ទីក្រុងបាងកក៖ ថ្ងៃនេះ តុលាការថៃសម្រេចផ្ដន្ទាទោសប្រហារជីវិតបុរសជនជាតិអ៊ុយហ្គើ២នាក់ពីបទដាក់គ្រាប់បែកបំផ្ទុះអគារនៅទីក្រុងបាងកកកាលពីឆ្នាំ២០១៥។ ពួកគេជាអ្នករស់នៅខេត្តស៊ីនជាំង ប្រទេសចិន បានដាក់គ្រាប់បែកធ្វើឱ្យស្លាប់មនុស្ស២០នាក់។ នេះបើយោងតាមសេចក្ដីប្រកាសរបស់តុលាការ។ ហេតុការណ៍ផ្ទុះគ្រាប់បែកនោះកើតមានឡើងនៅទីកន្លែងគោរពសក្ការៈអេរ៉ាវ៉ាន់ (Erawan) នៅកណ្ដាលទីក្រុងបាងកក។ ទីនេះជាកន្លែងពេញនិយមនៃពួកទេសចរបរទេស។
ក្រៅពីស្លាប់មនុស្ស២០នាក់ មនុស្ស១២០នាក់ក៏បានរងរបួសនៅក្នុងហេតុការណ៍នោះផងដែរ។ នៅក្នុងចំណោមជនរងគ្រោះដែលបានស្លាប់ទាំង២០នាក់នោះ ៥នាក់ជាជនជាតិចិនដីគោក និង២នាក់ជាជនជាតិចិននៅទីក្រុងហុងកុង។ តុលាការប្រកាសថាសកម្មភាពរបស់ជនជាប់ចោទទាំង២នាក់គឺជាបទល្មើសច្រើនករណី និងជាគម្រោងការណ៍វាយប្រហារគិតទុកជាមុនដើម្បីប៉ុនប៉ងសម្លាប់មនុស្ស។ ដូច្នេះតុលាការសម្រេចផ្ដន្ទាទោសប្រហារជីវិត។
ទណ្ឌិតទាំង២រូបនេះម្នាក់ឈ្មោះអាដឹម ខារ៉ាដាក់ (Adem Karadag) និងម្នាក់ទៀតឈ្មោះយូស៊ូហ្វ៊ូ មៀរេលី (Yusufu Mieralili) ធ្លាប់បដិសេធថាខ្លួនមិនបានប្រព្រឹត្តរឿងនេះទេ។ ខ្លួននឹងប្ដឹងទាស់ទៅសាលាឧទ្ធរណ៍ជាបន្តទៀត។ មេធាវីការពារក្ដីឱ្យទណ្ឌិតម្នាក់ប្រាប់ថាកុំទាន់មានអារម្មណ៍ភ័យខ្លាច នៅសល់តុលាការបីថ្នាក់ទៀតដែលយើងមានឱកាសប្ដឹងទាស់។ មេធាវីម្នាក់ទៀតថ្លែងថាតុលាការមិនបានពិចារណាទៅលើកត្តានានាដែលខ្លួនបានលើកឡើងនៅពេលឡើងការពារកូនក្ដីនោះទេ។ មេធាវីស្នើសុំពន្យារពេលដាក់ពាក្យប្ដឹងទាស់ទៅសាលាឧទ្ធរណ៍។ តាមច្បាប់របស់ប្រទេសថៃ ការប្ដឹងសាទុក្ខត្រូវធ្វើឡើងយ៉ាងយូរមួយខែក្រោយការចេញសេចក្ដីសម្រេចរបស់សាលាដំបូង។
សំណុំរឿងនេះស៊ីពេលរហូតដល់ទៅជាង១០ឆ្នាំមុននឹងឈានដល់ការចេញសេចក្ដីសម្រេចពីតុលាការ។ ព្រះរាជអាជ្ញាបានខិតខំប្រមែប្រមូលភស្តុតាងពីសាក្សីរហូតដល់រាប់រយនាក់។ ពួកគេក៏ពិបាករកអ្នកបកប្រែភាសាអ៊ុយហ្គើផងដែរដើម្បីស្ដាប់ពាក្យសម្ដីថ្លាថ្លែងរបស់ជនសង្ស័យ។ នៅក្នុងករណីផ្ទុះគ្រាប់បែកនោះ គ្មានក្រុមភេរវកម្មណាមួយប្រកាសថាជាស្នាដៃរបស់ខ្លួននោះទេ។ ប៉ុន្តែក្រុមអ្នកជំនាញខាងសន្តិសុខយល់ថានោះជាការសងសឹកករណីដែលរដ្ឋាភិបាលថៃចាប់បញ្ជូនជនជាតិអ៊ុយហ្គើជាង១រយនាក់ចេញពីប្រទេសថៃកាលពីមួយខែមុនពេលផ្ទុះគ្រាប់បែក៕ ប្រភព៖ Reuters
ចែករំលែកព័តមាននេះ