មន្ត្រីរដ្ឋបាលព្រៃឈើ បង្ក្រាបការលក់សាច់សត្វព្រៃខុសច្បាប់ជិត ៦០គីឡូក្រាម នៅផ្សារសាមគ្គី
- ស្ទឹងត្រែង
ខេត្តស្ទឹងត្រែង៖ មន្ត្រីជំនាញនៃខណ្ឌរដ្ឋបាលព្រៃឈើខេត្តស្ទឹងត្រែង បានចុះប្រតិបត្តិការឆ្មក់ត្រួតពិនិត្យ និងបង្ក្រាបករណីលក់ដូរសាច់សត្វព្រៃខុសច្បាប់នៅទីតាំងផ្សារសាមគ្គី ក្រុងស្ទឹងត្រែង កាលពីព្រឹកថ្ងៃទី១៨ មិថុនា ២០២៦ នេះ ដោយដកហូតបានសាច់សត្វព្រៃចំនួន៣ប្រភេទ ខណៈជនល្មើសបានរត់គេចខ្លួនបាត់ស្រមោល។
ក្នុងកិច្ចប្រតិបត្តិការចុះពង្រឹងច្បាប់ស្តីពីព្រៃឈើ និងការអភិរក្សជីវចម្រុះនេះ កម្លាំងជំនាញបានរកឃើញ និងដកហូតវត្ថុតាងជាសាច់សត្វព្រៃសរុបប្រមាណ ៦០គីឡូក្រាម។ ទោះជាយ៉ាងណា ក្នុងពេលដែលសមត្ថកិច្ចជិតទៅដល់ទីតាំងកើតហេតុ ក្រុមអាជីវករដែល លួចលាក់លក់ដូរសាច់សត្វព្រៃទាំងនោះ បានដឹងខ្លួនមុន និងរត់គេចខ្លួនចេញពីផ្សារភ្លាមៗ បន្សល់ទុកតែវត្ថុតាង។
បច្ចុប្បន្ន សាច់សត្វព្រៃទាំង ៣ប្រភេទ ដែលជាវត្ថុតាងនៃបទល្មើស ត្រូវបានមន្ត្រីជំនាញដកហូតយកទៅរក្សាទុកជាបណ្តោះអាសន្ន ដើម្បីចាត់ការបន្តទៅតាមនីតិវិធីច្បាប់ជាធរមាន។
មន្ត្រីរដ្ឋបាលព្រៃឈើខេត្តស្ទឹងត្រែង បានអំពាវនាវយ៉ាងទទូចដល់សាធារណជន ជាពិសេសប្រជាពលរដ្ឋក្នុងមូលដ្ឋាន ឱ្យបញ្ឈប់រាល់សកម្មភាពបរបាញ់ ដឹកជញ្ជូន ជួញដូរ និងការបរិភោគសត្វព្រៃគ្រប់ប្រភេទ ដើម្បីរួមគ្នាការពារ និងអភិរក្សធនធានធម្មជាតិ ក៏ដូចជាជីវចម្រុះឱ្យបានគង់វង្សសម្រាប់កូនចៅជំនាន់ក្រោយ។
ជាមួយគ្នានេះ ប្រភពពីមន្ត្រីដដែលបានគូសបញ្ជាក់ថា សមត្ថកិច្ចជំនាញនឹងបន្តយុទ្ធនាការរឹតបន្តឹងការត្រួត ពិនិត្យ និងតាមដានបង្ក្រាបបទល្មើសសត្វព្រៃខុសច្បាប់បែបនេះជាបន្តបន្ទាប់ទៀត នៅតាមបណ្តាទីផ្សារ និងតំបន់គោលដៅនានា ទូទាំងភូមិសាស្ត្រខេត្តស្ទឹងត្រែង ដើម្បីលុបបំបាត់ការជួញដូរខុសច្បាប់ឱ្យមានប្រសិទ្ធភាពខ្ពស់៕
ចែករំលែកព័តមាននេះ