ខេត្តព្រះវិហារ ៖ នៅព្រឹកថ្ងៃទី២ សីហា កន្លងមកនេះ មន្ទីរសាធារណការ និងដឹកជញ្ជូនខេត្ត បានរៀបចំពិធីបើកការដ្ឋានជួសជុលផ្លូវក្រាលក្រួសក្រហមឱ្យទៅជា ផ្លូវក្រាលកៅស៊ូវិញ ក្នុងទីប្រជុំជនក្រុងព្រះវិហារប្រវែង២.៨៦៨ម៉ែត្រ និងដាក់លូបេតុង១២កន្លែង ស្ថិតនៅក្នុងសង្កាត់កំពង់ប្រណាក
ខេត្តព្រះវិហារ ៖ នៅព្រឹកថ្ងៃទី២ សីហា កន្លងមកនេះ មន្ទីរសាធារណការ និងដឹកជញ្ជូនខេត្ត បានរៀបចំពិធីបើកការដ្ឋានជួសជុលផ្លូវក្រាលក្រួសក្រហមឱ្យទៅជាផ្លូវក្រាលកៅស៊ូវិញ ក្នុងទីប្រជុំជនក្រុងព្រះវិហារប្រវែង២.៨៦៨ម៉ែត្រ និងដាក់លូបេតុង១២កន្លែង ស្ថិតនៅក្នុងសង្កាត់កំពង់ប្រណាក ដែលថវិកាចំណាយជារបស់រាជរដ្ឋាភិបាលមានចំនួន១.៧១៧លានរៀល ។ ពិធីនេះធ្វើឡើងក្រោមអធិបតីភាពលោកអ៊ុំ ម៉ារ៉ា អភិបាលខេត្ត ដោយមានការចូលរួមពីមន្ត្រីរាជការមន្ទីរអង្គភាពជុំវិញខេត្ត កងកម្លាំងទាំងបីប្រភេទ ព្រមទាំងប្រជាពលរដ្ឋចំនូនពីរសង្កាត់ គឺសង្កាត់កំពង់ប្រណាក និងសង្កាត់ប៉ាលហាល សរុបប្រមាណ៥០០នាក់ ។
លោកផាន់ សំអាន ប្រធានមន្ទីរសាធារណការ និងដឹកជញ្ជូនខេត្ត បានថ្លែងថា ក្រោយរដ្ឋប្រហារ ថ្ងៃទី១៨ មីនា ឆ្នាំ១៩៧០ ទីប្រជុំជនខេត្តព្រះវិហារ ក៏ដូចជានៅទូទាំងភូមិសាស្ត្រខេត្តទាំងមូល បានក្លាយទៅជាតំបន់សង្គ្រាមរវាងខ្មែរក្រហម និងរបបលន់ នល់ ។ ក្នុងរបបខ្មែរក្រហម ប្រជាពលរដ្ឋក្នុងទីរួមខេត្តត្រូវបានបណ្តេញចេញអស់ ហើយពួកនេះបានវាយកម្ទេចចោលនូវរាល់អគារសំណង់នានា វត្តអារាម មន្ទីរពេទ្យ សាលារៀន ព្រះរាជដំណាក់ ។ល។ ដែលកសាងឡើងក្នុងសម័យសង្គមរាស្ត្រនិយម និងបន្សល់ទុកតែស្លាកស្នាមនៃរចនាសម័ន្ធផ្លូវខ្វាត់ខ្វែងក្នុងទីប្រជុំជនខេត្ដ និងគ្របដណ្ដប់ទៅដោយគ្រាប់មីន។ ក្រោយថ្ងៃ៧ មករា ឆ្នាំ១៩៧៩ ទីប្រជុំជនខេត្ដត្រូវបានកសាងឡើងវិញជាបណ្ដើរៗតែផ្លូវថ្នល់ក្នុងក្រុងពុំមានក្រាលកៅស៊ូទេ គឺបានស្ថាបនាឡើង ដោយក្រាលក្រួសក្រហម។ រហូតដល់ឆ្នាំ២០០០ ទើបទីប្រជុំជនខេត្ដបានស្ថាបនាផ្លូវដោយក្រាលកៅស៊ូ ជាបណ្ដើរៗ រហូតមកដល់ពេលនេះ ខេត្ដក៏បានដំណើរការជួសជុលផ្លូវលំក្រាលក្រួសក្រហមមកក្រាលកៅស៊ូវិញម្ដង។ ជាក់ស្ដែង នៅថ្ងៃនេះ បានបើកការដ្ឋានជួសជុលផ្លូវពីក្រាលក្រួសក្រហមមកក្រាលកៅស៊ូវិញមានប្រវែង២.៨៦៨ម៉ែត្រ បន្ទាប់ពីបានជួសជុលផ្លូវជាច្រើនខ្សែរួចមកហើយក្នុងទីប្រជុំជនក្រុង ។
លោកអភិបាលខេត្ដ អ៊ុំ ម៉ារ៉ា បានថ្លែងថា ព្រះវិហារ គឺជាខេត្ដមួយស្ថិតនៅជាយដែន និងជាខេត្ដមួយទទួលបានភ្ញៀវទេសចរជាតិនិងអន្ដរជាតិជាច្រើនចូលមកទស្សនា ព្រោះមានប្រាសាទបុរាណប្រមាណជាង២៤០ប្រាសាទ ។ ក្នុងពិធីនាព្រឹកនោះ ក៏មានការឧបត្ថម្ភអំណោយដល់ប្រជាពលរដ្ឋចូលរួមចំនួន១០០នាក់ ក្នុងម្នាក់ៗទទួលបានសារុង១ ថវិកា៥ពាន់រៀល កាយឫទ្ធិ៥០នាក់ ម្នាក់ៗសៀវភៅ៣ក្បាល ប៊ិច៣ដើម ថវិកា៥ពាន់រៀល យុវជនកាកបាទក្រហម៥០នាក់ ម្នាក់ៗថវិកា៥ពាន់រៀល៕
ចែករំលែកព័តមាននេះ