ទីក្រុងវ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ (Donald Trump) នឹង ប្រារព្ធពិធីខួបកំណើតគម្រប់៨០ឆ្នាំ នៅថ្ងៃទី១៤ ខែមិថុនា ឆ្នាំ២០២៦ ឆាប់ៗខាងមុខនេះ ហើយអំឡុងពេលឆ្លើយឆ្លងជាមួយអ្នកសារព័ត៌មាននៅឯសេតវិមានថ្មីៗនេះ លោកក៏បានទម្លាយអំពីបំណងប្រាថ្នាធំដែលលោកចង់បានជាកាដូពីថ្ងៃពិសេសនោះផងដែរ។ នេះបើតាមប្រភពពី USA Today បានចេញផ្សាយ។
លោកប្រធានាធិបតី ត្រាំ បានឆ្លើយតបទៅនឹងសំណួរអ្នកសារព័ត៌មាន កាលពីថ្ងៃទី១០ ខែមិថុនា ឆ្នាំ២០២៦ អំឡុងពេលលោកកំពុងតែចុះហត្ថលេខាលើច្បាប់ការពារសន្តិសុខអាមេរិកនៅក្នុងការិយាល័យរាងពងក្រពើនៃសេតវិមាន Oval Office ថា តើអ្វីជាបំណងប្រាថ្នានៅក្នុងថ្ងៃខួបកំណើតរបស់លោក ក្រៅពីសន្តិភាពនៅមជ្ឈិមបូព៌ា? លោកបានគិតមួយសន្ទុះមុននឹងឆ្លើយថា «សន្តិភាពសម្រាប់ពិភពលោក!» ហើយវាក៏ជាអ្វីដូចដែលលោកធ្លាប់បានប្រកាសរួចហើយថា សេចក្តីប្រាថ្នា និងការតាំងចិត្តរបស់លោកសម្រាប់ឆ្នាំថ្មីឆ្នាំ ២០២៦ នោះគឺ «សន្តិភាពពិភពលោក»។
គួរបញ្ជាក់ថា ខួបកំណើតឆ្នាំនេះ ខុសខួបកំណើតរាល់ដង ដោយព្រឹត្តិការណ៍ប្រដាល់គុនចម្រុះ UFC នឹងប្រព្រឹត្តទៅនៅលើវាលស្មៅខ្ចីខាងត្បូងសេតវិមាន។ សង្វៀនទ្រុង និងការរៀបចំជាច្រើនទៀតធ្វើឡើងអស់រយៈពេលជាច្រើនសប្តាហ៍មកហើយ។ លោក ត្រាំ អះអាងថា ព្រឹត្តិការណ៍ដែលអាចផ្ទុកអ្នកទស្សនាបានប្រហែល៥ពាន់នាក់នេះ នឹងក្លាយជាព្រឹត្តិការណ៍ដ៏ធំបំផុតមិនធ្លាប់មានពីមុននៅសេតវិមាន ដោយត្រូវបានគ្រោងទុកជាផ្នែកមួយនៃខួបលើកទី ២៥០ នៃបុណ្យឯករាជ្យជាតិសហរដ្ឋអាមេរិកផងដែរ៕
ចែករំលែកព័តមាននេះ