ខេត្តមណ្ឌលគិរី ៖ នារសៀលថ្ងៃទី១០ ខែមិថុនា ឆ្នាំ២០២៦ លោក គង់ គឹមនី អភិបាល នៃគណៈអភិបាលខេត្តមណ្ឌលគិរី បានដឹកនាំកម្លាំងសមត្ថកិច្ចចម្រុះទាំងបីប្រភេទ ចុះពិនិត្យទីតាំងអគារប្រព្រឹត្តសកម្មភាពឆបោកតាមប្រព័ន្ធអនឡាញ (Online Scam) ដែលត្រូវបានសមត្ថកិច្ចឡោមព័ទ្ធ និងបង្ក្រាបកាលពីពេលថ្មីៗកន្លងទៅ ។
ប្រតិបត្តិការចុះពិនិត្យផ្ទាល់នេះ ធ្វើឡើងក្រោមការសម្របសម្រួលនីតិវិធីពីលោក ម៉ម វណ្ណដា ព្រះរាជអាជ្ញា នៃអយ្យការអមសាលាដំបូងខេត្តមណ្ឌលគិរី ស្ថិតនៅចំណុចភូមិពូឆប ឃុំដាក់ដាំ ស្រុកអូររាំង ខេត្តមណ្ឌលគិរី ។
គួររំលឹកផងដែរថា ទីតាំងអគារសង្ស័យខាងលើនេះ ត្រូវបានកម្លាំងសមត្ថកិច្ចជំនាញ បើកប្រតិបត្តិការបង្ក្រាបយ៉ាងក្តៅគគុក កាលពីអំឡុងខែឧសភា ឆ្នាំ២០២៦ ក្រោមបទល្មើសបច្ចេកវិទ្យា និងការលេងល្បែងស៊ីសងខុសច្បាប់តាមប្រព័ន្ធអ៊ីនធឺណិត។ ក្រោយការបង្ក្រាប ទីតាំងទាំងមូលត្រូវបានសមត្ថកិច្ចធ្វើការហ៊ុំព័ទ្ធ និងបិទជិតជាបណ្តោះអាសន្ន ដើម្បីរក្សាទុកនូវរាល់វត្ថុតាង និងសម្ភារៈពាក់ព័ន្ធនានា សម្រាប់បម្រើឱ្យចំណាត់ការតាមផ្លូវច្បាប់ ។
ក្នុងដំណើរចុះពិនិត្យនាឱកាសនោះ លោក គង់ គឹមនី អភិបាលខេត្តមណ្ឌលគិរី បានថ្លែងនូវការកោតសរសើរចំពោះកងកម្លាំងប្រដាប់អាវុធ និងអាជ្ញាធរពាក់ព័ន្ធទាំងអស់ ដែលបានខិតខំប្រឹងប្រែង លះបង់កម្លាំងកាយចិត្ត ក្នុងការបង្ក្រាបបទល្មើសខាងលើបានទាន់ពេលវេលា ការពារបាននូវសន្តិសុខ និងសណ្តាប់ធ្នាប់សង្គម ។
ទន្ទឹមនឹងនេះ លោកអភិបាលខេត្ត ក៏បានផ្តល់ការណែនាំ និងក្រើនរំឮកយ៉ាងម៉ឺងម៉ាត់ដល់កម្លាំងសមត្ថកិច្ចឈរជើង រួមទាំងអាជ្ញាធរមូលដ្ឋាន ដែលកំពុងបំពេញភារកិច្ចការពារនៅទីតាំងផ្ទាល់ ត្រូវបន្តសហការគ្នាឱ្យបានស្អិតរមួត និងដាច់ខាតត្រូវយាមកាមឱ្យបានម៉ត់ចត់ខ្ពស់បំផុត ២៤ម៉ោងលើ២៤ម៉ោង ។
លោកបានបញ្ជាក់ថា រាល់សម្ភារៈ បរិក្ខារបច្ចេកវិទ្យា និងវត្ថុតាងគ្រប់យ៉ាងនៅក្នុងអគារទាំងនោះ ត្រូវតែការពារឱ្យបានគង់វង្ស មិនឱ្យមានការបាត់បង់ ឬមានការលួចបន្លំចូលក្នុងទីតាំងហាមឃាត់ជាដាច់ខាត ដើម្បីទុកជូនតុលាការចាត់ការបន្តតាមនីតិវិធីច្បាប់ជាធរមាន ៕
ចែករំលែកព័តមាននេះ