មន្ត្រីជំនាញមន្ទីរបរិស្ថាន ចុះបង្ក្រាប និងកម្ទេចចោលឡធ្យូងខុសច្បាប់ ២កន្លែង នៅស្រុកអូរគ្រៀងសែនជ័យ
- ក្រចេះ
ខេត្តក្រចេះ៖កម្លាំងមន្ត្រីឧទ្យានុរក្សនៃមន្ទីរបរិស្ថានខេត្តក្រចេះ បានបើកប្រតិបត្តិការចុះបង្ក្រាប និងកម្ទេចចោលនូវទីតាំងឡដុតធ្យូងខុសច្បាប់ចំនួន ១កន្លែង ដែលមានឡចំនួន២ ស្ថិតក្នុងភូមិសាស្ត្រស្រុកអូរគ្រៀងសែនជ័យ ដើម្បីទប់ស្កាត់បទល្មើសបំផ្លាញធនធានធម្មជាតិ។
ប្រតិបត្តិការរយៈពេល ២ថ្ងៃ ចាប់ពីថ្ងៃទី១៧ ដល់ថ្ងៃទី១៨ ខែមិថុនា ឆ្នាំ២០២៦ នេះ ធ្វើឡើងក្រោមការចង្អុលបង្ហាញពីលោកប្រធានមន្ទីរបរិស្ថានខេត្តក្រចេះ និងមានការឯកភាពពីរដ្ឋបាលស្រុកអូរគ្រៀងសែនជ័យ។ កម្លាំងចម្រុះដែលរួមមាន មន្ត្រីឧទ្យានុរក្ស សហការជាមួយកម្លាំងល្បាតរបស់សហគមន៍មូលដ្ឋាននិងប្រជាការពារភូមិ ដឹកនាំបញ្ជាផ្ទាល់ដោយ លោក ញ៉ែម វិសាល នាយកដែនជម្រកសត្វព្រៃសំបូរ បានចុះអនុវត្តវិធានការច្បាប់យ៉ាងតឹងរ៉ឹង ដោយបានវាយកម្ទេចចោលទាំងស្រុងនូវឡធ្យូងខុសច្បាប់ទាំង ២ នោះ ដែលស្ថិតនៅត្រង់ចំណុចទួលចំបក់ ក្នុងភូមិអូរគ្រៀង ឃុំអូរគ្រៀង ស្រុកអូរគ្រៀងសែនជ័យ។
យោងតាមមន្ត្រីជំនាញ និងអ្នកជំនាញផ្នែកបរិស្ថាន ការបង្កើតនិងដំណើរការឡដុតធ្យូងខុសច្បាប់នៅក្នុងតំបន់ការពារ បង្កឱ្យមានផលប៉ះពាល់អវិជ្ជមានជាច្រើនដូចជា៖ ការបាត់បង់គម្របព្រៃឈើ និងជីវៈចម្រុះ៖ សកម្មភាពដុតធ្យូងតម្រូវឱ្យមានការកាប់ទម្លាយឈើមូល និងឈើយ៉ាងច្រើន ដែលបង្កឱ្យមានវិនាសកម្មព្រៃឈើជាបន្តបន្ទាប់ ប៉ះពាល់ដល់ទីជម្រកសត្វព្រៃ និងប្រព័ន្ធអេកូឡូស៊ី។
ជំនាញបន្តាថាផ្សែងដែលភាយចេញពីឡធ្យូងផ្ទុកទៅដោយឧស្ម័នកាបូនឌីអុកស៊ីត (CO_2) និងសារធាតុពុលផ្សេងៗទៀត ដែលមិនត្រឹមតែបំពុលខ្យល់ដកដង្ហើមរបស់សហគមន៍ជុំវិញនោះទេ ប៉ុន្តែវាក៏ជាចំណែកមួយជំរុញឱ្យមានការកើនឡើងកម្តៅភពផែនដី និងការប្រែប្រួលអាកាសធាតុផងដែរ។
ទាក់ទិនករណីនេះជំនាញក៏បានតំលេចដែរថាការគ្រប់គ្រងការដុតខ្វះបច្ចេកទេស និងខុសច្បាប់ អាចបង្កជាភ្លើងឆេះព្រៃរាលដាលយ៉ាងងាយស្រួល ជាពិសេសក្នុងរដូវប្រាំង ដែលអាចបំផ្លាញព្រៃឈើរាប់រយហិកតាក្នុងពេលដ៏ខ្លី។
បច្ចុប្បន្ន មន្ត្រីជំនាញកំពុងបន្តស្រាវជ្រាវស្វែងរកជនល្មើសដែលជាម្ចាស់ទីតាំង ដើម្បីយកមកអនុវត្តទោសតាមច្បាប់ស្តីពីតំបន់ការពារធម្មជាតិ។ជាមួយគ្នានេះ អាជ្ញាធរនិងមន្ទីរជំនាញ ក៏បានអំពាវនាវដល់បងប្អូនប្រជាពលរដ្ឋក្នុងមូលដ្ឋាន ឱ្យបញ្ឈប់រាល់សកម្មភាពកាប់ឈើធ្វើឡធ្យូង និងងាកមកចូលរួមការពារព្រៃឈើ ក៏ដូចជាការរាយការណ៍ជាបន្ទាន់នូវរាល់បទល្មើសឡធ្យូង ឬការកាប់បំផ្លាញព្រៃឈើខុសច្បាប់មកសមត្ថកិច្ច ដើម្បីរួមគ្នាថែរក្សាធនធានធម្មជាតិសម្រាប់កូនចៅជំនាន់ក្រោយ៕
ចែករំលែកព័តមាននេះ