ទីក្រុងយេរូសាឡឹម៖ យោធាអ៊ីស្រាអែលថ្លែងថាកងទ័ពរបស់ខ្លួនបានវាយប្រហារគោលដៅជាច្រើនកន្លែងនៅទូទាំងប្រទេសលីបង់ភាគខាងត្បូងកាលពីយប់មិញ។ ក្រុមហេសបូឡាក៏ទទួលស្គាល់ថាមានការវាយប្រហារយ៉ាងសន្ធាប់នៅលើទីតាំងទាំងនោះផងដែរ ហេតុនេះ វាជាការគំរាមកំហែងបទឈប់បាញ់រវាងអ៊ីរ៉ង់ និងអាមេរិក។ គម្រោងជួបចរចាគ្នារវាងអាមេរិក និងគណៈប្រតិភូអ៊ីរ៉ង់ដែលត្រូវធ្វើនៅថ្ងៃនេះត្រូវពន្យារពេលទៅថ្ងៃក្រោយវិញ។ ក្រុមប្រទេសដែលដើរតួជាអន្តរការីសម្របសម្រួលការចរចាគ្នាកំពុងតែដុតដៃដុតជើងដើម្បីរៀបចំគម្រោងជួបគ្នាសាជាថ្មី។
គោលដៅរបស់ក្រុមអ្នកចរចាគឺធ្វើយ៉ាងណាបង្កើតកិច្ចព្រមព្រៀងដែលអាចបិទបញ្ចប់ជម្លោះជាស្ថាពរ។ ប្រទេសលីបង់ក៏កំពុងទទួលបានការយកចិត្តទុកដាក់ផងដែរ។ នេះបើយោងតាមមន្ត្រីរដ្ឋាភិបាលនៅមជ្ឈិមបូព៌ាបង្ហើបឱ្យដឹង។ ទន្ទឹមនឹងនោះ ចំនួនអ្នកស្លាប់ដោយសារសង្គ្រាមនៅលីបង់កើនឡើងឥតឈប់ឈរ។ ទីភ្នាក់ងារព័ត៌មានរបស់រដ្ឋលីបង់ផ្សាយថាការវាយប្រហាររបស់អ៊ីស្រាអែលថ្មីៗបំផុតនេះបានសម្លាប់មនុស្សយ៉ាងតិច១៨នាក់។ អ៊ីស្រាអែលប្រកាសថាយោធារបស់ខ្លួននឹងបន្តប្រតិបត្តិការសឹក។
អ៊ីស្រាអែលថ្លែងថាយោធារបស់ខ្លួនបួននាក់បានស្លាប់នៅក្នុងការប្រយុទ្ធគ្នានៅលីបង់ខាងត្បូង។ ក្នុងនោះមានវរសេនីយ៍ឯកម្នាក់ស្លាប់ផងដែរ។ អ៊ីស្រាអែលថាមានករណីវាយប្រហារដោយដ្រូនទៅលើយោធារបស់ខ្លួនបណ្ដាលឱ្យរបួស៥នាក់នៅក្នុងព្រឹត្តិការណ៍ដាច់ដោយឡែកមួយទៀត។ មិនត្រឹមតែនៅលីបង់ភាគខាងត្បូងប៉ុណ្ណោះទេ អ៊ីស្រាអែលថាខ្លួនក៏បានវាយប្រហារគោលដៅនៅប្រទេសលីបង់ភាគខាងកើតផងដែរ។ សារព័ត៌មានលីបង់ផ្សាយថាភូមិដូរីស (Douris) រងការវាយប្រហារ។
បើសង្គ្រាមនៅតែបន្តនៅលីបង់ដូចសព្វថ្ងៃនេះ វាអាចនឹងបង្កបញ្ហាសម្រាប់កិច្ចព្រមព្រៀងដែលទើបតែចុះហត្ថលេខាហើយថ្មីៗ ហើយដែលអំពាវនាវឱ្យគ្រប់ភាគីបញ្ឈប់ជាបន្ទាន់នូវរាល់ប្រតិបត្តិការសឹកនៅគ្រប់សមរភូមិទាំងអស់រួមទាំងនៅប្រទេសលីបង់ផងដែរ។ នៅលីបង់ អ៊ីស្រាអែលបន្តតាមប្រមាញ់ក្រុមហេសបូឡា ដែលហេសបូឡានេះមានអ៊ីរ៉ង់នៅពីក្រោយខ្នង។ កិច្ចព្រមព្រៀងដែលទើបតែចុះហត្ថលេខានោះនោះក៏អំពាវនាវឱ្យគោរពបូរណភាពទឹកដី និងអធិបតេយ្យភាពជាតិរបស់លីបង់ផងដែរ៕ ប្រភព៖ AP
ចែករំលែកព័តមាននេះ