ហួសចិត្តលោកចោរលេងល្បែងទក់សាច់ លួចអីមិនលួចនាំគ្នាជិះម៉ូតូទៅលួចឆត្រមុខផ្ទះសមាជិកក្រុមប្រឹក្សាខេត្ត
- បាត់ដំបង
ខេត្តបាត់ដំបង ៖ ឆត្រគ្រាន់តែជាវត្ថុដែលអាចជួយបិទបាំងកំដៅថ្ងៃបានមួយគ្រាៗប៉ុណ្ណោះ។ វាគ្មានតំលៃមហាសាលដែលគូរឲ្យមនុស្សទូទៅចាប់អារម្មណ៍ទេ ប៉ុន្តែបែរជាលោកចោរចាប់អារម្មណ៏និងឱ្យតំលៃយ៉ាងទៅខ្លាំងវិញ រហូតហ៊ានប្រថុយដោយមិនខ្វល់ពី «គុកច្រវ៉ាក់» នាំគ្នាជិះម៉ូតូទៅលួចដកយកនៅខាងមុខផ្ទះសមាជិកក្រុមប្រឹក្សាខេត្តម្នាក់ កាលពីវេលាម៉ោង៤ទៀបភ្លឺថ្ងៃទី១៦ មិថុនា នៅចំណុចភូមិចម្ការប្ញស្សី សង្កាត់ព្រែកព្រះស្ដេច ក្រុងបាត់ដំបង ដែលគេចាត់ទុកជាអំពើ«ចោរកម្ម»មិនធ្លាប់ជួបសោះ។
នៅក្នុងឃ្លីបវីដេអូខ្លីមួយ ដែលថតជាប់ដោយកាមេរ៉ាសុវត្ថិភាពរបស់ម្ចាស់ផ្ទះ បានបង្ហាញពីសកម្មភាពជនសង្ស័យ០២នាក់ ជិះម៉ូតូម៉ាកស្គូពីពណ៌ស ឈប់នៅខាងមុខផ្ទះក្រោមពន្លឺភ្លើងអំពូលយ៉ាងច្បាស់ក្រឡែត ។ បើពីនិត្យសកម្មភាពលោកចោរចិត្តស្លុយទាំង០២នាក់នេះ ហាក់គ្មានខ្លាចរអារកាមេរ៉ាសុវត្ថិភាព ឬភ្នែកម្ចាស់ផ្ទះ ឬភ្នែកអ្នកដំណើរបន្តិចឡើយ។ ជនម្នាក់ពាក់អាវយឺតដៃខ្លីពណ៌សអង្គុយចាំលើម៉ូតូ រីឯជនម្នាក់ទៀតមាឌល្អិតបន្តិចពាក់មួកកន្តឹបចុះដើរទៅដកឆត្រ ដែលម្ចាស់ផ្ទះដាក់នៅខាងមុខ ដែលទំនងខាងក្រៅរបង ក្រោមពន្លឺភ្លើងអំពូលយ៉ាងច្បាស់ក្រឡែត ។
គេមិនដឹងថា តើឆត្រនោះមានតំលៃមហាសាលប៉ុនណាទេ សម្រាប់លោកចោរចិត្តស្លុយ០២នាក់នេះ ទើបបានជាពួកគេហ៊ានប្រថុយលេងនឹងល្បែងទក់សាច់ងងើលបែបនេះ ? ឬក៏ពួកគេមានគំនិតចង់បំផ្លាញម្ចាស់ផ្ទះដែល ជាសមាជិកក្រុមប្រឹក្សាខេត្តក្នុងចេតនាទុច្ចរិតអ្វីមួយ ?យ៉ាងណាក៏ដោយ ពិតមែនតែវាគ្រាន់តែជាឆត្រសម្រាប់បាំងថ្ងៃ មានតំលៃតិចតួចក្ដី ប៉ុន្តែអំពើ«លួច»វាជាបទល្មើស«ព្រហ្មទណ្ឌ»ដែលសមត្ថកិច្ចត្រូវតែធ្វើការស្រាវជ្រាវតាមចាប់ខ្លួនជនប្រព្រឹត្តទាំង០២នាក់នោះឲ្យបាន ដើម្បីយកមកសួរនាំ និងចាត់ការតាមផ្លូវច្បាប់ ។
បើតាមសមត្ថកិច្ចបានប្រាប់ថា ម្ចាស់ផ្ទះឬជាម្ចាស់ឆត្រដែលជាជនរងគ្រោះបានទៅកាន់អធិការក្រុងបាត់ដំបង ដើម្បីដាក់ពាក្យបណ្ដឹងហើយ។ ដោយឡែក លោកចោរចិត្តស្លុយទាំង០២នាក់ ដែលបង្ហាញរាងយ៉ាងច្បាស់ក្រឡែតក្នុងកាមេរា់សុវត្ថិភាពនោះ ក៏គេចំណាំមុខបានហើយដែរ រង់ចាំតែយកកងដៃទៅបំពាក់ជូនតែប៉ុណ្ណោះ ៕
ចែករំលែកព័តមាននេះ