សារព័ត៌មានអាល្លឺម៉ង់​បានចេញផ្សារ​កាលពី​ថ្ងៃម្សិលមិញ​អំពាវនាវឲ្យ​រដ្ឋាភិបាល​ក្រុងប៊ែរ​ឡាំង​ត្រូវតែចាត់វិធាន​ការគ្រប់បែបយ៉ាង​ប្រើ​ប្រាស់​សិទ្ធិរបស់ខ្លួន​រួមទាំងបង្កក់​ទ្រព្យធន​បរទេស​របស់ថៃ​ ដើម្បីបង្ខំ​ឲ្យរដ្ឋាភិបាលថៃ​សង​ប្រាក់​​បំណុលទៅ​ឲ្យក្រុមហ៊ុន​សំណង់​ Walter Bau​ ទៅលើបញ្ហា​ជំលោះដែល​ទាក់ទង​​នឹង​គ្រោង​​ការសាង​សងផ្លូវ Don Muang Tollway។

តាមគេហ​ទំព័រ​ Spiegel​ និយាយ​ថា​ រដ្ឋា​ភិបាលថៃ​ធ្លាប់គិតពីបញ្ហា​បង់​ប្រាក់ធានា​ចំនួន​៣០​លាន​​ដុល្លារតាមការ​ទាមទារ​ តែពេល​នេះ​ដោះ​​ស្រាយ​មិនចេញ ​ហើយវា​បានធ្វើ​ឲ្យ​ក្រុម​ហ៊ុន​​សំណង់​ Walter Bau ​ខាតបង់​ជា​ច្រើន​​ដោយសារការ​និយាយដោះ​សាខុសពាក្យ​​សន្យា​របស់​​រដ្ឋាភិបាលថៃ​។

លោក Wermer ​schneider​ អ្នកគ្រប់គ្រង ក្រុមហ៊ុនសំណង់ Walter Bau បានទទួល​សាល​ដីកាតុលាការក្រុងប៊ែរឡាំង កាលពីខែមុនក្នុង​ការ​ដកហូត​យន្តហោះ​ប៊ូអ៊ីញ៧៣៧ ដែលជា​​របស់​​​ព្រះអង្គម្ចាស់​ស្នងរាជ្យ Maha Vajaralongkorn ​ក្នុងពេលចូល​សុំចត​ក្នុង​​ព្រលាន​យន្តហោះ​ទីក្រុងមុយនិច​។ ករណី​នោះ​​បានធ្វើ​ឲ្យទំនាក់​ទំនងការ​ទូតរវាង​ប្រទេស​ទាំង​​ពីរគ្រោតគ្រាត ​និងអាចឈាន​ដល់ការកាត់​ផ្តាច់​ទំនាក់ទំនង​ការទូត​ទៀតផង។​

រដ្ឋាភិបាលថៃ​ឈ្លោះប្រកែកគ្នា​លើបញ្ហាយន្ត​ហោះ​ថា គួរតែយក​មកវិញ ​ពីព្រោះវាជា​​ទ្រព្យ​ផ្ទាល់​ព្រះ​កាយរបស់​ព្រះអង្គម្ចាស់​​រាជ​ទាយាទ ​​និង​​មិនមែន​ជារបស់រដ្ឋ​ឡើយ។
តុលាការ​អាល្លឺម៉ង់បានចេញ​សាលដីកា​កំណត់​ដល់ខែកញ្ញា​ លើបញ្ហាដក​ហូតយន្ត​ហោះ។​ ប្រសិនបើយន្តហោះ​នោះពិតជា​​កម្ម​សិទ្ធិ​​ផ្ទាល់​របស់​ព្រះអង្គម្ចាស់​ត្រូវតែប្រគល់​ឲ្យវិញ។

ក្នុងពេលជាមួយគ្នានោះតុលាការក៏បានតំរូវ​ឲ្យដាក់ប្រាក់ធានាចំនួន២០លានដុល្លារសំរាប់​ការប្រគល់យន្តហោះវិញ តែទោះជាយ៉ាងណា​រដ្ឋា ភិបាលថៃច្រាន​ចោលការបង់ប្រាក់​។ ​រដ្ឋា​ភិបាល​​បានប្រកែកចំពោះការផ្តល់ប្រាក់ផ្ទាល់​ព្រះ​​កាយ​រ​បស់ព្រះអង្គម្ចាស់ Maha Vajaralongkorn ដើម្បីដោះស្រាយបញ្ហា​នោះ ដោយរដ្ឋា​ភិបាល​ថៃ​​​និយាយថា នឹង​ប្រើ​ប្រាស់​មធ្យោបាល​របស់ខ្លួនក្នុងការដោះស្រាយ​វិញ ឲ្យ​បានឆាប់​រហ័ស។

លោកសាស្ត្រាចារ្យ Christoph Paulus ផ្នែក​ច្បាប់នៃ​សាកល​វិទ្យាល័យ Humboldt ក្នុង​ទីក្រុងប៊ែរឡាំង និយាយថា រដ្ឋាភិបាលអាល្លឺ​ម៉ង់​គួរតែប្រើប្រាស់​សិទ្ធិ​គ្រប់យ៉ាង ដើម្បីឲ្យ​ប្រទេស​ថៃសងប្រាក់​បំណុលដែលជាប់ពាក់ព័ន្ធ​នឹង​ក្រុមហ៊ុនសំណង់។ មធ្យោបាយទាំងនោះរួម​មាន កំរិតទំនាក់ទំនង​ពាណិជ្ជកម្ម ឬបង្កកទ្រព្យ​បរទេស​របស់ប្រទេស​ថៃ៕