាលសំខាន់ៗដទៃទៀត។ លោកពូទីនមានទំនុកចិត្តថាលោកនាយករដ្ឋមន្ត្រីហុង និងមន្ត្រីរដ្ឋាភិបាលវៀតណាមដទៃទៀតដែលទើបតែឡើងកាន់តំណែងថ្មីៗនឹងបន្តធ្វើការជាមួយរុស្ស៊ីដើម្បីពង្រឹងភាពជាដៃគូជាយុទ្ធសាស្ត្រនៅលើវិស័យនានា។
លោកហុងរំលេចឱ្យឃើញកិច្ចសហប្រតិបត្តិការដែលឈានដល់ដំណាក់កាលនៃការឈោងចាប់យកឱកាសសំខាន់ និងសក្ដានុពលនាពេលអនាគត។ ហេតុនេះ លោកហុង និងលោកពូទីនឯកភាពគ្នាថានឹងពន្លឿនការចរចាគ្នាឱ្យបានឆាប់រហ័សដើម្បីប្រញាប់អនុវត្តគម្រោងសាងសង់រោងចក្រនុយក្លេអ៊ែរនិញធួនមួយ (Ninh Thuan 1)។ ភាគីទាំង២បញ្ជាក់ថាអ្វីដែលជាសសរស្ដម្ភសំខាន់ៗសម្រាប់ជ្រោមជ្រែងទំនាក់ទំនងទ្វេភាគីនេះគឺកិច្ចសហប្រតិបត្តិការខាងវិស័យថាមពល ប្រេងឆៅ ឧស្ម័ន និងថាមពលនុយក្លេអ៊ែរ៕ ប្រភព៖ Vietnam Express
ចែករំលែកព័តមាននេះ