ក្មេ.ងម្នាក់លង់ទឹកស្រះ ក្នុងតំបន់អភិវឌ្ឍន៍បឹងកក់ លិ.ចបាត់រកមិនទាន់ឃើញ
- ភ្នំពេញ
រាជធានីភ្នំពេញ ៖ ក្មេងប្រុសវ័យ៨ឆ្នាំម្នាក់ និងមិត្តភក្តិ ៤-៥នាក់ ទៀតនាំគ្នាទៅលេងស្រះទឹកនៅក្នុងតំបន់បឹងកក់ បណ្តាលអោយលង់ទឹក លិចបាត់ស្រមោល បង្កភ្ញាក់ផ្អើលកាលពីវេលាម៉ោង ០៨យប់ថ្ងៃទី ១៦ ខែមិថុនា ឆ្នាំ២០២៦ នៅចំណុចស្រះទឹក ក្នុងតំបន់អភិវឌ្ឍន៍បឹងកក់ សង្កាត់ស្រះចក ខណ្ឌដូនពេញ រាជធានីភ្នំពេញ ។
ក្មេងរងគ្រោះដែលលង់ទឹកឈ្មោះ ណូ ភេទប្រុស អាយុ៨ឆ្នាំ មានទីលំនៅក្បែរវត្តនាគវន្ត ។
តាមការបញ្ជាក់ពីមិត្តភក្តិកុមារារងគ្រោះ បានអោយដឹងថា រូបគេនិងគ្នីគ្នាចំនួន ៤ទៅ៥នាក់ទៀត បានបបួលក្មេងរងគ្រោះមកដើរលេង នៅចំណុចស្រះទឹកនៅក្នុងបឹងកក់ខាងលើ ចាប់តាំងពីម៉ោង ២រសៀល មកម្ល៉េះ ។ លុះពេលមកដល់ស្រះទឹក ក្មេងរងគ្រោះ ក៏បានដោះខោអាវ និងបានយកក្តារឈើ ដើម្បីហែលលេងទឹកតែម្នាក់ឯង រហូតមួយសន្ទុះក្រោយមក ក្មេងរងគ្រោះខាងលើបានហែលទៅបុកបង្គោលសសរនៅច្រាំងម្ខាងទៀត បណ្តាលអោយធ្លាក់ចូលទឹកលិចបាត់តែម្តង ។
ប្រភពពីម្តាយក្មេងរងគ្រោះបានអោយដឹងថា គាត់មិនបានដឹងថា កូនរបស់គាត់ លួចមកលេងទឹកស្រះនៅក្នុងតំបន់បឹងកក់តាំងពីពេលណានោះឡើយ ។ ដោយនៅវេលាម៉ោង ៥ល្ងាច ទើបមានមិត្តភក្តិរបស់កូនគាត់ ដែលមកលេងជាមួយគ្នា ប្រាប់ថា កូនគាត់លង់ទឹកលិចបាត់ខ្លួនហើយ គាត់ប្រញាប់ប្រញាល់ទាក់ទងទៅបងប្អូន និងរាយការណ៍ជូនសមត្ថកិច្ចអោយជួយអន្តរាគមន៍ជុំវិញទីតាំងកើតហេតុ ។
ក្រោយកើតហេតុ សមត្ថកិច្ចបានចុះមកដល់ទីតាំងខាងលើ រួចបានចុះទៅរាវរកជាមួយបងប្អូនប្រជាពលរដ្ឋ អស់រយៈពេលជាង ៣ម៉ោងហើយ ប៉ុន្តែនៅតែពុំទាន់រកឃើញនៅឡើយ ៕
ចែករំលែកព័តមាននេះ