ស្ទឹងត្រែង ជម្រុញការស្តារគុណភាពដី និងអភិរក្សធនធានធម្មជាតិ ដើម្បីធានានិរន្តរភាពកសិកម្ម
- ស្ទឹងត្រែង
ខេត្តស្ទឹងត្រែង៖មន្ទីរកសិកម្ម រុក្ខាប្រមាញ់ និងនេសាទខេត្ត បានប្រារព្ធ «ទិវាពិភពលោកប្រយុទ្ធប្រឆាំងនឹងការធ្លាក់ចុះគុណភាពដី និងគ្រោះរាំងស្ងួត»កាលពីព្រឹកថ្ងៃទី ១៧ មិថុនា ២០២៦ ក្នុងគោលបំណងដាស់តឿន និងលើកកម្ពស់ការយល់ដឹងជាសាធារណៈ អំពីផលប៉ះពាល់នៃការប្រែប្រួលអាកាសធាតុ និងការបាត់បង់លំនឹងប្រព័ន្ធអេកូឡូស៊ីដី។
លោក ទុំ នីរ៉ូ ប្រធានមន្ទីរកសិកម្ម រុក្ខប្រមាញ់និងនេសាទខេត្តបានលើកឡើងថា៖ទិវាពិភពលោកនេះ ត្រូវបានបង្កើតឡើងដោយមហាសន្និបាតអង្គការសហប្រជាជាតិ តាំងពីឆ្នាំ១៩៩៤ដែលមានប្រទេសជាសមាជិកចំនួន ១៩៥ ចូលរួមប្ដេជ្ញាចិត្តសម្រេចឱ្យបាននូវការអភិវឌ្ឍប្រកបដោយនិរន្តរភាព បង្ការរហោស្ថានកម្ម និងការធ្លាក់ចុះគុណភាពដី។នាឱកាសនោះលោកប្រធាន៊មន្ទីរបានគូសបញ្ជាក់ថា៖ វិស័យកសិកម្មគឺជាឆ្អឹងខ្នងសេដ្ឋកិច្ចដ៏សំខាន់របស់ខេត្តស្ទឹងត្រែង ដែលស្រូបយកកម្លាំងពលកម្មប្រជាពលរដ្ឋរហូតដល់ ៨៣%។
ផ្អែកលើរបាយការណ៍វឌ្ឍនភាពទិន្នផលឆ្នាំ២០២៥ ការបង្កបង្កើនផលស្រូវសម្រេចបាន ២៨ ៩២០ ហិកតា លើសផែនការ ២,៥៩% ធានាបាននូវសន្តិសុខ ស្បៀងលើសតម្រូវការជាង ១៣ ០០០ តោន ព្រមទាំងមានផ្ទៃដីដាំដុះដំណាំសាកវប្បកម្ម និងឧស្សាហកម្ម ដូចជា ដំឡូងមី ស្វាយចន្ទី កៅស៊ូ សរុបជាង ១១ ម៉ឺនហិកតា សម្រាប់បម្រើការនាំចេញ។ក្នុងស្ថានភាពបច្ចុប្បន្ន គិតត្រឹមឧសភា ២០២៦ ការងារដាំដុះស្រូវវស្សាសម្រេចបាន ២៣,៣៣% នៃផែនការសរុប ២៩,៨៥០ ហិកតា រួមជាមួយដំណាំឧស្សាហកម្មជាង ៦ ម៉ឺនហិកតាទៀត។
លោក សរ សុពុត្រា អភិបាលខេត្តស្ទឹងត្រែងបានលើកឡើងថា៖ ទោះបីជាខេត្តស្ទឹងត្រែងមានភូមិសាស្ត្រអំណោយផល មានប្រភពទឹកជួបគ្នាទន្លេទាំងបួនក៏ដោយ ក៏ការប្រែប្រួលអាកាសធាតុ គ្រោះរាំងស្ងួត និងការខ្វះខាតទឹក នៅតែជាការគំរាមកំហែងចម្បងដល់ស្ថិរភាពនៃការបង្កបង្កើនផល និងគុណភាពដីកសិកម្ម ប្រសិនបើគ្មានការគ្រប់គ្រង និងការពារឱ្យបានត្រឹមត្រូវនោះឡើយ។
