ទីក្រុងតេអេរ៉ង់៖ ប្រទេសអ៊ីរ៉ង់នឹងបើកច្រកសមុទ្រហ័រម៉ូសជាបន្ទាន់នៅពេលកិច្ចព្រមព្រៀងសន្តិភាពចាប់ផ្ដើមចុះហត្ថលេខា។ អ៊ីរ៉ង់ក៏នឹងទទួលបានការអនុញ្ញាតពីអាមេរិកដើម្បីលក់ប្រេងឆៅដោយគ្មានការរឹតត្បិតតទៅទៀតទេ។ នេះបើយោងតាមឯកសារបែកធ្លាយដែលអ្នកសារព័ត៌មានទទួលបាន ហើយត្រូវមន្ត្រីរដ្ឋាភិបាលប្រទេសទាំង២បញ្ជាក់ថាពិតជាត្រឹមត្រូវ។ កិច្ចព្រមព្រៀងនោះត្រៀមចុះហត្ថលេខានៅថ្ងៃសុក្រសប្ដាហ៍នេះនៅប្រទេសស្វីស។
អាមេរិកនឹងធ្វើជាមេចំណែកនៅក្នុងការស្វះស្វែងរកថវិកាយ៉ាងតិច៣រយពាន់លានដុល្លារដើម្បីកសាងប្រទេសអ៊ីរ៉ង់ឡើងវិញ។ មានន័យថាលោកត្រាំកំពុងអនុវត្តនយោបាយ «ដំបង និងការ៉ុត» វាយប្រហារទាល់តែខ្ទេចដូចបង្អួល រួចហើយទើបចាប់ផ្ដើមបញ្ចុកចំណីជាក្រោយ (កសាងប្រទេសឡើងវិញ)។ សមដូចពាក្យស្លោកមួយឃ្លាថា «បើមិនវាយគ្នាក៏មិនស្គាល់គ្នា» អាមេរិកនឹងបិទបញ្ចប់រាល់ការដាក់ទណ្ឌកម្មទាំងអស់លើអ៊ីរ៉ង់។ ទណ្ឌកម្មរបស់អង្គការសហប្រជាជាតិទាំងអស់ដែលដាក់ទៅលើអ៊ីរ៉ង់ក៏ត្រូវដកចេញផងដែរ។ ការបន្ធូរបន្ថយនេះអាចធ្វើទៅបានលុះត្រាតែមានកិច្ចព្រមព្រៀងនុយក្លេអ៊ែរជាមុនសិន។
តាមមើលទៅ កិច្ចព្រមព្រៀងក្រោយនេះអាចនឹងទទួលរងការរិះគន់យ៉ាងចាស់ដៃនៅក្នុងចំណោមអ្នកនយោបាយធំៗនៅវ៉ាស៊ីនតោន ហើយក៏ធ្វើឱ្យនាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ ខកចិត្តមិនតិចដែរ។ នេះជាការដើរថយក្រោយរបស់លោកណឺតាន់យ៉ាហ៊ូព្រោះលោកជាអ្នកចូលរួមជាមួយអាមេរិកក្នុងការវាយប្រហារអ៊ីរ៉ង់កាលពីចុងខែកុម្ភៈ។ ចិត្តរបស់ណឺតាន់យ៉ាហ៊ូគឺចង់កាច់បំបាក់ ឬដូររបបដឹកនាំនៅអ៊ីរ៉ង និងកាច់បំបាក់ក្រុមហេសបូឡានៅប្រទេសលីបង់។
កិច្ចព្រមព្រៀងក្រោយនេះទាមទារឱ្យអ៊ីស្រាអែល និងហេសបូឡាបញ្ឈប់ការប្រយុទ្ធគ្នាជាបន្ទាន់នៅលីបង់។ នេះជាចំណុចសំខាន់មួយនៅក្នុងកិច្ចព្រមព្រៀងព្រោះបើមិននិយាយចងជើងដូច្នេះទេមិនកើតឡើយ។ អ៊ីស្រាអែលប្រកាសពីមុននេះថាទោះបីមានកិច្ចព្រមព្រៀងអាមេរិក-អ៊ីរ៉ង់ក៏ខ្លួននៅតែបន្តយុទ្ធនាការនៅលីបង់ដដែល។ អាមេរិក និងអ៊ីរ៉ង់នឹងយកពេល៦០ថ្ងៃនៃការផ្អាកផ្ទុះអាវុធដើម្បីចរចាគ្នាសម្រេចឱ្យបានកិច្ចព្រមព្រៀងមួយជាស្ថាពរ។ ក្នុងនោះ អាមេរិកទាមទារដាច់ខាតមិនឱ្យអ៊ីរ៉ង់ផលិតអាវុធនុយក្លេអ៊ែរទេ។ អាមេរិកកំពុងបញ្ចុកបន្ស៊ីអ៊ីរ៉ង់ដើម្បីឱ្យប្រទេសនេះទទួលយកកិច្ចព្រមព្រៀង៕ ប្រភព៖ AP
ចែករំលែកព័តមាននេះ