សម្រាប់ការការពារព្រៃឈើ និងយុទ្ធនាការបង្កើនគម្របបៃតងដើម្បីឆ្លើយតបនឹងបញ្ហាប្រឈមនេះ ថ្នាក់ដឹកនាំខេត្តស្ទឹងត្រែងបានដាក់ចេញនូវទិសដៅការងារ និងវិធានការក្ដៅៗចំនួន ២ ៖ ១-រដ្ឋបាលខេត្តប្រកាសជំហរដាច់ខាត មិនទន់ជ្រាយ ឬទទួលយកការសុំអន្តរាគមន៍ណាមួយចំពោះបទល្មើសបំផ្លាញធម្មជាតិ នោះឡើយ។ ជនខិលខូចដែលកាប់បំផ្លាញព្រៃឈើ និងទន្ទ្រានយកដីរដ្ឋដោយខុសច្បាប់ដែលជាដើមហេតុធ្វើឱ្យបាត់បង់លំនឹងទឹកភ្លៀង និងធ្វើឱ្យដីខូចគុណភាព ត្រូវតែប្រឈមមុខនឹងចំណាត់ការច្បាប់តាមរយៈប្រព័ន្ធតុលាការជាធរមាន។ ២-ជម្រុញប្រជាពលរដ្ឋឱ្យផ្លាស់ប្ដូរផ្នត់គំនិត ដោយមិនត្រូវទុកដីជុំវិញផ្ទះឱ្យទំនេរចោល ឬស្ងួតក្រៀមក្រោះឡើយ ត្រូវដាំដុះដំណាំរួមផ្សំ ឬដើមឈើហូបផ្លែ ដើម្បីរក្សាភាពសើម និងវាយនភាពដី។
តាមវត្តអារាម និងសាលារៀន ត្រូវបង្កើតចលនាដាំដើមឈើប្រណីត ឈើហូបផ្លែ ឬដាំផ្កា ដើម្បីបង្កើនគម្របបៃតង និងការពារការហូរច្រោះដី។ តំបន់មាត់ទន្លេ ណែនាំឱ្យដាំដើមឫស្សីនៅតាមដងទន្លេ ដើម្បីជួយទប់ច្រាំងកុំឱ្យបាក់ និងរក្សានិរន្តរភាពដីតំបន់ឆ្នេរទន្លេ។
លោកស្រី ចាន់ ផលលឿន អនុរដ្ឋលេខាធិការក្រសួងកសិកម្មរុក្ខាប្រមាញ់និងនេសាទបានមានប្រសាសន៍ថា៖ ការប្រយុទ្ធប្រឆាំងនឹងការធ្លាក់ចុះគុណភាពដីនិងគ្រោះរាំងស្ងួត មិនមែនជាកាតព្វកិច្ចរបស់បុគ្គលណាម្នាក់ឡើយ ប៉ុន្តែវាទាមទារឱ្យមានការចូលរួមយ៉ាងសកម្មពីគ្រប់ភាគីពាក់ព័ន្ធ ទាំងការបញ្ឈប់ការបំផ្លាញព្រៃឈើ និងការបង្កើនការដាំដុះឡើងវិញ ដើម្បីធានាថាដីនៅតែមានជីវជាតិសម្រាប់ទ្រទ្រង់សេដ្ឋកិច្ចកសិកម្មរបស់ខេត្តស្ទឹងត្រែង ឱ្យមានភាពរឹងមាំនិងនិរន្តរភាពតទៅអនាគត៕
ចែករំលែកព័តមាននេះ